“فصبر جميل”.. أول تعليق من خطيبة هيثم أحمد زكي بعد وفاته (تدوينة)
في أول تدوينة تنشرها بعد رحيل هيثم أحمد زكي، قالت إنجي سلامة خطيبة الفنان الراحل: “انا بكتب الكلام ده وانا مش قادرة اكتب حاجة بس قلت ممكن يكون فيه اي حاجة تفيد أي شخص تكون في ميزان حسنات هيثم وانا بفكر نفسي قبلكم والله”.
واضافت سلامة: “كلنا بيعدي علينا اختبارات في حياتنا وممكن نحس انه اختبار كبير اوي و صعب بس ربنا قال ( الذين إذا أصابتهم مصيبة قالوا إنا لله وإنا إليه راجعون أولئك عليهم صلوات من ربهم ورحمة وأولئك هم المهتدون).
ووجهت إنجي رسالة: “يعني انا كلي لله ورجعاله علشان الواحد يفتكر انه في الاخر ملوش غير ربنا وكلنا في الاخر راجعين له مهما قلوبنا تعلقت بأشخاص أو أشياء، سيدنا يعقوب لما قالوله ان ابنه سيدنا يوسف توفي قال: (فصبر جميل والله المستعان على ما تصفون) الصبر الجميل مش معناه ان مفيش حزن هو كان حزين جدا على يوسف وأخيه.. بس يكون فيه رضا… في ناس وقت البلاء ممكن تقول ليه يا رب عملت فيا كده أو اشمعنى انا ويقول انا صابر بس ده مش معنى الصبر اني اكون معترضة على قضاء الله”.
وأضافت إنجي: “دايما خلي شكوتك لله واتكلم معاه من قلبك ربنا سميع قريب ودود مجيب زي ما سيدنا يعقوب قال كمان ( إنما أشكو بثي وحزني إلى الله وأعلم من الله ما لا تعلمون)، أي ابتلاء أنت بتعدي بيه دلوقتي ليه اخر وليه جزاء وهتشوف جزاء الصبر ده في الدنيا والاخره بس خليك راضي بقضاء الله ربنا قال: ( سيجعل الله بعد عسر يسرا) ده وعد.
واستكملت: “الصبر معناه اني راضية وعارفة ان في جزء كبير اوي وفي خير إنما يوفى الصابرون أجرهم بغير حساب ( والصابرين في البأساء والضراء وحين البأس أولئك الذين صدقوا وأولئك هم المتقون)”، وقت البلاء ممكن تلاقي ناس كتير حواليك ربنا بعتهوملك يهونوا عليك لكن مفيش حد في ايده حاجة بجد غير الله ومحدش هيبقى حاسس بوجعك غيره (ليس لها من دون الله كاشفة) (أمن يجيب المضطر إذا دعاه ويكشف السوء)، (إن يمسسك الله بضر فلا كاشف له إلا هو ) ربنا أعلم بالخير ليك وبالأصلح ليك ومع البلاء ربنا بينزل لطف وصبر يخليك تتعرف على ربنا بشكل جديد يمكن مكنتش تعرفه بيه لولا البلاء ده.
وأضافت أم سيدنا موسى لما ألقت بابنها في الماء ربنا ربط على قلبها وصبرها علشان هو أعلم بالخير وصبرت وربنا جمعها بيه تاني (وأصبح فؤاد أم موسى فارغًا إن كادت لتبدي به لولا أن ربطنا على قلبها لتكون من المؤمنين).. يمكن ربنا ميجمعكش باللي بتحبه في الدنيا لحكمة هو يعلمها وهو العليم الحكيم لكن يجمعنا بيهم في الجنة في الحياه الحقيقية اللي مفيهاش ولا حزن ولا تعب ولا مرض ولا فراق ( ولهم فيها أزواج مطهرة وهم فيها خالدون”.
واختتمت إنجي حديثها قائلة: “اي حد فقد شخص عزيز خليك عارف ان مش دي النهاية هو بس انتقل قبلك بشوية لحد ما انت كمان تخلص رسالتك في الأرض ومهما طال الوقت فهو برده قصير في الاخر هنقول ده اكنه كان يوم او اقل كمان “يوم أو بعض يوم” “وما أمر الساعة إلا كلمح البصر أو هو أقرب”يا ريت كلنا نعمل حساب اليوم ده ونبتدي نتعرف على ربنا بأسمائه وصفاته وجماله علشان يوم لما يجلنا اليوم ده يبقى أسعد أيام حياتنا ( الذين تتوفاهم الملائكة طيبين يقولون سلام عليكم ادخلوا الجنة بما كنتم تعملون ) ( قيل ادخل الجنة. قال يا ليت قومي يعلمون بما غفر لي ربي وجعلني من المكرمين )، “أي حد اتغير بسبب هيثم أو أثر فيه يا ريت ياخد نية ان أي عمل خير بيعمله أو تغيير يكون في ميزان حسنات هيثم وادعوله دايما ويارب يجمعنا بكل احبابنا في الفردوس الاعلى بدون سابقة عذاب ولا عتاب ولا حساب”.
