كريم فهمي: “زوجتي سبب نجاحي في ونحب تاني ليه.. وكوميديا رجالة البيت أقل من المتوقع” (حوار)
استطاع بموهبته أن يقنع الجميع به، بالرغم من بداياته في مجال آخر بعيد كل البعد عن التمثيل، فبدأ حياته كطبيب أسنان ثم اتجه إلى التمثيل والكتابة وأطلق العنان لمخيلته لترسم مجموعة من الحكايات، جعلته من أنجح الكتاب في الفترة الحالية، وعمل على أدائه بشكل تقني ومن منظور مهني، بجانب وسامته التي خطفت قلوب الفتيات، وبالموسم الرمضاني الحالي قدم كريم فهمي مسلسل “ونحب تاني ليه” وظهر بشخصية مراد السويفي التي استطاع بها أن يترك بصمة بذهن الجمهور، فكان لـ “القاهرة 24” معه هذا الحوار:
كيف جاء ترشيحك للعمل وما الذي جذبك للمشاركة به؟
“التنفيذ بدأ من شركة سينرجي وكان أول حد اتفق على المسلسل النجمة ياسمين عبد العزيز، ولكن لسة مكانش حصل اتفاق على البطلين، وبعدها كلموني وقعدت مع عمرو محمود ياسين وحسام شوقي والمخرج مصطفى فكري، وقرأت السيناريو وعجبني جدًا ووافقت عليه”.
هل وافقت على السيناريو بمجرد قراءته أم أخذت مهلة للتفكير؟
“في البداية لم يكن السيناريو كاملًا، وكان في مرحلة المعالجة الدرامية، وكان في تردد بسيط عندي الأول، لإني بطبعي متردد، ولكن بعد ما قعدت مع حسام شوقي وعمرو محمود ياسين والمخرج مصطفى فكري، وافقت على طول لأنهم كانوا بمثابة عوامل اطمئنان لي”.
“ونحب تاني ليه” بداية تعارفك على ياسمين عبد العزيز وتارا عماد أم تجمعك علاقة بهم من قبل؟
“أنا وياسمين كنا نعرف بعض قبل المسلسل، ولكن مش صحاب اوي، ولكن من بعد المسلسل بقت صاحبتي وأختي، وتارا مشتغلتش معاها قبل كدة، ولكن هي كانت اشتغلت مع أخويا، وعمري ما كنت قابلتها، ولكن سعيد بالعمل معها”.
كيف كانت كواليس “ونحب تاني ليه”؟
“حبيت كاست المسلسل كله، وحبيت الشغل معاهم جدا، وكواليس المسلسل الناس كلها كنا مبسوطين، وأنا وياسمين وشريف منير محسناش بالمسلسل ولا صعوبة التصوير، وكنا زعلانين إن المسلسل خلص، والناس كلها كانت بتحب بعض”.
ما شعورك بعد مشاركتك بطولة المسلسل بجانب شريف منير وياسمين عبد العزيز وسوسن بدر؟
“هم أساتذة وقامات كبيرة وشرف لي الوقوف أمامهم والتمثيل بجانبهم، وليا الشرف إني أشارك ياسمين عبد العزيز وشريف منير بطولة المسلسل”.
حدثنا عن استعداداتك لمذاكرة شخصية “مراد السويفي”؟
“التحضيرات كانت بتبقى عن طريق مذاكرتي مع نفسي ومع مدير أعمالي، وبأخذ رأي مراتي على طول، وأهم حاجة مناقشتي مع عمرو محمود ياسين، لأنه هو اللي شايف وعارف المسلسل رايح فين، خاصًا إن الحلقات مكانتش كلها مكتوبة”.
وافقت على المسلسل قبل انتهاء كتابته.. ألم تتخوف من حدوث أية تغييرات به؟
“أنا كنت واثق في عمرو محمود ياسين، وهو حكاه وقدمه زي ما صورنا، وكنت مطمئن، ولم أتدخل في السيناريو”.
