“اغتصبوني والموس على رقبتي”.. ننفرد بنشر نص تحقيقات منة عبد العزيز (مستندات)
أمر المستشار حمادة الصاوي، النائب العام، يوم 26 يوليو الماضي، بإحالة 6 متهمين في واقعة التعدي على المجني عليها «منة عبد العزيز» لـ«محكمة الجنايات»، لاتهامهم بخطفها بالتحايل والإكراه، ومواقعتها كرهًا عنها، وهتك عرضها بالقوة والتهديد، وسرقتها بالإكراه، وانتهاك حرمة حياتها الخاصة عبر شبكة المعلومات الدولية عن طريق بث فيديو لها “عارية” بعد التعدي عليها جنسيا، وضربها، وإتلاف هاتفها، وتهديدها بإفشاء أمور تخدش شرفها، وتعاطي المخدرات، وإدارة وتهيئة مكان لذلك، عبارة عن غرفة بفندق زوسر بشارع الهرم بمحافظة الجيزة.
والمتهمون في القضية هم، محمد حمدي وشهرته كلاشنكوف، وشيماء شاكر وشقيقتها فاطمة، ومازن إبراهيم الطاهر وشهرته “المميز”، وبسام رضا وشهرته بيشوي، وفني بفندق زوسر، يُدعى “سراج فاروق”.
باشرت النيابة العامة تحقيقاتها في قضية الاعتداء الجنسي على المجني عليها منة عبد العزيز، فتاة التيك توك، يوم 22 مايو الماضي، ونشر فيديو الواقعة، وأمر النائب العام، بإحالة المتهمين للمحاكمة الجنائية، وعددهم 6 متهمين.
وينفرد “القاهرة 24″ بنشر نص التحقيقات في قضية الاعتداء الجنسي على المجني عليها آية إبراهيم خميس على حسين، المعروفة إعلاميا بـ”منة عبد العزيز فتاة التيك توك” في القضية رقم 3328 لسنة 2020 إداري قسم الطالبية.
وسأل المحقق، منة عبد العزيز، فتاة التيك توك:-
س: ما مؤهلاتك العلمية ومتى حصلت عليها؟
ج: أنا خرجت من المدرسة وأنا عندي 16 سنة وكنت في الصف الثالث الإعدادي سنة 2016 لما أمي ماتت.
وأين تقيمين؟
كنت عايشة في العاشر من رمضان لحد أمي ما ماتت في 2016 قعدت عند أم إيهاب وعم عبد الله كل واحد فيهم شوية لحد أول سنة 2020، روحت القاهرة وكنت بقعد في بيت حد من صحابي البنات شوية.
ما مصدر دخلك؟
لما كنت في العاشر من رمضان كانت بتصرف عليا أم ايهاب وعم عبد الله، ولما جيت القاهرة قعدت عند أصحابي وهما اللي كانوا بيصرفوا عليا.
س: ما محل إقامته؟
ج: هو ساكن في شبرا الخيمة.
س: هل للمتهم اسم شهرة؟
ج: هو اسم الشهرة بتاعه محمد كلاشنكوف وده اسمه اللي كل أصحابه يعرفوه بيه وده اسم حسابه على الانستجرام والتيك توك.
س: وما عدد لقاءاتك به؟
ج: أنا من ساعة ماعرفته من تلات سنين بنتقابل شبه يوميا.
س: وأين كان لقاؤك به؟
ج: في وسط البد كافيه اسمه خرابة وفي الكوربة في مصر الجديدة في الحرية مول.
س: ومن حضر تلك اللقاءات؟
ج: كان بيبقي موجود معانا واحنا في كافيه خرابة بوسط البلد أصحابنا انا ومحمد وشوايا من مشاهير التيك توك وفي حرية مول كنا بنقابل اصحابنا وبعد كدا بنتمشي شوية.
س: ما الفترة الزمنية التى مكثتِها بتلك اللقاءات؟
ج: كنت بقعد أنا وكلاشنكوف واصحابنا على الكافيه اللي اسمه خرابة.
س: ما الذي دار بتلك اللقاءات؟
ج: كنا بنقعد مع بعض نهزر ونعمل فيديوهات تيك توك.
س: ما الذي تعرفينه عن المتهم محمد حمدي وشهرته محمد كلاشنكوف.
