تامر حسني يروى قصة طموح شاب: “مش عاجبك مكانك غيره أنت مش شجرة” (صورة)

روى النجم تامر حسني ، قصة طموح شاب شهدها خلال مشواره الفني، وذلك لجمهوره على صفحته الرسمية بموقع التواصل الاجتماعي “فيس بوك”.

وعلى غرار المعاناة التي شهدها تامر منذ حلمه بدخوله الوسط الفني، حتى وصوله إلى هذه النجومية، حكى قصة هذا الشاب الذي قارنه بنفسه في شبابه.

ونشر تامر صورة للشاب الذي شبه نفسه بالنجم، حيث ظهر فيها وهو ينظر إلى بورتريه معلق على الحائط لتامر حسني، وهو يطمح أن يكون مثله في يوم من الأيام، وصورة أخرى بها الشاب مع تامر حسني في إحدى حفلاته.

وعلق تامر على الصور قائلاً:”دايماً بحب أحكيلكم مواقف من واقع تجربتي.. من 10 سنين كان حاطط صورتي على الحيطة ومن غير ما أعرف كل دا لما شفته في الحفلة حسيت من رد فعله لما شافني أن أنا بمثلّه حاجه كبيرة وطلب يغني معايا”.

وأضاف: “وافقت فوراً لإن اللي في قلبه وصلني على طول عشان صادق، اللي عايز أقوله أن حبك وإخلاصك للحاجة بيجذبها ليك بجد زي ما حصل مع محمد كدا، الحقيقه أني بستغرب من بعض الأشخاص اللي نجحوا نجاح كبير أنهم ليه مش بيصدروا طاقة نجاح وأمل لجمهورهم ومكتفين بتغذية نفسهم بس”.

شقيق تامر حسني يروج لحفله اليوم بسلطنة عمان: “يمكنمكم متابعته لايف على هذه القناة”

وتابع:”أحنا كشباب في عرض أي لمحة أمل تطمنا في ظل عالمنا القاسي اللي مش بيرحم الضعيف.. أنا بقى عايز أيمن وكل شاب فيكم يشوف نفسه راجل قوي راجل ناجح في أي مجال هو بيحبه ويصدق أنه ممكن يوصل وميقولش مستحيل عشان حلمه يقربله و ينجذبله”. وأوضح:”والله يا شباب مفيش مستحيل بس أنت صمم وعافر وأهم حاجه متضحكش على نفسك ركز في أحسن حاجه أنت بتعملها، عشان في ناس للأسف بيكونوا شايفين غلط وبيجروا كتير ورا سراب ولو عملت اللي عليك للنهاية ولقيت أنك مش عارف توصل لحاجه عادي دور على حاجه تانيه بسرعة متقعدش تندب حظك، أكيد ربنا شايلك حاجة أحسن زي ما أنا كان نفسي أبقى لاعب كره وفجأة كل الأندية بيمشوني من غير سبب مع إني لاعب مش سهل”.

خائف على مستقبل شبابنا

وأستكمل:”بس عرفت بعد فترة أن ربنا كان شايلي حاجه أفضل ليا، وحق لا إله إلا الله أنا بكتبلكم من قلبي والإحساس دا زاد بعد ما بقيت أب بقيت خايف على شبابنا وولادنا في المستقبل بشكل كبير جداً مفيش مستحيل يا شباب”.  وأضاف: “أنا كنت أفضل أبص في صور عبد الحليم ودموعي تنزل عشان نفسي أغني وأمثل زيه وأنجح في الإتنين ويحبوني الجماهير في الوطن كله النهاردة لما أفلامي بتحقق أعلى إيراد في تاريخ السينما المصرية والعربية بفتكر إصراري على الوصول ساعتها ومشياني في الشوارع بالساعات لوحدي ارتب هعمل أيه وأتخيل نفسي وأنا الناس بتسلم عليا ومفيش في جيبي أصلاً أي فلوس أركب مواصلة”. وتابع: “بفتكر أزاي أخد قرار إني اتحول من شخص باصص على صورة فنان على الحيطة للفنان نفسه اللي صورته دلوقتي على الحيطة نشتغل ونجتهد ونغير يا جماعة ونطور من نفسنا بأيدك تعمل كل حاجة (مش عاجبك مكانك غيره أنت مش شجرة). وأختتم:”من الآخر كدا ومش جايز هو أكيد كلامي رساله لناس كتير فيكم بس الشاطر اللي هيفهم، ربنا ينور طريقكم ويفرح بيكم أهاليكم”.