صبري فواز يروي موقف كوميدي مع إحدى المعجبات: “قالت لمراتي ده فنان يعني بتاعنا كلنا” (فيديو)
واجه الفنان صبرى فواز، مجموعة من الأسرار والكواليس فى حياته، من “شيخ الحارة”، فى البرنامج الذى تقدمه المخرجة إيناس الدغيدى، على قناة القاهرة والناس، حيث أكد صبرى فواز أنه من رواد “وسط البلد”، ويجلس في مقاهي هناك من فترة طويلة.
كما كشف صبرى فواز، أن الثورة أجهضت فيلم كان سيقوم ببطولته، قائلا، “كامل أبو على وخالد يوسف كانوا عاوزينى فى بطولة فيلم.. كلمونى فى يوم روحتلهم، واتفقنا على الفيلم يوم 24 يناير 2011 بس الثورة قامت”.
وذكر فواز واقعة، حينما قال له منتج “أنت مين” قائلا، المنتج ده كان شغال شغلانة متواضعة.. حصل خلاف بينا وكنا فى مدينة الإنتاج .. كان شايفنى ممثل صغير ومش معروف أوى .. قالى انت مين .. قولتله اللى مايعرفش الدهب الفالصو من الحقيقي يروح يقف في شارع عبد العزيز .. وإسماعيل عبد الحافظ وعبد الرحمن أبو زهرة أنقذوه منى وشدوني .. ومابقاش ينتج حاليا”.
وتابع فواز، مابخافش من المنتجين، بس في منتج كل الناس عندها مشاكل معاه وليهم عنده فلوس، طلبني في شغل ورفضت وقولتله “شكرا”.
صبري فواز لـ”شيخ الحارة”: “أنا عيني زايغة.. ومش بحب أجامل نفسي”
وعن أزمته مع وزير الثقافة الأسبق فاروق حسنى، قال فواز، مسرحياتى كلها بتنتهى نهايات مسرحية، في يوم فجأة لقيت عمل مسرحى لي توقف بلا سبب، فكتبت أن المشكلة مش في الابداع زي ما قال الوزير ولكن فى إدارة الأزمة، والسيد فاروق حسنى كان بيقول أنها أزمة إبداع، بدليل أن المسرحية كانت متكلفة 300 جنيه بس، وقولتله كده في معرض الكتاب”.
كما كشف صبرى فواز واقعة جمعته بزوجته قائلا، فى معجبة كانت بتبصلى فى مطعم ولما قربت قالت لمراتي “إيه يا مدام ده فنان يعنى بتاعنا كلنا”.. بس أنا حبيت الجملة جدا.
صبري فواز: “مبحبش محمد صبحي.. وهيفاء وهبي اتعلمت التمثيل”
وبتأثر شديد، قال فواز، مرت 5 سنين سيئة جدا فى حياتي.. اللى حصل من 2012 لحد 2017 .. كل القريبين ماتوا ورا بعض فجأة . مات 8 من أقرب الناس ليا .. ومافهمتش ايه اللى بيحصل .. مافقتش من الحزن 5 سنين ورا بعض .. وقولت قلبى من الحزن كرمش.
واختتم صبرى فواز الحلقة متحدثا عن كورونا، قائلا، الارهاب أسوأ من الكورونا، وأنا فى الحظر ينتابنى الخوف والقلق لأنى عامل “دعامة” لكن بستغل الوقت فى القراءة والمشاهدة، وأتمنى تمر الأزمة لأنى خايف على حبايبي والقريبين منى وعلى الناس عموما”.
