تامر حسني ينفعل على شاب طلب من صديقه خلع الـ”كمامة” بسبب تنافيها مع الرجولة (صورة)
سرد النجم تامر حسني، أحد المواقف التي جمعته بشاب يستهتر بالتعليمات الصادرة من وزارة الصحة، وينصح صديقه بخلغ الكمامة التي يرتديها خوفًا من إصابته بفيروس كورونا المستجد.
وقال تامر عبر صفحته بـ”فيس بوك”: “أنا شوفت موقف قدامي صدمني مش قادر محكيهوش.. شوفت واحد بيقول لصاحبه، ياد شيل الماسك ياد وإسترجل، طب هو عشان في وجهة نظر حضرتك يسترجل فيكون سبب في موته وموتك وضرر كل من حوله معقول كل دول العالم المتطوره مؤمنه بالوقايه دي وإحنا بقى اللي عندنا الفهلوه والمفهوميه كلها اللي بيتريقوا على الوقايه دي”.
وأضاف: “أكيد مسكتلوش وفهمته على قد ما أقدر و فهمته، يا سيدي لو حتى أنت من الناس اللي بتقول دا وهم مش هتخسر حاجه لما تاخد كوكب الأرض بالكامل على قد عقله، وحافظ على نفسك الكام يوم دول، بس المشكله إن في منه كتير بيفكروا زيه، عشان كدا كلنا لازم نتكلم كتير مع كل الناس ولو النزول للضرورة القسوه فنلتزم بكامل تعليمات الوقايه”.
واستكمل: “ارجوكم أتكلموا كتير مع الناس عشان نوعي أي حد مش حاسس بالخطورة، لازم نلتزم ونقعد في البيت 14 يوم يا ناس عشان نسيطر على إنتشاره، وميتحولش لوباء الصين، انتصروا على الوباء لما إلتزموا ومنزلوش الشوارع نهائي ولو في ناس شغاله بيوميات لازم توصلهم يومياتهم، لحد عندهم من باب الرحمه عشان ربنا يرحمنا وأنا بدأت بنفسي و عملت كدا وأكتر من كدا”.
وأوضح: “يا جماعه دا إن شاء الله إختبار من ربنا هننجح فيه لو أتعاملنا معاه صح وبمنتهى الرحمه والتعب وارد يحصل لأي حد فينا و هيخف إن شاء الله زي ما آلاف خفوا و خفوا من امراض أكتر من كدا بمليون مره ودا مش أول وباء عالمي يمر علي البشر و غيرنا مر بأكتر منه”.
واختتم حديثه: “دي فرصه للي مقصر في حق ربنا إنه يقرب منه تاني اهو دا جانب ايجابي لازم نشوفه لازم نشوف ان الصعوبات دي بتشيل من علينا كتير عند ربنا وربنا هيعوضنا خير عنها ان شاء الله ومننساش ندعي ربنا كتير لأنه هو خالق كل الكائنات دي و قادر إن يوقفها بمشيئته”.
