ابنة رجاء الجداوي عن حالة قبر والدتها: “نقلنا أمواتنا وصلينا عليهم تاني بسبب كوبري البساتين” (فيديو)

ردت أميرة مختار، ابنة الفنانة رجاء الجداوي، على الانتقادات التي وجهت إليها، بعد انتشار خبر يفيد بوجود حشرات حول قبر الراحلة.

وقالت خلال مداخلة هاتفية مع برنامج “مساء Dmc” مع الإعلامية إيمان الحصري: “أنا نفسي مش فاهمة إيه بيحصل، في واحدة كتبت لي إنها بتحب ماما أوي، ولكن المدفن غير لائق، وقولتلها عندك حق عشان منطقة البساتين فيها تعديلات بسبب الكباري، الجزء المتكسر والمهدم.. ده كان مكان بنت خالتي مدفونة فيه.. واضطرينا ننقلها في مكان تاني في نفس المقبرة عشان ده حرم الكوبري.. وتم نقلها في حياة ماما وكانت عايشة وحضرت ده.. وكانت قلقانة ومتوترة وطمنونا انهم هياخدوا حوالي 3 أو 4 أمتار”.

وتابعت: “هي نفسها كانت في المقابر ووقفت وشافت ونقلت بنت خالتي.. فهي مش مختلفة أوي عن وهي عايشة.. ماما عارفة حالتها ووضعها، لما يجي حد يكلمني يقولي غير لائق برجاء الجداوي، لائق لمين للجمهور، ما هي مامي دافنة طنط تحية كاريوكا فيها، وليه مش حاطين اسمها على المقابر، إحنا مش بنحط أسماء السيدات ودي عيلتنا.. لو ماما كانت عاوزة كانت حطت لطنط تحية.. ودي أصلًا مقبرتها”.

واستكملت: “أنا دفنت أمي في المكان ده.. وكانت دايمًا تقول يارب تحت يبقى واسع ومنور ويكرمنا بالأعمال اللي تنور قبرنا واللي فوق ده كله مش مطلوب.. اللي مدفونين تحت ميقلوش مشاعر عن مشاعرنا لماما.. وكل العيلة موجوعة على الناس اللي تحت.. اضطرينا ننقل الجثث وأمواتنا.. واتصلى عليهم تاني.. وكان وماما عايشة وقبل ما تتوفى بحوالي سنة”.

وأضافت: “اضطريت أرد عشان مقدرة حب الناس لرجاء الجداوي.. وعارفة إن ده بيحصل بدافع الغيرة على شياكة وحب رجاء الجداوي ورديت بأسلوبي.. وأنا حاليًا بفكر في التكريم اللي بيحصلها وده اللي بفتخر بيه”.

مدفن رجاء الجداوي في حالة يُرثى لها.. ونجلتها: “المهم تحت منور قد إيه” (صور)