كونك ممثلا وسيناريست، كيف حكمت على سيناريو المسلسل قبل الموافقة عليه؟
“حكمت عليه عن طرية الحوار، لإني بحب الحوار اللي بيكتبه عمرو محمود ياسين من أيام مسلسل “نصيبي وقسمتك”، ولما قرأت الحلقات الأولى عجبتني جدًا، بجانب المناقشات اللي كانت بيني وبينه، وعمرو مؤلف فاهم وشاطر وبيريح الممثل لما بييجي يتناقش معاه، وعنده منطق لكل حاجة هو بيكتبها”.
رجع الصدى على السوشيال ميديا كان أغلبه إيجابي.. فما رد فعلك؟
“بشكر ربنا إنه كان مشاور على المسلسل وحققنا نجاح كبير وإن شاء الله يستمر لنهايته، لإن كل واحد عمل دوره بأقصى مجهود، حتى لو حد دوره كان صغير نفذه بالشكل المطلوب، ومبسوط جدًا برد الفعل على شخصية مراد السويفي، وإن مجهودي ربنا كلله بالنجاح”.
نظر البعض إلى شخصية مراد السويفي بأنها خيالية ومثالية للغاية.. ما تعليقك؟
“مراد السويفي مش مثالي، هو راجل كان بيحب ومخلص جدا وهو ده الجانب المثالي اللي فيه، ولكن عنده عيب زي باقي الشخصيات، وعيبه إنه راجل غيور جدا وده عيب كبير فيه جدا، وبالتالي مش مثالي”.
هل رومانسية المسلسل أقرب للمسلسلات التركي مثلما رآى البعض أم لا؟
“مكنش في دماغنا المسلسلات التركي أو الهندي، وعمرو محمود ياسين كل حاجة بيكتبها بتكون بالمنطق، على العكس الهندي بشوف إنه مش بيبقى فيه منطقية، وأنا دائمًا انحاز للمؤلف، وشايف إن إحنا عندنا مشاهد قريبة شوية بالرومانسية التركية، ولكن المهم إن رومانسية المسلسل عاجبة الناس”.
هل هناك موقف معين بكواليس “ونحب تاني ليه” لن تنساه؟
“دائمًا كنا بنضحك وخاصًا لما كان يحصل موقف مضحك بيني وبين ياسمين عبد العزيز أو إسلام جمال، مكنتش بقدر أسيطر على نفسي، ومكناش بنعرف نبص في وش بعض أنا وياسمين من كتر الضحك”.
هل تأثرت ظروف تصوير المسلسل بشكل كبير بسبب كورونا والحظر أم لا؟
“الموضوع كان صعب جدًا، وكنا بنحاول نمشي قبل الحظر، أو بيبقى معانا تصاريح، ودايما كنا بنتبع الإجراءات الاحترازية، ونحرص على تعقيم اليد كل دقيقتين، ونسيب مسافة متر بين كل شخص والتاني”.
إلى أي مدى شخصية مراد السويفي تشبه شخصيتك الحقيقية؟
“مراد السويفي يشبهني بنسبة كبيرة، ولكن هناك بعض الاختلافات فهو شديد الثراء، ويشبهني في الغيرة ولكنه يغير بشدة أكثر مني، وبحب مراتي جدا، ومراد السويفي قريب مني جدا، وهو أكثر شخصية ارتحت فيها وتعتبر “الكومفرت زون” بتاعي، على عكس لما بقدم شخصية زي “كرم” في مسلسل الحساب يجمع، بتتطلب مني مجهود تاني خالص”.
هل هناك دور آخر بالمسلسل كنت تتمنى تجسيده بدلًا من شخصية مراد؟
“نهائيًا لإني بحب مراد السويفي جدًا وبيبان على الممثل إذا كان مرتاح في الشخصية ولا لأ، وأنا توحدت مع الشخصية لدرجة إني لما كنت بشوف عبد الله في بيت غالية وأنا بتفرج في البيت كنت بتعصب”.