ج: أعرف عنه انه غلبان وملهوش في المشاكل وبيخاف منها وعنده صفحة على الانستجرام عليها 120 ألف مشترك وعنده حساب على التيك توك بس مش بيستخدمه علشان بيرفع الفيديوهات اللى بيعملها معايا من صفحتي.
س: ما صلتك بالمتهم مازن إبراهيم الطاهر محمد؟
ج: احنا اصحاب.
س: ما ظروف تعرفك عليه؟
ج: أنا اتعرفت عليه من حوالي تلات شهور في عيد ميلاد اسمه جودة فون.
س: ومتى كان تعرفك؟
ج: من حوالي تلت شهور.
س: ما عمره؟
ج: عنده 23 سنة.
س: ما أوصافه؟
ج: هو طويل وقمحاوي ورفيع وشعره اسود طويل بيعمله بالاستشوار.
س: وما طبيعه عمله؟
ج: هو طالب بيدرس في جامعة.
س: هل لدى المتهم سالف الذكر اسم شهرة؟
ج: اللي اعرفه إن أصحابه بيقولوه مازن المميز.
س: ما محل إقامته؟
ج: هو ساكن في بيت في الهرم في آخر خاتم المرسلين في الدور الخامس والبيت بتاعه قدام محل كذا ميزة بتاع الكبدة.
س: ما عدد لقاءاتك به؟
ج: قابلته حوالي سبع مرات.
س: وأين كانت لقاءاتكم؟
ج: احنا اتقابلنا أول مرة من تلات شهور في عيد ميلاد جودة فون وبعدها قابلته تاني يوم وقعدنا في المقطم وبعد كدا اتقابلنا في نفس الاسبوع في شقة عند واحد صاحبه في هرم سيتي، وقابلته في شقة كنا أجرناها أنا وهو ودينا وندي وجوز جوهرة الرقاصة واسمه خالد ومحمد كلاشنكوف ورا بيت مازن وقابلته آخر مرة لما قالي تعالي نهرب في الفندق لما بشوي اغتصبني وهو ضربني وعورني وسرق تليفوني وفلوسي وشيماء ورحمة وفاطمة خدوا الميكب بتاعي.
س: من حضر تلك اللقاءات؟
ج: أنا ومازن و كلاشنكوف ودينا وندى وجوز جوهرة الرقاصة وآخر مرة لما بيشوي اغتصابني كان موجود شيماء وفاطمة ورحم.
س: ما الذي تعرفينه عن المتهم مازن إبراهيم الطاهر محمد؟
ج: أنا ندمت لما عرفته وهو شخص مش كويس وكان مدمن بيتعالج من الإدمان في مصحة.
س: من يدعى جودة فون؟
ج: كل اللى اعرفه إن اسمه جودة فون وليه حساب على الانستجرام وعلشان أنا من مشاهير التيك توك عزمني على عيد ميلاده من حوالي تلات شهور مش فاكرة بالظبط إمتى وروحت عيد ميلاده وهناك اتعرفت على مازن ورحمة.
س: ما اسمه؟
ج: أنا معرفش غير اسمه جودة فون وده اسمه على الانسته.
ما المقصود من الانسته؟
ج: اللي هو الاستجرام .
س: ما الذي تعرفينه عن من يدعى جودة فون؟ ج: معرفش عنه حاجة غير انه هو اللي عزمني على عيد ميلاده.
س: متى وجه إليك الدعوة؟
ج: من تلات شهور ومش فاكرة يوم ايه.
س: وما مناسبة دعوته؟
ج: هو كان عازم مشاهير التيك توك.
س: وكيف كانت دعوته؟
ج: هو بعتلي دعوة على الانستجرام.
س: وهل لبيتِ دعوته؟
ج: ايوه انا روحت عيد ميلاده.
س: ما الذي دار به؟
ج: اتعرفت على مازن ورحمة وكل مشاهير التيك توك.
س: ما صلتك بمن تدعى رحمة؟
ج: أنا اول مرة أشوفها في عيد الميلاد وشفتها مرة تاني يوم الندم وقت ما بشوي اغتصبني.
س: ما عمرها؟
ج: معرفش.
س: ما اسمها؟
ج: معرفش غير اسمها رحمة ناصر.
س: ما أوصافها؟
هي طويلة ومليانة شوية وبيضة وعاملة شعرها أحمر.
