بعد تكريم السيسي له.. هيثم السيد صاحب عربية الحواديت يعلن استقالته من “التعليم” بسبب الاضطهاد
تقدم هيثم السيد ، صاحب مبادرة وفكرة عربة الحواديت باستقالته من وزارة التربية والتعليم، على أثر تعرضه لاضطهاد من قبل المسؤولين على الإدارة التعليمية في الشرقية.
ونشر السيد عبر صفحته الشخصية على موقع التواصل الإجتماعي فيس بوك، حيثتات استقالته التي تقدم بها اليوم، بعد تعرض لكافة طرق الإضطهاد، خصوصا بعد تكريمه من قبل الرئيس ضمن المبادرات الشبابية، في مؤتمر الشباب الماضي.
وجاء نص منشور هيثم السيد على فيس بوك كالآتي:
“قررت اني أقدم استقالتي من وزارة التربية والتعليم… لما استقيل طبعا مش هتتوقف الأنهار عن الجريان.. ومش هتقلع العصافير عن الزقزقة.. ومش هيتجمد المطر في السحاب… لكن حابب أحكي التجربة عشان أوثقها وعشان كل فترة افتكر اني أخدت قرار سليم وافتكر برضه اني تقريبا اتأخرت في القرار ده. قررت استقيل من وزارة التربية والتعليم بسبب اني مضطهد.. حرفيا أنا مضطهد.. ولك أن تتخيل يامؤمن ان الاضطهاد زاد وتضاعف بعد تكريمي في مؤتمر الشباب اللي فات . وأكتر من مرة بشكل مباشر وغير مباشر بقه يتقال لي ” خلي التكريم بقه ينفعك ” ” خلي اللي كرمك ينفعك ” ” اتصل لنا بقه بالريس ” …علما بأني وأقسم بالله لحد اللحظة دي لسه حتي مانشرتش صورة التكريم”.
وأردف السيد في منشوره: “الاضطهاد مصدره متعدد داخل الوزارة معايا وبأشكال مختلفة…
أولا : توجيه اللغة الانجليزية بالادارة التعليمية اللي انا تابع لها… توجيه اللغة الانجليزية – وهاقول أسماء هنا عشان أكون محدد – متمثلا في اتنين من موجهي المادة واللي في الواقع والله عايز اعرف بسببهم هي ايه المعايير اللي بيتم علي أساسها اختيار موجهي المادة.. الاتنين دول وبلا ألقاب واحد اسمه ” علي جلهوم ” والتاني اسمه ” محمد بغدادي ” ..الاتنين دول عندهم فوبيا غير طبيعية من العمل التطوعي بتاعي.. مش عارفين يقتنعوا ان في حاجة اسمها عمل التطوعي و ان في حاجة أصلا ممكن تعملها من غير مقابل.. فهم عندهم عقيدة راسخة اني باتربح من عملي التطوعي لدرجة ان مرة / محمد بغدادي بيسألني وبيقول لي : هو انت بتاخد كام من اللي بتعمله ده ؟ ولدرجة انه مش مقتنع اني عادي باعمل كورسات مجانية لحوالي 1000من طلاب ثانوية عامة الغلابة وكان بيقسم بالله العظيم اني باتقاضي مبالغ من مراكز في القاهرة مقابل الكورسات دي”.
وأكمل هيثم السيد قائلا: “اما عرف محمد بغدادي اني باروح مستشفي 57357 لسرطان الأطفال كل يوم خميس.. كان بيتعمد زيارة مدرستي وانا مش موجود عشان يكتب في تقرير الزيارة اني مدرس مهمل وتارك الحصص علما بأن الحصص كان بتتحملها زوجتي وماضعش حصة واحدة علي طالب بالمدرسة ..ولولا ان مديرة المدرسة اللي باشتغل فيها مديرة مثقفة ومؤمنة باللي باعمله ودايما في ضهري ودايما بتساند ..كان زمان القولون بتاعي انفجر لكن هي اللي كانت بتصبرني بصبرها ونفسها الطويل، من سنة فاتت تعمد التوجيه انتدابي لمدة عام لادارة تعليمية تانية رغم توضيحي اني بانفذ مشروع مع طلاب مدرستي خاص بالقراءة التحليلية وتبسيط الأدب الانجليزي وكنت اشتريت كتب وخامات وأدوات تتجاوز ال 20 ألف جنيه وتعطل المشروع بسبب عدم قناعة التوجيه بجدوي ماأقدمه السنة اللي بعدها تعمد التوجيه انتداب زوجتي الشريك لي في المشروع لافساد سنة كاملة ثانية لان المشروع صعب فرد يتحمله وخسر المشروع عامين”.
السنة دي يعاود التوجيه مرة ثانية بانتدابي لمدرسة تانية ومن الكواليس عرفت انهم بيتعمدوا شغلي بجداول حتي لو علي ورق عشان مايكونش عندي فرصة اني اعمل اي مشروعات تنويرية فكرية داخل المدارس لاني هاكون مشغول بجدول وماينفعش اعمل غير اللي في الجدول.. لما مديرة المدرسة اعترضت قال لها نصا / علي جلهوم اللي المفروض انه الموجه العام للمادة : انت بتتكبري علينا بتكريم الرئيس.
مديرة المدرسة قالت له مش تكبر ده فخر وقالت له فيما معناه بتسأله : هو ده احترامكم لتكريم سيادة الريس واحترام الوزارة لمعلم من معلميها ؟!! للأسف رد عليها محمد بغدادي بكل ذوق وتربية وخلق بصفته رجل تربية وحلف ” بالطلاق ” ان المديرة متواطئة معايا ولها مصلحة في عدم حضوري”.
يذكر أن الرئيس عبد الفتاح السيسي، قد عددًا من النماذج المصرية الناجحة، وذلك على هامش فاعليات، ختام المؤتمر الوطني للشباب في دورته السابعة بالعاصمة الإدارية الجديدة.
ونجحت هذه النماذج، في تحطيم أرقام قياسية، والوصول إلى القمم في مجالاتهم، في رسالة منهم على أن المصري يستطيع مهما كانت الظروف، وهيثم السيد كان من هؤلاء المكرمين، حيث إنه نجح في إيصال فكرة التطوع إلى الأطفال، وساهم بشكل كبير في تثقيف الطفل عن طريق عربة الحواديت.
السيسي يكرم النماذج الناجحة في ختام مؤتمر الشباب (الأسماء)
