حسام هيكل مدافعًا عن أمير منير: “بلاش تشهير واللي مش عاجبه ميحضرش”
دافع الكاتب حسام هيكل عن الدكتور أمير منير الداعية المعروف على صفحات التواصل الاجتماعي، عقب حملة الانتقادات التي طالته خلال الفترة الأخيرة، حول تكسبه أموال طائلة نظير فيديوهات دينية ينشرها على صفحته.
ونشر “هيكل” صورة جمعته بالداعية المذكور، وكتب عليها: “الراجل اللي في الصورة دة إنسان له الفضل عليا، بعلمه ولينه وقلبه اللي بيحرك لسانه بكلام نسمعه بيطمن كل إنسان إن الثقة في الله دائما وأبداً تعين الشخص على الفلاح”.
وأضاف: “الراجل دة أول داعية في مصر قفل كل الإعلانات يوتيوب وفيس بوك، عشان لما تفتح فيديو في كلام ربنا، متشوفش إعلان فيه واحدة بترقص أو حاجة تلهيك عن اللي هتفتح تتفرج عليه ومسبش أي احتمال رغم أن فيديوهاته بتجيب ملايين اللي تخليه يعيش بفلوس رهيبة”.
وتابع: “وحق لا إله إلا الله أنا أشهد على إن دة أقل فعل إنساني نيته طيبة الراجل دة عمله على عشرتي بيه سنة كاملة ٢٠١٦، ويسمع ليومنا هذا أضعاف اللي عاشرته فيه من خير وفضل ولين، الراجل دة دارس في مؤسسات دولية وعالمية من جوا وبرا مصر وواخد تدريبات كتيرة بفلوس كتير جدا على أيدي ومنها من مؤسسات انا اتعلمت فيها مجال علوم الإنسان ونفذ اكاديمية اسمها Mind Builders Academy من سنين و دلوقتي طور مجاله بسنه وخبرته.
واستكمل: “دخل عالم التدريس للأهالي كيفية التعامل في التربية المتطورة ومسايرة لتطور العالم مع تكوين شخصية مستقلة ناضجة بدون تحكم للأطفال والشباب حديثي السن مع طبعا الكادر الأخلاقي وعمل كورس بالتعاون مع أحد المدربين في مجال موازي”.
ورداُ على الانتقادات قال: “تقوم الدنيا ومتقعدش ليه هو أنت مش شيخ وكأن الشيخ حرام يشتغل وياخد فلوس برا مجال الدعوة، وإن النبي مثلا لما قبل الإسلام تاجر وهو كان بينشر أخلاقه بس كان مينفعش؟ وولا الصحابه اللي نشره الدين كخلفاء كان حاش لله بيعملوا حاجة حرام”.
واستكمل: “ليه يا عم الكورس غالي وكأنه ضربك على أيدك وأجبرك تدفع و تروح تحضر، وكأن كمان الكورسات الكتير اللي هو أخدها في مجاله واللي أنا شخصيا منها واحد ب ٣٠ ألف جنيه فهيدرس ويعلمك ببلاش مثلا وهو تدريسه هو مصدر دخله الوحيد”.
ردًا على اتهامه بالتجارة بالدين.. أمير منير: للأسف مفيش تعليم ولا معيشة مجانًا
وأوضح هيكل، انتو هتقدموا تنمية بشرية و نصب وكأن فلوس الدروس بآلاف اللي بمدافعها طول السنين دي مش نصب ورمي على الأرض بمنتهى الواقعية وانك تتعلم تربي صح و تدي مساحة لابنك وأنك تتعلم تطلع جيل مدرك ومنطقي وعارف يتعامل في صراعات الحياه على الأقل مع أهله وفي اختيار أصحابه واختيار مستقبله دة نصب ؟!”.
وأكد، “للأسف الغلط فينا كلنا لما ادينا حجم للنصابين ولما النصابين انتشروا ضيعوا حقول المحترمين صحاب المحتوى اللي زيه !! لمعلوماتكم انا مش هسيب بلد ولا مؤتمر ولا مكان اروحوا الا لما اسوق للناس اللي زيه لأن مجتمعنا محتاج الصادقين المتعلمين المتطورين”.
وأردف: “أشهروا كليبات وحفلات ومسلسلات و تابعوا الكوميديا السافلة وروحوا احضروا مسرحيات و اضحكوا وامشوا وراحت الفلوس ولما تتحط في علم مهم يفيد مستقبل اولادكم ثوروا “.
وبين: “من الآخر يا جماعة عاجبك روح، مش عاجبك صدقا ولا تديلوا اي حق يستهلك طاقتك ولا وقتك في التشهير بيه لان انت احق بوقتك من أي حد مش عاجبك محتواه أو خطواته في حياته “.
ووجه رسالة للمتابعين: “بالله عليكم خليكوا في حالكم ولما تجرب او تشوف حد جرب و أتأذى نبقى نتفاهم لكن متفضلوش تشيروا له فيديوهات و تقوله بتحبوه اوي ولما يشوف مصلحة بيته و أهله زيكم تقولوا متاجرة”.
واختتم كلامه: “بالمناسبة أنا اخر مرة تواصلت معاه كان من شهور عشان طقم الشياطين اللي هيطلعوا يقولوا المصالح المشتركة زي ما كتبتوا عن كل اللي قال فيه خير !! الله يصرف أذاكم وشركم وحقدكم عن كل ساعي”.