س: ما محل إقامتها؟
ج: معرفش غير انها من شبرا الخيمة.
س: ما صلتك بالمتهمة شيماء أحمد شحاته؟
ج: أنا اعرفها كنت شفتها قبل كدا مع كلاشينكوف في الشتاء اللى فات وقابلتها قبل الاغتصاب بيومين كنت بايتة عندها.
س: متي كان تعرفك بالمتهمة سالفة الذكر؟
ج: أنا شفتها مرة كانت ماشية في الشارع وكان معايا كلاشينكوف واتعرفت عليها.
س: ومتي كانت تعارفك به؟
ج: في الشتا اللي فات.
س: وكم تبلغ من العمر؟
ج: عندها حوالى 21سنة.
س: وما طبيعة عملها؟
ج : معرفش.
س: أين تقطن؟
ج: هي ساكنة في طرة البلد جنب محل اسمه حودة اللبان.
س: ما عدد لقاءاتك بها؟
ج: أنا شفتها مرتين في الشتا لما عرفتها كانت مع كلاشينكوف ومرة لما كلمتني روحت قعدت عندها يومين قبل موضوع الفندق.
س: ما الذي تعرفينه عن سالفة الذكر؟
ج: ماعرفش عنها أي حاجة غير انها مشهورة على الفيس بوك بس مش متبعاها بتعمل ايه تتشهر على الفيس بوك.
س: وما صلتك بالمتهمة فاطمة أحمد شحاته؟
ج: هي أخت شيماء ومعرفش عنها أي حاجة لأني أول مرة اقابلها لما روحت لشيماء البيت.
س: ما صلتك بالمتهم بسام رضا صابر حنا وشهرته بشوي؟
ج: أنا معرفوش وأول مرة أقابله يوم ما مازن عزمني على الفندق، والكلام ده كان قبل الوقفة بتاعت العيد اللى فات بتلات ايام مش فاكرة بالظبط كان يوم إيه.
س: وما مناسبة دعوته؟
ج: علشان أنا منة.
س: وكيف كانت دعوته؟
ج: هو كلمني في التلفون.
س: وهل لبيتِ دعوته؟
ج: أيوة انا قولت اني هاجي ومعايا صحابي شيماء وفاطمة ورحمة لأنهم هما اصحاب كلاشينكوف.
س: وهل من آخرين تم دعوتهم؟
ج: أيوة مازن قالي إنه هنسهر وتاني يوم روحت انا وشيماء وفاطمة ورحمة علشان نقابل مازن، بعد الفطار على طول ركبنا المترو ونزلنا في أم المصريين قابلنا مازن وكان معاه كلاشينكوف وبيشوي.
س: وما موعد تقابلكم؟
ج: هو مازن قالي انه هيسهر وتاني يوم روحت انا وشيماء وفاطمة ورحمة علشان نقابل مازن بعد الفطار وعلى طول ركبنا ونزلنا مترو أم المصريين قابلنا مازن. متي بلغتم محطة مترو أم المصريين؟ إحنا وصلنا حوالي الساعة ثمانية بالليل بعد الفطار؟
س: وأين كان لقاؤكم؟
ج: احنا قابلنا مازن وكلاشينكوف وبيشوي بعد ما وصلنا محطة مترو أم المصريين وركبنا توك توك وصلنا في المكان اللي كانوا واقفين مستنينا بعربية بيشوي؟
س: وبأي وسيلة تم وصولكم؟
ج: احنا ركبنا المترو من طرة البلد لحد أم المصريين ونزلنا ركبنا توك توك وادينا التليفون للسواق علشان مازن يقوله احنا واقفين فين، ولما وصلنا وقابلنا مازن وكلاشينكوف وبيشوي ركبنا العربية بتاعت بيشوي لونها رصاصي لانسر ورحنا على الفندق.
س: متي تم وصولكم تحديدا؟ ج: إحنا وصلنا قبل الحظر على طول تقريبا الساعة تسعة.
س: مع من تقابلتِ حال وصولك؟ قابلنا الراجل اللي معانا بره هو اللي دخلنا الفندق وطلَّعنا فوق واسمه سراج.
س: وما معلوماتك بشأن الفندق؟
ج: هو فندق في شارع الهرم ومش عارفة اسمه ايه.
