أكلوا حقوقي ومبيردوش.. المنتج طارق نچارة يكشف تفاصيل خلافه مع الرابر مروان بابلو وليجي سي| فيديو ومستندات
كشف المنتج طارق نچارة تفاصيل خلافه مع الرابر مروان بابلو وليجي سي، الذي يعود لبداية 2022، مشيرًا إلى أنه لم يحصل على باقي مستحقاته المادية إثر إنتاجه لهما بعض التراكات حتى الآن.
تفاصيل خلاف المنتج طارق نچارة مع ليجي سي
وقال نچارة خلال تصريحات خاصة لـ القاهرة 24: الخلاف بدأ في أوائل 2022، أنا بدأت ألاحظ إن فيه نوع من أنواع تغيير الكلام في اللي اتفقنا عليه، وليجي سي طلب مني نسخة من العقد عشان يتطمن ويعدلها عشان نفتح مع بعض شغل جديد، وكان مدير أعماله خالد أبو الليل حاضر وفجأة مبقاش يرد على التليفون لأكتر من 4 شهور، طب بالنسبة لتعويضي عن الإنتاجات اللي عملناها!!!! والعقود!! فجأة اختفوا وبدأوا يقولوا كلام مغلوط عني زي إنه كان تاعبني أوي وحاجات تانية مش قادر أفهمها.
تفاصيل خلاف المنتج طارق نچارة مع مروان بابلو
أما عن خلافه مع الرابر بابلو، أردف نچارة: حاسس إن كان فيه اتفاقية بين ليجي سي ومروان بابلو وغششوا بعض، وكأن بابلو قاله أنا أخدت كليب “غابة” وجريت، يلا يا ليجي سي، مفيش عقود يلا، مش هيعرف يرفع علينا قضايا وهيعديها ويسكت، لا، ده حرام وديه فلوس، لو مفيش عقود بس دلوقتي القوانين الدولية بتحتكم للمخاطبات والمراسلات وإيصالات الاستلام، فيه إيصالات ماضي عليها مديرين أعمالهم نيابةََ عنهم، ونفس الحكاية عملها مروان بابلوا اختفى ومبيردش، وفي 2024 عملنا اجتماع اونلاين ومسجله بعلمه، وقال هيعوضني، ومحصلش حاجة لحد النهارده، أنا عايز حقوقي بس يا جماعة!!!
وعن إمكانية حل الخلافات بشكل ودي، أشار نچارة إلى أنه عكف على عدد من المحاولات التي باءت جميعها بالفشل، مضيفًا: حصل محاولات كتير على مدار السنين اللي فاتوا، حاولت أتواصل مع ليجي سي شخصيًا ومدير أعماله بس مبيردوش، وكمان المحامي اللي مضاه على العقد وشركائي شاهدين على ده، وبالمناسبة خالد أبو الليل اللي مدير أعماله دلوقتي كان موظف عندي وماسك شغل ليجي سي بمرتب بديهوله أنا، وديه وقائع بإيصالات استلام.
هل لجأ المنتج طارق نچارة للمحاكم؟
كما تطرق المنتج طارق نچارة عن فكرة لجوئه للقضاء، موضحًا: كان فيه عقد وهو أخده، بس الحق كده كده مش هيموت، أنا موجود وهو موجود هنروح فين؟! أنت ربنا كرمك وقادر تعوض الاستثمار المادي اللي اتحط فيك، سواء في كليبات أو نثريات في لايف ستايل، وهما لو عندهم نيلة للحل هنتكلم في كل ده، الموضوع بسيط، اللي مخليني أتكلم دلوقتي هو إن ربنا كرمك ومش راضي تحل ليه الحاجات القديمة بتاعتك؟!! أنت فاكر إنك هتختفي ؟! لا مفيش حقوق بتموت، وفكرة الضغط بلجان الجماهير يشتموا فيّا موضة إنك تسلط الفانز وهكذا ديه مدرسة قديمة أوي، ده حق وفلوس ناس، أنا لحد آخر لحظة محترم نفسي وسمعتي ومجهودي.
واختتم حديثه، قائلًا: هل لمجرد إني قولتلك إنك استثمار سيء يديلك الحق تاكل عليّا حقوقي المادية، وأنت سبق وأقريت إن أنا اللي أنتجت الأغاني ديه، محتاج تقولي أنت عوضتني عن إنتاجي ده إزاي؟؟ أنا مش طالب غير إنه يرد بأي طريقة هو أو خالد أبو الليل، ولو محتاج الفلوس للدرجة ديه قولي إنك محتاجها ومقدرش أدفع، هقولك تمام، بس أنت دلوقتي تقدر، أنا استنين إنك تبقى قادر وأتكلم طب ما تردها إيه المشكلة؟!!
شكوى رسمية ضد ليجي سي ومروان بابلو في نقابة الموسيقيين
الجدير بالذكر أن طارق نجارة سبق وتقدم بشكوى ضد ليجي سي ومروان بابلو للفنان مصطفى كامل نقيب المهن الموسيقية، مشيرًا إلى خلال الشكوى إلى أنه تم طرح المنصفات على المنصات الرقمية وتربحوا من عوائدها مما ألحق بشركته ضررًا ماليًا ومعنويًا، والأعمال هي: كليب "غابة" لمروان بابلو طُرح في فبراير 2021، بالإضافة إلى كليب "ثرثرة" في أبريل 2021، وتراك "تاني" في أغسطس 2021 وتراك عرفة في سبتمبر 2021، وألبوم "بلان بي" في مارس 2021 لـ ليجي سي.
