عاجل.. نائب مدير مستشفى النجيلة للعزل يُعلن إصابته بفيروس كورونا

أعلن الدكتور محمد علام نائب مدير مستشفى النجيلة، أول مستشفى للعزل الصحي لمصابي فيروس كورونا في مصر، إصابته بكوفيد19.

وقال علام عبر صفحته الشخصية على موقع التواصل الاجتماعي فيس بوك: “صباح الخير عليكم وكل أيامكم بخير، ناس كتير انتقدت أن الفترة اللي فاتت وقت كتير بقضيه على فيس في بوستات توعية وردود على الناس وبتسأل أمال فين شغلك ومضيع وقتك.. للأسف في حاجه مكنتش حابب أتكلم فيها دلوقتي عشان مبقاش سبب ذعر وقلق للناس اللي بطمنهم باستمرار ولأنها حاجة متوقعة لكل طبيب وكل لما الفترة تطول فرص حدوثها بتزيد لكن في ناس ظلمانى ولازم أوضحلهم حاجة مهمة وأنا مش زعلان منهم على فكرة”.

وتابع علام: “بس الحمد لله اتشخصت كوفيد ١٩ إيجابي من يوم ٦-٤ أنا كنت عارف من أول يوم إنى معرض لكده وراضي ده شغلى وأنا مش زعلان ولا كنت خايف والحمد لله هتكمل على خير وحالتى اتحسنت كتيير وإن شاء الله قريب أتحول سلبى وأروح. دي الحقيقة اللي كنت مخبيها باختيارى، أنا اللى طلبت محدش يعرف عشان أهلي ميقلقوش اللي بيعدوا الأيام وهما عارفين اللي أنا  فيه. وأسف أنى اتاخرت كل ده محبتش أعرفهم غير لما أكون بقيت كويس”.

عاجل.. وفاة عامل في “نستله” بفيروس كورونا.. والشركة تطالب العمال بالتكتم (بيان)

وأوضح نائب مدير مستشفى النجيلة للعزل: “واسف للناس اللي بطمنها باستمرار انى مقلتلكمش بس ان شاء الله هتعدي التزموا باللى بننصح بيه، اللى حصل ده وارد لأي طبيب ولا يلام عليه أحد نهائيا ومش معرض ليه أي واحد ملتزم في بيته أو في الشارع، ده بسبب إجراءات طبية معينة وكلنا عارفين الخطر اللي احنا فيه وراضيين وده حسابه عند ربنا مش عاوزين حساب من بشر فيه، ده واجبنا أولا وأخيرا وشرف ما بعده شرف لكل طبيب”.

وشدد علام بالقول: “بشكر  كل زميل ليا دكتور أو تمريض أو عامل وقف جمبي في الظروف دى عمرى مهنسالكم اللى عملتوه، وبشكر كل واحد كتب كلمة حلوة في حقى على البوستات، أنا أسف كنت بستغلكم أنى أخد منكم طاقة إيجابية أعدى بيها الفترة دي، والحمد لله كلامكم كان ليه مفعول سحر، الدعم النفسي شيء رائع. المرض حقيقي وأعراضه حقيقية والناس بتخف حقيقي، رجاء ركزوا في اللى تقدروا تعملوه وهتعدي”.

واختتم تصريحاته بالقول: “والله العظيم بتعدى لو التزمنا مرحلة الخطر عندي عدت وأنا دلوقت في مرحلة الشفاء التام وإن شاء الله أيام وأروح بيتى إجازة صغيرة وهتبدأ الخناقة مع زوجتي وأهلي علشان أرجع تانى”.

أحدهم فني معمل بالمستشفى العام.. كفر الشيخ تسجل إصابتين جديدتين بفيروس كورونا (خاص)