حسين خالد يكشف كواليس أغنية "كوتي": أحمد سعد تحمس للفكرة من أول مرة.. والأغنية صنعت حالة مختلفة
كشف الشاعر الغنائي حسين خالد كواليس أغنية "كوتي" التي قدمها الفنان أحمد سعد، مؤكدًا أنها حققت حالة مختلفة منذ طرحها ولاقت تفاعلًا كبيرًا من الجمهور.
وقال حسين خالد، في تصريحاته لـ القاهرة 24: الحمد لله الأغنية عملت حالة مختلفة، وكانت فكرتها من كتابتي، وبعدها بعتها للملحن قصي، وكنت متوقع إن مش أي حد هيبقى مستعد يغني أغنية بالشكل ده.
وأضاف: كنا وقتها شغالين على أغنية (ورد) ضمن الألبوم، فبعتنا أغنية (كوتي) كفكرة جديدة علشان يسمعها أحمد سعد، ولما سمعها فرح بيها جدًا وقال: اشتغلوا عليها.
وتابع: اشتغلنا على الأغنية بشكل مكثف لأنها فكرة مختلفة وجديدة، وكنت شايف من البداية إنها هتكون قريبة من الناس وهيبقى ليها قبول كبير عند الجمهور، والحمد لله ده اللي حصل بالفعل.
كلمات أغنية كوتي
أنا أبان من برايا ثابت، وكاريزما وعيل چان، واللي يشوفني يقول جامد، جامد وليه طلة جنان ومحدش واخد باله أن أنا محتاج لحنان، حد يطبطب ويدلع ويهشك فيا كمان، نفسي حد يقولي يا كوتي أتضايق يلعب ف خدودي، عشان طيب حظي النوتي بردو منصفنيش نفسي حد يقولي يا دودو هو فين وأنا أشد خدوده إمتى يتقالي يا كوتو موتو أصلي متقاليش هو الكل بيتهشتك وأنا مش بتهشتك ليه؟ حد هييجي يفهمني ولا أسأل شات چي بي تي ملقتش اللي يدلعني باين حد مخبيه مكتوبلي ابقي وحيد يعني.. طب عارف نفسي ف إيه؟ نفسي حد يقولي يا كوتي أتضايق يلعب ف خدودي عشان طيب حظي النوتي بردو منصفنيش نفسي حد يقولي يا دودو هو فين وأنا أشد خدودو امتى يتقالي يا كوتو موتو أصلي متقاليش.