س: ما وصفه؟
ج: هو فندق كبير لونه أبيض وجواه بسين.
س: من القائم بإدارته؟
ج:معرفش.
س: وما نسبة الاشغال به؟
ج:ماكنش فيه حد غيرنا.
س: ما الذى دار حال دلوفك والمتهم في الفندق؟
ج: احنا طلعنا الدور السابع كلنا وأخدنا أوضتين وسويت وكانوا في الدور السابع وقعدنا كلنا في السويت. س: أين مكثتِ به؟
ج: أنا كنت قاعدة في السويت أنا وكلاشينكوف وفاطمة ورحمة وشيماء وبيشوي ومازن
س: وما مكان وجود كل منكما آنذاك؟
ج: احنا كلنا طلعنا أول ماوصلنا، نزل مازن وبيشوي علشان يجيبو اكل وبيبسي وحشيش.
س: متى تحديدا انصرف كل من المتهمين مازن إبراهيم الطاهر وبسام رضا صابر لإحضار الأطعمة والمشروبات الغازية والمادة المخدرة الحشيش؟
ج: هو مازن وبيشوي نزلو لما طلعنا السويت على طول.
س: متي عاد سالف الذكر؟
ج: بعد ساعة عاد بيشوي ومازن وجابو معاهم أكل وبيبسي والحشيش.
س: ما الفترة التي مكثتِها بداخل الفندق؟
ج: إحنا كلنا وصلنا الساعة تسعة بالليل ومشينا الساعة سبعة الصبح.
س: من تواجد آنذاك؟
ج: كلنا كنا موجودين.
س: ما الذي دار خلال تلك الفترة؟ ج: إحنا قعدنا كلنا نشرب حشيش ماعدا مازن وبعد ساعة نزلت تحت في الفندق نزلنا البسين أنا وفاطمة ورحمة وكلاشينكوف وبيشوي وفضلنا في المياه ساعة وطلعنا السويت تاني.
س: ومتى تحديدا تم صعودكم؟
ج: احنا بعد ما خلصنا البسين طلعنا قعدنا كلنا مع بعض في السويت.
س: وما الفترة الزمنية التى مكثتِها مع المتهمين؟
ج: احنا كلنا كنا قاعدين مع بعض وكلاشينكوف دخل أوضة نام.
س: وما الذي دار خلال تلك الفترة؟
ج: احنا كنا قاعدين مع بعض وشيماء وفاطمة ورحمة يشربوا حشيش كانت الساعة حوالي تلاتة الفجر جالي مكالمة على تلفوني من يوسف الونش ولما رديت لقيت مامته اللي بتكلمني وبتقولي والنبي يا منة يا بنتي حاولي تجبيلي الموبيل بتاع يوسف علشان جايبين الموبايل بالأقساط، فتحت الاسبيكر وكل اللي قاعدين سمعه، وساعتها شيماء ملقيتش التليفون واتخانفنا انا وشيماء علشان اتهمتني اني سرقت تليفونها وزقتني بايديها وأغمي عليا وتلفوني ملقتوش لما فوقت وقالولي تليفونك مع مازن، ولما طلبت تلفوني من مازن علشان يدهولي قالي انتي سرقتي موبيل شيماء ومش هتاخديه غير لما تطلعي الموبيل اللي سرقتيه وقام مازن ضربني بإيده على وشي.
س:متي تلقيتِ تلك المحادثة؟
ج: هو الساعة حوالي تلاتة ونص كلمتني أم يوسف الونش علشان عايزة الموبيل بتاع ابنها يوسف اللي شيماء قلبته منه.
س: وما سبب مهاتفتها لكِ؟
ج: علشان انا اديت رقمي ليوسف الونش ابنها لما نزلت انا وشيماء ورحمة وفاطمة المعادي وشيماء قابلته وخدت منه الموبيل وقالبته منه ومشيت.
س: ما تصرفك حيال تلك المحادثة؟
ج: وانا بكلم ام يوسف فتحت الاسبيكر بتاع التلفون علشان اسمعه شيماء المكالمة.
س: وما تصرف المتهمة حيال تلك المحادثة؟
ج:هي بصتلي بقرف ومتكلمتش معايا.
س: وما تصرف باقي المتهمين حيال تلك المكالمة؟
ج: هو محدش اتكلم منهم.
