عمر كمال يروي موقفًا إنسانيًا جمعه بتامر حسني في إحدى الحفلات: “جبر بخاطري”
روى مطرب المهرجانات عمر كمال، أحد المواقف الإنسانية، والذي جمعته بالنجم تامر حسني، منذ عدة سنوات، خلال تواجده بنفس القرية التي يتواجد بها في العين السخنة لإحياء حفل.
وشارك كمال جمهوره بتفاصيل الموقف، حيث قال على صفحته الرسمية عبر موقع التواصل الاجتماعي “فيس بوك”: “من حوالى 4 سنين كان عندى حفلة في العين السخنة في قرية سياحية كان ف نفس اليوم الفنان تامر حسني عامل حفلة فيها.. والقرية بلغتني إن فقرتي قبل تامر وهطلع أعمل الفقرة على نفس المسرح.. قولتلهم استحالة ده يحصل لأن المنظم مش هيرضي عشان أنا مش نجم ومش معروف ومحدش هيرضى يديني الفرصة ديه”.
وتابع: “قالوا لي إحنا أصحاب الحفلة والقرار.. قولتلهم يعني أعمل دعاية وأنا مطمن قالولي أعمل وأنا من جوايا متأكد وعارف إن محدش هيطلعنى على المسرح ده.. عملت دعاية وناس كتير من بلدى السويس قطعت تكت عشاني وطلعت كام ميكروباص صحابي عشان يشجعونى وعملت كل اللي أقدر عليه.. روحت يوم الحفلة لقيت الحفلة الساعة 4 العصر على حمام السباحة ومفيش ولا مخلوق أصلا والدنيا حر جدا وحفلة تامر الساعة 11 بليل ف مكان تاني خالص من القرية.. حتى مغنتش من كتر ما كان مفيش ولا فرد الناس كلها نايمة لأما محدش جه عشان لسه بدري على حفلة تامر”.
واستكمل: “بقى شكلي وحش جدا قدام الناس هطلع كداب وعملت دعاية بالكدب وأنا مليش ذنب.. كلمت طوب الأرض عشان أوصل لتامر وقتها معرفتش محدش خدمني ومحدش رضى يساعدني.. كنت أنا وصحبي اسمه محمد سمير كان مؤمن بيا جدا.. روحت مكان حفلة تامر قعدت تحت المسرح من الساعة 4 لحد الساعة 11 قسما بالله حوالي 6 أو 7 ساعات عشان أضمن أبقى جمب المسرح لأني لو روحت بليل محدش هيرضي يدخلنى وأنا قسما بالله ما معايا حتى حق دخول الحفلة وكنت قابض من القرية 600 جنيه”.
وأردف: “قعدت تحت المسرح بحيث أقدر أكلم أي حد وأطلعله أغني معاه حتى عشان منظري قدام الناس يبقى حلو .. 7 ساعات لحد ما النهار راح والليل جه و الحفلة اشتغلت وطلعت طبعا.. كان جمب المسرح جاردات ومنظمين و كله ملخوم في الحفلة وتامر.. كلمت منظم الحفلة مرضيش يطلعني وقالي استنى للأخر”.
وقال: “كلمت أصحاب الحفلة محدش طلعني.. اتصلت بكل فنان ممكن يكون يعرف تامر محدش ساعدني.. شكلى كان هيبقى وحش جدا قدام الناس أني مغنتش وابن بلدهم محدش حتى شافه عدى من قدام المسرح.. كلمت شخص محترم جدا اسمه حازم شغال مع تامر حسني وحكيتله.. الراجل راح قال تامر.. راح قاله هاتهولي بسرعة.. وجبر بخاطري وقدمني للناس وغنيت جمبه واتصورت.. وروحت رفعت الصور إني كنت ف الحفلة وغنيت.. يمكن هو مش فاكر الموقف ده حتى بس أنا فاكرهوله إن كان إنسان قبل ما يكون فنان وروحت طاير من الفرحة ونمت ف بيتي مبسوط وليه موقف تاني هحكيه في وقت تاني”.
“وعهد الله عافرنا”.. عمر كمال يوجه رسالة لجمهوره (صورة)