بعد نجاح المسلسل، أهناك نية لتقديم جزء آخر؟
“مجتش سيرة، ولكني أحب أكرر التجربة مع ياسمين وشريف منير وعمرو محمود ياسين وكل الكاست، إذا كانت نفس التجربة بجزء ثاني، أو حتى تجربة جديدة ومختلفة، ولكن معتقدش إن ممكن يكون في جزء ثاني، إلا أن كل شيء وارد”.
كيف تعاملت زوجتك مع اهتمامك بغالية في المسلسل وهل كانت هناك غيرة؟
“من أهم أسباب نجاح شخصية مراد السويفي مراتي، ولما كنت بفكر معاها في أي مشهد، دائمًا ما كانت تنصحني وتقولي بص في عين غالية بطريقة معينة، طب ايه رأيك لو عملت كدة، ومراتي من أهم الداعمين ليا في حياتي، وفي كل خطوة في المسلسل كانت جنبي وفي ضهري، حتى الملابس الخاصة بالشخصية نزلت واختارتها مع استايلست المسلسل دنيا عبد المعبود”.
ما الأعمال الآخرى التي تشاهدها هذا العام؟
“مش بقدر أشوف كل حاجة، ولكن بمر سريعًا على بعض الأعمال، زي رجالة البيت و100 وش وشوفت حلقتين من الاختيار، ومقدرتش أشوف حاجات كتير علشان التصوير”.
حصد مسلسل “رجالة البيت” على موجة من التعليقات السلبية.. تتفق أم تختلف مع ذلك الرأي؟
“نقدر نقول إن أحمد فهمي وأكرم حسني يقدروا يعملوا أحلى من كدة، بس ده مش معناه إن المسلسل وحش وده ظلم كبير، والمسلسل مش وحش للدرجة دي، ولكن مش بمستوى الواد سيد الشحات أو ريح المدام أو الوصية، ولكن برضو فيه حاجات كتير بتخليني أضحك بصوت عالي، وأنا شايف إن المسلسل نجح ولكن مش بالمستوى المطلوب لأحمد وأكرم، وفي النهاية دي أذواق لإن الكوميديا مش شرط تعجب الناس كلها”.
في وجهة نظرك.. مسلسل “ونحب تاني ليه” حقق النجاح المرجو؟
“المسلسل نجح بشكل كبير، خاصًا أنه بينافس بجانب مجموعة كبيرة من الأعمال الناجحة، لإن الموسم ده فيه مسلسلات حلوة كتير، والأفضل إننا ننزل في موسم قوي وننجح على عكس لو الموسم ضعيف وحققنا نجاح”.
بعد مشاهدتك لأكثر من مسلسل هل هناك عمل كنت تتمنى المشاركة به؟
“كنت أتمنى المشاركة في مسلسل الاختيار بشكل كبير، بس للأسف كنت مطالب إني أكون بذقن من أجل شخصية مراد، وبالتالي كان صعب إني أظهر في الاختيار، وبالفعل اتعرض عليا ولكن معرفتش بسبب الذقن”.
ما رد فعلك على الجزء الرابع من حكايات بنات؟
“لم أشاهده ولكن دايمًا الأجزاء الثانية والثالثة والرابعة مظلومة، ومش شرط حلوة أو لا، لأن دايما الناس بترتبط بالجزء الأول، وبالنسبالي حكايات بنات بدين ليه بشكل كبير بعد ربنا، وأنا متحيز للمسلسل حتى لو اتعمل منه أكثر من جزء”.
احكِ لنا عن فيلم “ديدو” وشخصيتك به
“انتهينا من تصويره، ولكنه مازال في مرحلة الجرافيكس، ولسة قدامنا شوية، والفيلم بيدور حول “عقلة الإصبع” وينتمى لنوعية المغامرات الممزوجة بالكوميديا، وبخاطب به الكبار والأطفال”.
مسلسل “ملاك” انتهيت من تصويره أم يبقى به الكثير؟
“صورنا أسبوعين ووقفت تصويره من أجل تصوير “ونحب تاني ليه”، ولكن قريبا سنستكمل العمل به”.
