بدأت بـ”استغاثة حناطة” وانتهت بـ”فرمان بيبو”.. القصة الكاملة لخناقة تركي آل الشيخ وعضو إدارة الأهلي
شهدت الساعات القليلة الماضية، تفاقم أزمة محمد سراج عضو مجلس إدارة النادي الأهلي، وتركي آل الشيخ رئيس الهيئة العامة للترفيه بالمملكة العربية السعودية، بعدما كتب الأول منشور عبر حسابه الرسمي على موقع “فيس بوك” يهاجم فيه الثاني بشأن مشجع للأهلي يدعى حناطة.
استنجاد حناطة
بدأت الأزمة بنشر عمرو محمد فريد المشجع الأهلاوي الشهير بـ”حناطة” منشور عبر حسابه الرسمي على “فيس بوك” يستنجد فيه من مرتضى منصور رئيس الزمالك حيث كتب: “أنا المواطن المصري عمرو محمد فريد .. مشجع أهلاوي .. تم تهديدي من مرتضي منصور وبعض اللجان الإلكترونية وتهديدي أنا واسرتي وشتميه من اقذر الشتائم، وهما طلبوا مني فيديو إعتذار رسمي ليهم علشان ينزل على كل البيدجات بتاعتهم علشان يوقفوا التهديدات ومكانش قدامي غير الحل دا فكان إجباري اني اعمل الفيديو دا واعتذر ليهم، بتمني من المسؤولين في مصر انهم يقفوا جمبي لاني بجد محتاجهم جمبي الفترة دي ومحتاج تدخل من الجهات في مصر لإيقاف هذه التهديدات لي ولأسرتي، ياريت كل الناس تقف جمبي أنا محتاجكم وأنا طول عمري أهلاوي وعمري ماهكون مشجع غير للنادي الأهلي .. وبتمنى المساعدة من الجهات في مصر ليا ولأهلي لإيقاف هذه التهديدات الموجه لي ولأهلي والأهلي فوق الجميع”.
رد محمد سراج
رد محمد سراج عضو مجلس إدارة النادي الأهلي على تصريحات عمرو محمد فريد بأنه سيقف معه وطالبه بإرسال رقم هاتفه للتواصل معه والدفاع عنه، حيث قال سراج: “للأسف بقينا في أجواء يعلم بها ربنا لكن متقلقش من أي حاجة وأي حد من دول ولا يسوى حاجة، ابعتلي رقمك يا عمرو”.
ونشر تركي آل الشيخ رئيس هيئة الترفيه السعودية مالك نادي بيراميدز السابق، ومالك نادي ألميريا الإسباني الحالي، فيديو يؤكد من خلاله أن عمرو فريد ضمن اللجان الإلكترونية التي يستخدمها النادي الأهلي ومجلس إدارته من أجل الهجوم عليه.
محمد سراج يصف مرتضى منصور بـ الفيروس العجوز وتركي آل الشيخ بـ العيل المستجد
عضو إدارة الأهلي لم يكتفي بتعليق الدعم للمشجع، ولكن كتب عبر حسابه الرسمي فيس بوك: “بعيد عن الكورونا ربنا يحفظنا ويسلمنا منها جميعاً في فيروس عجوز موجود من زمان في قطاع الرياضة في مصر وفي فيروس تاني عيل لسه مستجد من الخارج الفيروسات دي بتنشر فتن وقرف ومشاكل طول الوقت في الرياضة وبين الناس وبين بعض وبين أكبر جمهورين في مصر، اللي أنا واحد مرضاش بأحداث أي نوع من أنواع الفتنة بينهم بأي شكل من الأشكال إحنا في النهاية ولاد بلد واحدة نختلف اه نهزر مع بعض اه لكن تطاول وأذى ده منبوذ ومرفوض بالنسبالي من الجانبيين، المشكلة أن الفيروسات دي مختلفة عن الكورونا في حاجة وهي أن لها علاج بس العلاج لازم يجي من الدولة، ويكون جذري الدولة اللي أنا بحترمها وبقدرها عشان محدش يزايد عليا أنا ابن مؤتمر الشباب ودايماً بكون فخور بده وظهوري الأول هناك في 2016 وعرضي لأفكاري كان دفعة ونقلة ليا في أمور تانية كتير مؤتمر شباب مصر اللي كله طموح وتفاؤل وفكر ونقاء مش أجواء عشوائية وفتن وبلطجة تعوق الواحد عن أهدافه وطموحه الحقيقي لرفعة بلده وناديه المفضل اتمني يكون في مستمع لأن فاض الكيل اللهم بلغت اللهم فاشهد”.
الخطيب يمنع مجلس الأهلي من الرد على تركي آل الشيخ
تركي آل الشيخ يثبت تواجد “حناطة” ضمن لجان الأهلي التي تهاجمه
ونشر تركي آل الشيخ رئيس الهيئة العامة للترفيه بالمملكة العربية السعودية، فيديو يحمل تسجيل صوتي، لـ الشخص ذاته وهو يتفق مع آخر للرد على حديث تركي آل الشيخ وعلق عليه ذاكرا كافة بياناته الشخصية.
