أمير مرتضى: نعيش موسمًا فاسدًا.. والزمالك كبير ومش هيقع

أعرب أمير مرتضى منصور، المشرف المشرف العام على الكرة في الزمالك، عن سعادته بعد فوز فريقه على سموحة، بهدفين مقابل هدف، في اللقاء الذي جمعهما منذ قليل على استاد مدينة الإسماعيلية، ضمن منافسات دور الـ 16 من بطولة كأس مصر.

وأضاف أمير مرتضى منصور في تصريحات صحفية عقب اللقاء: “لاعبو الفريق رجال وعلى أعلى درجات تحمل المسؤولية ويكفي أنهم استقبلوا الخبر الذي أعلنته اللجنة الأولمبية المصرية مساء أمس الأحد، ضد مرتضى منصور رئيس النادي، الإيقاف 4 سنوات، والناس ربنا يكرمهم وقدروا إنهم يلموا نفسهم، والمستهدف هو نادي الزمالك”.

وقال: “دى مش ظروف كورة ورياضة وكل ما يحصل هو عراقيل، وتحدثت مع رئيس لجنة المسابقات علشان أقوله إزاى هنلعب يوم 12 ونسافر يوم 13 قالي عادى وإيه المشكلة”.

وأكمل: “الجمهور بقى عنده وعي أكتر وكل الناس في الزمالك بقت متجمعة على شيء واحد، والموسم ده بالنسبالي موسم فاسد، واتحاد الكرة بعتلنا قبل 20 ساعة من المباراة يقولي غير الإعلانات علشان فيه رعاه جداد”.

وتابع: “مش عارف ليه احنا بنلعب في الإسماعيلية ومش فاهم إيه لازمة التعنت ده، ونادي الزمالك كبير ومش هيقع واللي بيحصل مش هيهز شعرة واحدة من أصغر مسؤول في الزمالك”.

واستكمل: “اللاعيبة عندهم وعي كبير باللى بيحصل وهم جزء من النادي، وكلنا في مركب واحدة، وهما عارفين أن اللي بيحصل ده مستهدف بيه نجاحتهم وكان عندهم تركيز إنهم يحققوا الفوز بعد اللي حصل امبارح”.

وأوضح: “الموضوع واضح للناس كلها، واللجنة الأولمبية بتقول تجاوزات رئيس الزمالك، شوبير ضرب واحد على الهواء وتاني يوم طلع الهواء عادي، وليه إمام عاشور ياخد وقف مباراة علشان عمل ترقيصة”.

واختتم تصريحاته قائلًا: القصة اننا نخلص على مرتضى منصور ومجلسه بدل مايقعد معانا 4 سنين كمان، والجمعية العمومية في الزمالك هي اللي ليها الحق تختار رئيس نادي الزمالك، وكان الموضوع عزبة ومرتضى منصور هو اللي نصف العزبة دي”.

مرتضى منصور لفرج عامر: “ورحمة أمي لاحبسك” (صورة)