جمهور “الدحيح” يهاجم “قطوف من الأسك” والدعاة الشباب: “دجالين وكورساتهم بالدولار” (صور)
توالت حلقات الهجوم المتبادل بين متابعي وجمهور برنامج “الدحيح” لمقدمه أحمد الغندور، ومؤسسي صفحة “قطوف من الأسك” وعدد من شباب الدعاة، والتي بدأت بإتهام “قطوف من الأسك” لإحدى حلقات برنامج “الدحيح” بالإلحاد.
وعرض أحد جمهور برنامج “الدحيح” في منشور له على “فيس بوك”، العديد من المشاهد التي شكلت هجومًا على مؤسسي “قطوف من الأسك” وبعض الدعاة الشباب.
وقال حامد أحمد: “قناة أمين محمود صبري: دا واحد كاتب كتاب عن إن الأرض مسطحة و بيدي كورسات جلب الرزق وكيف تعالج نفسك من الإكتئاب وكورس عن أسرار الأسماء الحسنى، و كل دا بفلوس و مش فلوس عادية لأ دا بالدولار، وأنا بطلب من اللي مش مصدقني يخش القناة و يتفاجئ و ياخد باله أن الشخص دا داخل على 400 ألف سبسكرايبر بيعملهم كورسات في الدجل و كل كلامه من القرآن زي ما بيقول”.
بسبب حلقة “يا محاسن الصدف”.. اتهام برنامج “الدحيح” بالإلحاد (صور وفيديو)
وتابع: “أحمد سالم الشيخ العلامة اللي بيتحفنا بروائع دينية على قطوف من الأسك عامل كورس عن التفكير المنطقي و بياخد منه فلوس بالدولار برضه، اللي هو يعني إيه كورس التفكير المنطقي؟ و حضرتك دارس للمنطقية فين؟”.
وأردف: “دكتورة هالة سمير اللي استحالة تكون دكتورة إلا في الدجل بتاعت”الغدة البصرية عند الراجل كبيرة، عامل كورس أنوثة إسلامي أون لاين عشان تعلم فتياتنا التأوهات الحارة وأسرار الأنوثة وعاملة كورس تربية وكورس إصلاح علاقات زوجية وشوية شوية هتعملنا كورس أيروبكس إسلامي وهتاخد من الحوار دا فلوس بالدولار برضه”.
وواصل: “أمير منير حكى لينا في مرة قصة حياته في بوست إنه كان صيدلي فقير وربنا فتحها عليه من وسع بفكرة الفيديوهات، عمل هو وكريم إسماعيل من فترة مطعم «سيركل آند سكوير» من فلوس الكورسات اللي شبه الكورس اللي تحت دا، بيعلموا الناس فيه التربية السليمة للمراهقين، وربنا وحده اللي يعلم أين تعلم الاتنين دول أساليب التربية عشان يعملوا عنها كورس بتلات آلاف جنيه، و كورس للمشاكل الزوجية كمان بألفين وقصة كبيرة ولو جبت أصحابك معاك هيكون ليك خصم”.
واستطرد: “أحمد عمارة هو معالج بالطاقة باين وبيهبد كلام في علم النفس وبياكل عيش بالدين على أساس إن الآيات بتعالج الأمراض النفسية وبيدي كورسات تفسير مع أمين صبري وياريت تشوفوا فيديو أمين صبري عن قصة كفاحهم سوا، كورسات الراجل دا غالية جدًا و في مختلف البلاد العربية وعنده أكتر من نص مليون مشترك على قناته”.
وأضاف، أن صفحة “الباحثون المسلمون” يكتب فيها شباب بائس يرون أن العلماء يخفون أن التطور سقط في الغرب وأنه خدعة وأن هتلر قتل الناس لأنه كان مؤمن بالتطور و”لماذا لا تنكح أختك يا ملحد؟”، مبينًا أنهم يستعينوا بأبحاث تمت في “كفر أبو معزة” و15 شخصًا من أجل أن يثبتوا أن الناس تُعالج بالقرآن وأن الصيام يُعالج أي شئ.
وزاد: “هيثم طلعت هو مكافح للشبهات و عمله كتابين تلاته يسترزق منهم و قناته في الرد على الشبهات نكتة بصراحة، بيشرح فوايد السبي للنساء و عامل كتاب أربعين غلطة في نظرية التطور و الناس بتحاربه طبعاً، و عيادة للملحدين”.
وأوضح: “فاضل سليمان بقى عامل مفاجأة و هي كورس لحماية طفلك من الإلحاد و باليورو، و يقولكم متستخسروش في أطفال دورة الوقاية دي”.
وأشار، إلى أن السالف ذكرهم يضاف إليهم بعض الكوادر المشهورة مثل زغلول النجار والعريفي وعمر عبد الكافي، وغيرهم ممن يستعملون دجل الإعجاز العلمي في القرآن، على حد وصفه، فضلًا عن حصولهم على ملايين مقابل تلفيق آية من نصف سطر على نظرية علمية ضخمة بها تفاصيل ومجهود علمي كبير.
ردًا على اتهامه بالتجارة بالدين.. أمير منير: للأسف مفيش تعليم مجانًا ولا معيشة مجانًا
وأضاف: “كل الدجل دا كله مش مهم و ميخوفش و مبيضرش شباب المسلمين و الدحيح هو اللي عاوز يضللهم؟ كل الدجل دا مش هنحاربه عشان نحافظ على عقول شبابنا؟ وإعتراضي هنا مش عشان الناس بتاخد فلوس قصاد المعلومات اللي بتقولها، أنا شايف إن السوق الرأسمالي بيقولك بوضوح حط سلعتك اللي معاك ولو الناس اشتريتها منك يبقى انت نجحت و شكراً طالما متجبرش حد على حاجة، لكن إعتراضي هنا ع المحتوى اللي بيتقدم والدجل اللي بيتباع و الناس مبتتكلمش عليه ورايحين يتعاركوا مع الدحيح على أساس إن هو اللي بيفسد عقول الشباب بمعلومات غلط أو مصدرها مختلف معانا”.
ولفت، إلى أن “الدحيح” يتعامل مع العلم بالشكل الصحيح دون انتماء أو توجه، قائلًا: “أحمد الغندور مش عاوز أعمله Icon وأكبّر من قيمة اللي بيعمله زيادة عن اللزوم، لكن لا محالة هو بيضيف شيء و لو بسيط و هو يستحق الدعم أكتر من غيره بكتير”.