تركي آل الشيخ يصف محمد سراج بـ”الهلفوت”
موقف سراج استفز المسؤول السعودي البارز، ما دفعه للرد عبر حسابه الرسمي على موقع التواصل الاجتماعي فيس بوك: “هوا مين الهلفوت ده محمد سراج الدين؟ ايه موقعك من الاعراب بس قبل مرد عليك يا هلفوت؟”.
محمد سراج لـ”تركي آل الشيخ”: “أبويا حارب في 73 معرفش أبوك كان بيعمل أيه ساعتها” (صورة)
محمد سراج يرد على تركي آل الشيخ: ملقتش حد يربيك
واستمر عضو الإدارة الحمراء في موقفه ليقوم من جديد بالرد على آل الشيخ. قائلا: هو أنا متربي وهادي الحمد لله ودي نعمة ربتني عليها والدتي الأستاذة الجامعية ووالدي وهو لواء مدفعية سابق في الجيش المصري بس افتكر أنه كان علمني كمان ان الكرامة دي أعلى وأهم صفات الإنسان وأن عمري ما أقبل أي تجاوز في حقي، أشفق عليك حقيقي لأنك ملقتش حد يربيك تربية سوية أو يعلمك أن مش كل حاجة المظاهر والشو والهبل اللي بتعمله ده اللي خلاك مسخة أمام العالم كله في قيم ومعاني واصول أهم وأسمى من كده بكتير بس أنت معذور متعرفهاش بحمد ربنا أني اتربيت كده، وأنا مش بشوفك يا تركي آل شيخ من أول يوم غير واحد ناقص وجاهل وهفضل أشوفك كده على طول وعلى فكرة أنت مش كاسر عيني وأنت عارف كده كويس ولا عمرك هتقدر في أحلامك حتى تكسرها ولا أنت ولا اتخن تخين”.
تركي آل الشيخ: ميشرفنيش رئاسة الأهلي الشرفية
بعدها عاد آل الشيخ للرد عبر حسابه الشخصي على موقع التواصل الاجتماعي “فيس بوك” قائلا: “أرجع أسال هوا أنت مين عشان أكسر عينك؟ مالكش أي قيمة، بعدين إذا أنا بحب الشو على كلامك على الأقل بدفع حق الشو الي بعمله.. مش زيك هارينا بابي ومامي وفي الأخر ناجح بفلوسي أنا ودعمي أنا؟!، متعملش فيها راجل وبتاع كرامه وأنت أساساً الكرامة دي متعرفهاش إلا في بوست فيس! وبعدين أنا مش حشتم في أبوك المحترم اللي للأسف معرفش يربيك ولا أجيب سيرة أرض الطوب الرملي في الواحة في مدينة نصر وبقية الأراضي والشيك اللي بـ10 مليون جنيه بدون رصيد لإن كده حيزعل منك بابي، لو عندك كرامة يأبو كرامة يا أهبل كان اتصرفت وأنا مرتين أرمي الاستقالة في وشك ومتقبلوهاش واستقالة بين السطور فيها أنه ميشرفنيش أكون رئيس لنادي الأهلي العظيم اللي بحبه وبحب جمهوره وفيه هلفوت في مجلس الإدارة زيك بتاع بابي ومامي!، دي آخر مرى أنزل لمستواك وأرد عليك ببوست … فاهمني”.
سراج يضرب من جديد ويحرج تركي آل الشيخ
ورد سراج على تركي آل الشيخ مجددا حيث قال: “تنزل أيه بس مش لما تطلع الأول تبقى تنزل أنا بس حبيت أفهمك أني ابن أصول ومتربي مش زيك وعملت نفسي بنفسي ودرست جامد وطورت من نفسي ومدرس مساعد بالجامعة الأمريكية وعملت 2 ماچيستير واحد منهم في مدريد ومثلت مصر في مؤتمرات بره واخدت جائزة أفضل بحث علمي بميونخ 2018، الحمد لله متربي ومصري وعندي كرامة ودماغ الدور والباقي على اللي ملوش ولا أصل ولا علم وفلوس ياريتها فلوسه أو بتعبه وضحكتني بجد على الشيك أبو 10 مليون طيب هات دليل واحد كده للشيك ده أنا والدي حارب في 1973 معرفش والدك كان بيعمل أيه ساعتها وطول عمر اسمه عالي ونضيف أوي في مصر بشهادة الكل في كل مكان وطول عمره لي فلوس بره، مش العكس الحمد لله عمر ما كان ولا هيكون علينا حاجة لحد أقولك هات اللي لي 10 مليون ده يقولي كده في وشي وأنا هدهمله مكان أبويا بس هاته أخر حاجة بقى النادي الأهلي كمان ميشرفوش واحد قواد زيك يجيب سيرته اصل”.
الخطيب يمنع أعضاء الأهلي من الرد على تركي آل الشيخ
الهجوم المتبادل بين الرئيس الشرفي للقلعة الحمراء، وعضو مجلس الإدارة، دفع محمود الخطيب رئيس مجلس الإدارة لإصدار تعليماته لمسئولي النادي بعدم الرد على تركي آل الشيخ رئيس هيئة الترفيه السعودية والرئيس الشرفي للنادي على مواقع التواصل الاجتماعي، حيث شدد الخطيب على ضرورة الالتزام بالتعليمات لحين صدور رد رسمي من الأهلي.
