تأخرت فى إبلاغها بنتيجة التحاليل.. مستشفى الدمرداش يتسبب فى إصابة طبيبة وأسرتها بكورونا (صور)

كشفت الدكتورة منة جمال، الطبيب بمستشفى الدمرداش الجامعي بعين شمس، تفاصيل إصابتها بفيروس كورونا المستجد، حيث أشارت إلى أن المستشفى أبلغها بسلبية النتائج شفويا، في الوقت الذي اكتشفت بعد 5 أيام أن نتيجتها كانت إيجابية، ما تسبب بإصابة عائلتها بفيروس كورونا نتيجة مخالطتها.

وقالت في تدوينة على صفحتها على موقع التواصل الاجتماعي فيس بوك: “أنا زي ما كل القريبين مني كانوا عارفين اني كنت تعبانة جدا من فترة و عزلت نفسي عن اهلي و شغلي البرايفت لحد ما اعرف احلل انما طبعا المستشفي كانت بتنزلني كل يوم عادي اختلط بالناس عادي و بعد محاولات كتير في المستشفي حوالي ٣ ايام (٣ ايام بروح و اجي عشان يتحللي وأنا مريضة والله اعلم عديت كام حد) الحمد لله رضيوا عني وحللت يوم ٢٠-٥ و قالولي لو ايجابي هيكلمونا بكرة لو سلبي مش هيكلمونا و تاني يوم محدش كلمني وبعدها صاحبتي راحت سألتهم و قالولها اننا كلنا سلبي الحمد لله…. و علي أساسه فكيت العزل و نزلت الشغل تاني و اتعاملت مع اهلي عادي اللي حاليا كلهم تعبانين و افاجئ بعدها باتصال يوم ٢٦-٥ يقولولي دي كانت غلطة و انتي ايجابي ! و مفيش اماكن في المستشفيات فانتي هتتعزلي في البيت و العلاج معلش هاتيه علي حسابك.

وأضافت: “مع العلم صورة التحليل اهي طالعة يوم ٢١ ليه التحليل يطلع ٢١ و اتبلغ بيه ٢٦… ذنب كل الناس اللي انا قابلتها دي في رقبة مين؟؟؟ و يطلع حد يقولك انتم بتستقيلوا ليه و بتهربوا ليه، مع العلم عامل الحماية الوحيد اللي متوفر في المستشفي هو الكمامة و ليك واحدة في اليوم اتقطعت او جرالها حاجة هما مش مسئولين و طبيعة شغلي بكلم اكتر من ٨٠ مريض في ساعات العمل في صيدلية مفيش مسافة متر بينى انا و المرضي، شكرا لكل فئات الهيئة الطبية العاملين و ليس المسئولين علي اللي بتستحملوه، واخيرا حسبي الله ونعم الوكيل في كل مقصر و كتر الف خير كل واحد شايف شغله و مراعي ضميره”.