تعرف على حقيقة بيع التوحيد والنور لطقم حمّام مطبوع عليه “السيدة العذراء”
تداول بعض مستخدمي موقع التواصل الاجتماعي فيس بوك، صورة للسيدة العذراء، منقوشة على طقم مفروشات يستخدم في الحمامات، وهو ما أثار حالة من الغضب لمستخدمي مواقع التواصل الاجتماعي.
وكانت صفحة “أمسيحي أساحبي”على موقع التواصل الاجتماعي، نشرت بوست جاء فيه: “أسف طبعًا للصور دى بس كان لازم الكل يعرف ”التوحيد والنور” بيبيع طقم دواسات حمام علية صورة العذراء مريم، والشركة المصنعه للطقم دا اسمها ”الدلتا” طبعًا شيء قمة فى الاستفزاز والحقارة، المفروض إن العذراء مريم ميختلفش عليها حد أساسًا ومش موضوع جدال أيًا كانت ديانتك”.
فيما علق أدمن الصفحة الرسمية لمحلات التوحيد والنور على ما تم نشره في صفحة “أمسيحي أساحبي”، قائلا: طبعا الكلام ده مش صحيح ويستحيل نقبل بشيء زي ده، يا ريت صحاب الصور يعرفنا مكان الصورة ونحن على استعداد للذهاب معهم لمكان الصورة، تأكيدًا للجميع أن هذا المنتج لا يوجد عندنا ولا عمره اتباع عندنا، ونحن لا نقبل بشيء مهين سواء كان على الديانة المسيحية أو الاسلامية، كلنا بلاد واحدة، وكلنا مصريون، وأنا بعتذر عن هذا المنظر مرة أخرى، وأرجو منكم تأكيد المصدر قبل الاتهام.
وكانت البداية عندما نشرت سيدة، من مستخدمي موقع التواصل فيس بوك، على صفحتها الشخصية قائلة: شركة الدلتا … التوحيد و النور فرع فيصل ناصر الثورة فرحي قرب ومضغوطه جدااا ونزلت أشتري باقي الطلبات اللي نقصاني ومن ضمنها دواسات الحمام، ولأني مكنتش شايفه قدامي أخدت الدواسات دي وروحت … اتفاجأت بأختي بتقولي دي عليها صورة ماما العدرا!!!!! (ستنا مريم) ولما شوفتها تنحت وحاولت اجمّع … ايه دا؟!!! دا بجد!! هو على حد علمي أن السيده العذراء دي مكرمة من المسيحيين وغير المسيحيين، فالشركة اللي عملت كدا تقصد ايه!! الموضوع مش صغير ومش قليل ومش سهل.
فيما علقت نفس السيدة صاحبة الواقعة على صفحة أمسيحي أساحبي قائلة:”يا جماعة بكل هدوء أنا صاحبة المشكلة وكل البوستات اللي انتشرت ف جروبات و صفحات دي أنا مكنتش على علم بيها نهائي، أنا ولا طالبة أن الناس تقاطع التوحيد والنور، ولا عايزة يحصل مشاكل الغلط وارد جدا جدا … و الغلطة عالشركة المنتجة أكتر من الموزع، أنا كل هدفي وطلبي أن المنتج دا يتسحب من السوق ويتم تقديم اعتذار عن أن حاجه زي كدا حصلت سهوا مش عمدا لا أكثر ولا أقل، ولا ليا دعوة بفتنة ولا مسيحي ومسلم ولا كل الكلام دا فمن فضلكم بلاش أي إشاعات أو أي تغليط” .
كما نشرت السيدة فاتورة ردها للمنتج المحتوي صورة السيدة العذراء، وعليها اسم المحل، وتاريخ رده، وعلقت قائلة: صورة وصل المرتجع من فرع نصر الثورة بالتاريخ لأنهم رفضوا مراجعة الكاميرا ف الميعاد اللي ذكرته، ورفضوا يطلعونا على أصل الفاتورة اللي وضحت الرقم المسلسل بتاعها.
وفيما يعد تراجعًا عن النفي المطلق، علق الحساب الرسمي لمحلات التوحيد والنور على ما نشرته السيدة في صفحة أمسيحي أساحبي قائلا: “يا فندم كل هدفنا إن إحنا نرفض تماما أي شيء مهين لإخوتنا المسيحيين، إحنا زعلانيين أكتر إن أصلا إزاي منتج زي ده يكون في السوق، عموما إحنا طبعا بنعتذر لحضرتك وكل إخوتنا المسيحيين، وهنزل بيان رسمي منا للاعتذار، وبأكد لحضرتك إن المنتج ده مش من عندنا، وحتى لو كان حصل خطأ، وكان فيه قطع أو أكثر، إحنا دلوقتي بنعمل جرد، ولو فيه حاجة زي كده تأكدي تمامًا إنها هتتلم”.
