الموزع أحمد إبراهيم يوضح حقيقة عودته لطليقته ياسمين عيسى (تدوينة)
في أول تعيلق منه على خبر عودته مرة أخرى لزوجته السابقة، نشر الموزع الموسيقي أحمد إبراهيم زوج المطربة أنغام، تدوينة نفى فيها ماتردد حول عودته لطليقته السابقة وأم أولاده ياسمين عيسى، حيث نشر تدوينة وضح فيه الملابسات التي حدثت.
وكتب إبراهيم عبر حسابه الرسمي بموقع التواصل الإجتماعي الشهير “فيسبوك”: ” قال النبي (ص)، مِنْ حُسْنِ إِسْلَامِ الْمَرْءِ، تَرْكُهُ مَا لَا يَعْنِيهِ، هي مش ام اولادي بعتتلك و قالتلك انفي الخبر على لسانها وانك غير مصرح ليكي تتكلمي عن حياتها الخاصة ؟ مش هي صاحبة الشأن؟”.
وأضاف: “وبعيد بقى عن صحة الخبر من عدمها لانها متخصش حضرتك ولا المتابعين لأن حياتهم فيها ما هو أهم اكيد .. مش المفروض لما صاحبة الشأن تنفي خبر وتطلب منك زي ما كتبتي خبر من غير ما ترجعيلنا تتاكدي لأنه أمر شخصي ليا واولادي وبيتي انك تنفيه على لسان صاحبة الشأن زي ما كتبتيه ولا سيباه ينتشر ؟ هيفرق معاكي صحة الخبر من عدمها في ايه هو انتي اللي هتتصرفي على أولادي ولا عايشين عندك في البيت على حسابك؟”.
الموزع أحمد إبراهيم: زوجتى أنغام لا تعلم بقصة القناة القطرية والمنتج هو السبب
وتابع: “حضرتك قاصده تحرجي ام اولادي وتستفز أهلها بالخبر ده انها رجعت بعد إعلانها طلاقنا بسبب زواجي (اللي انا بلغتها بيه واديتها حرية الاختيار)، ولا عاوزه تخلي الناس تتهمها انها كانت عاملة فيلم غاويه شهرة ولم تعاطف وفي الاخر رجعتلي؟ولا قاصده تحرجي زوجتي المشهورة وتحطي أسمها في الخبر عشان الخبر ينتشر ونبقى مسار للهري من شوية المرضى اللي في مجتمعنا الحشري ولا إنتي فاكره الناس طيبين اوي لو صح الخبر هيشوفها جدعة تصرفت بحكمه واحترمت خصوصياته مع أولاده وهيسيبوها في حالها”.
وأضاف: “ولا قاصدة تطلعيني انا بلعب وعاوز الم عليا الستات واعمل شو زي ما في أغبياء اتهموني رغم اني فضلت اني اداري خبر جوازي عن الإعلام شهور يعني مافيش اي نيه للشو إلى ان تسرب الخبر من جانب احد المقربين!، ولا قاصده تطلعيني ندمان على زواجي رغم ان اولادي مازالوا في بيتي في رعاية امهم في نفس شارع الستوديو بتاعي وبشوفهم واتطمن عليهم يوميا وبيقعدوا معايا اكتر ماكان بيحصل قبل الازمة؟؟”.
الموزع أحمد إبراهيم: الشعب المتدين بطبعه قال إنى تزوجت أنغام عشان محتاج قرشين (فيديو)
وأستكمل: “ليه مافيش احترام لبيوت الناس ؟ احنا لسه هسخن الناس تاني والاغبياء يرجعوا يقولوا ساب بيته وعياله وسرقته من بيته و الهجص والسفالة دي كاني عندي ٣ سنين!! مش كفايا ساكت على الكدب والتضليل من البداية ورفضت ادخل في خصومه مع ام اولادي والنتيجة ان علاقتنا اتحسنت كتير رغم حجم الأزمة اللي افتعلت من الإعلام، ايه علاقة ظهوري انا وزوجتي المشهورة كزوجين في برنامج باننا كمواطنين مش من حقنا ان حياتنا الخاصة تُحترم؟ ليه تشعل فتنة تاني بعد ما تحملت انا وزوجتي المشهورة التجاوزات عشان وعشان نعدي الازمه لان في اولاد والحمد لله مستقرين وسعداء”.
وقال: “واحدة في شهور عدتها وفي الرسالة بتقلك أنفي الخبر لان علاقتنا ممتازة يعني انتي عشان تلمي الناس عليكي تبوظي الدنيا هو الفيلم البلدي ده مش هيخلص!!، هل حضرتك هتجيب لي انا وأنغام حقنا من التجاوزات اللي في تعلقات الحشريين في البوست عندك او عند الناس اللي نقلت الخبر؟؟”
وإختتم: “لأخر مره متتكلميش تاني في امور بيتي من فضلك غير مصرح لك ولا لغيرك يا استاذه يا فاضلة تكتب او تتكلمي تاني عن حياتي الخاصة باي خبر سواء صح او غلط ده امر شخصي بحت مش المفروض ابرر او انفي او انزل تاكيد دي حياتي انا بس كفايه تجاوز بقى، نزلي بقا النفي على لسانها واتكلمي في حاجه ثانيه كفايه الخبر قعد له ٣ ساعات وانتشر وعمل الضجه اللي كنتي عوزاها كفايه من فضلك .. انا احتسبت ربنا في كل تجاوز في حقنا وفقد الامل في ذوق الناس خلاص .. شكراً”.
