بعد حوادث التحرش.. عمرو سمير عاطف: احنا عندنا مشكلة في ثقافتنا ونظرتنا للبنات والستات (صورة)
أبدى المؤلف والسيناريست عمرو سمير عاطف رأيه في قضية التحرش الجنسي الذي تتعرض له الفتيات يومياً، مستعين بمجموعة من المواقف التي شاهدها عن التحرش، والتي زعم من خلالها أن الشباب المصري هم السبب في التحرش في العديد من الدول العربية منها الأردن وسوريا على سبيل المثال، مطالبًا كل فتاة بتقديم بلاغات رسمية ضد كل من يتعرض لها بالتحرش اللفظي أو الجنسي، لا سيما أن تلك القضية أثيرت جدل السوشيال ميديا خلال الفترة الأخيرة.
وكتب عمرو منشور عبر حسابه الشخصي على موقع التواصل الاجتماعي “فيس بوك”، قائلًا: “طيب أنت شايف إن لبس البنت هو السبب في التحرش.. جميل فسر الآتى: كنت في الأردن 2019 بنصور مسلسل النهاية وكنا قبل احتفالات رأس السنة بأيام وكان فيه شارع وسط عمان بتدخله بتذاكر راقي جدا وفيه محلات أكل وهدوم على أعلى مستوى ومليان ناس وبنات حلوة لابسين كل أنواع اللبس اللى لو واحده فكرت بس إنها تلبسه هنا ها يتقال عليها شمال ومافيش أي حد بيعاكس أى واحدة بالرغم من الزحمة وانتشار الشباب لدرجة إنى استغربت فعلا”.
وأضاف: “وبعدين فجأة لاقيت مجموعة شباب في العشرينات كده قاطرين بنتين وعمالين يسدوا عليهم الشارع ويهزروا ويضحكوا بشكل سخيف جدا البنتين كانوا بيتحركوا بسرعة وبيحاولوا يهربوا منهم ولاقيت الموكب كله بيقرب منى وكنت مهتم اسمع الشباب بيعاكسوا ازاى بالاردني لاقيتهم بيتكلموا مصري ! أيوه يعنى المجموعة اللى بتعاكس وتتحرش هى مجموعة من الشباب المصري الطعم .. هل دي حادثة فردية؟”.
وتابع: “في 2004 كنت في سوريا في اللاذقية وعايز أقولك إن البنات هناك حلوين لدرجة إنك بتبقي عايز تسأل عن جدوى استمرارك في الحياة بعد ما شفت دى أو لمحت دى وطبعا لابسين براحتهم خالص وفيه سباق في الميك اب وتسريحات الشعر.. إن واحد سوري يعاكس أو يبص حتى! مافيش.. أنا كنت قاعد هناك كذا يوم، وفي يوم كده فجأة لاقيت الشوارع مقلوبة وناس بتتكلم بصوت عالى على غير العادة ومن اللى فهمته كده انهم بيتكلموا عن حاجه لسه حاصلة من شويه ولما أى حد كان يشوفني يسألنى أنت مصري ؟ اقوله اه فيه ايه يقولي أنت تبع الناس اللى كانوا هنا؟ اتاري إيه بقي يا معلم فيه سفينة مصرية رست في ميناء اللاذقية من ساعات وفيه شلة جميلة من الشباب المصري نزلوا يتمشوا في شوارع المدينة فاتفضحنا لأنهم تقريبا ما عتقوش واحدة”.
واختتم: “طبعا الأمثلة الشبيهة كتير وأنا واثق إن فيه كتير ممكن يكتبوا مئات لو مش آلاف المواقف اللى شافوها بره.. تفهم ايه من البوست ده ؟ 1- إن احنا عندنا مشكلة في ثقافتنا ونظرتنا للبنات والستات ولا.. 2- لبس البنات بيثير الذكر المصري بس لأنه يمكن أذكر من غيره”.
يذكر أن أثير على السوشيال ميديا ضجة واسعة خلال الأيام الماضية بالعديد من القضايا الشائكة الخاصة بالتحرش، وكان آخرها قضية الطالب أحمد بسام زكي الذي قام بجريمة هزت السوشيال ميديا وهو متهم بالتحرش بأكثر من 100 فتاة واغتصابهم، وأيضاً قضية الطفل السورى الذى تعرض للتحرش والاغتصاب على يد ثلاثة شباب لبنانين.
عمرو سمير عاطف: استعنتُ بفزيائيين لكتابة “النهاية”.. و”يوتوبيا” أحمد خالد توفيق ألهمتني (حوار)
عمرو سمير عاطف يوضح حقيقة علاقة مسلسل النهاية بفيروس بكورونا
