كعب داير على البنك.. عميل يشتكي”كريدي أجريكول” بعد رفضه تقديم رشوة لأخذ قرض (صورة)

اشتكى أحد عملاء بنك ” كريدي أجريكول مصر” يدعي ” عاصم درويش”، بسبب رفضه إعطاء رشوة مالية لموظف الاستعلامات بالبنك عندما أقدم على أخذ قرض من البنك.

وكتب درويش عبر صفحته الشخصية على موقع التواصل الاجتماعي “فيس بوك”، أن حساب شركته مفتوح لدي البنك منذ فترة طويلة فضلا عن حسابه الشخصي المفتوح لديهم منذ 6 سنوات، قائلا: “موظف البنك طلب إننا نعمل حساب باي رول للموظفين بما إننا كنا محتاجين ده وهو كان عنده تارجت يعمل دا، فقعد يزن عليا نجمع الموظفين والأوراق وخلصنا الدنيا، جه مرحلة موافقة الائتمان، ونزل موظف الاستعلام جه يزور الشركة وبعد ما صور المكان وخد الأوراق المطلوبة، وقبل ما يمشي طلب رشوة عشان يكتب تقرير كويس، ويدي موافقة أن حساب الباي رول الخاص بتحويل المرتبات يتفتح وأنا رفضت نهائي وراح كتب تقرير زي الزفت غير حقيقي، وعملت فيه شكوى وكلموني من البنك ومن الائتمان وأكدت الكلام وبعدها الموظف كلمني قالي هتقطع عيشي بلغتهم بردة بالمكالمة والكلام اللي قاله”.

وتابع درويش: ” في خلال الفترة دي حاولت أخد قرض بمناسبة إني بقيت عميل أوبيتم عندهم وهو قالي إنه متاح ليا، والموظف قالي على الأوراق المطلوبة وقالي كلها مسألة وقت، وأنا بناءً على كلامه اتصرفت في المبلغ لحد ما القرض ينزلي، ومن شهر أبريل لحد النهاردة الموضوع مخلصش، وكل شوية الائتمان يطلبوا أوراق زيادة واخلصها وبعدها طلبوا أوراق مش موجودة، ومش عارف أحلها إزاي وبقيت بين نار إني عاوز أسدد الفلوس اللي اتصرفت فيها وما بين أن القرض بقا مستحيل ينزل، وبقيت رايح جاي على البنك ومش عارف أعمل آيه”.

واستكمل: “في الآخر موظف خدمة العملاء في البنك، قالي من الآخر إدارة الائتمان مش هتمشيلك القرض بسبب الشكوى اللي قدمتها ضدهم لما الموظف بتاعهم طلب رشوة والموضوع سمع عندهم، وأي حاجة متعلقة بيك هيوقفوها لأن اسمك وبياناتك عليها الحالة بتاعة الرشوة والباي رول ولحد النهاردة حساب الباي رول لسه مخلصش ولا القرض خلص”.