نشوى مصطفى: “مكنتش متخيلة إن ألم كورونا بالدرجة دي.. أمال سكرات الموت هتبقى عاملة إزاي؟” (فيديو)
كشفت الفنانة نشوى مصطفىـ تفاصيل إصابتها بفيروس كورونا، قائلةً: “أنا عرفت إني عندي كورونا يوم الثلاثاء اللي فات، وكان عندي أعراض من يوم الخميس اللي قبله، وكنت مفكرة برد عادي، وبدأت أخد مكنات عادية”.
وتابعت: “وبعدها الحياة بدأت تنط يوم الاتنين، ألم لا يحتمله بشر في جسمي كله وفي صدري، وبعدين ولادي جابولي دكتور في البيت، وطلب أشعة مقطعية، ووبالفعل نزلنا عملناها، وبعدها اكتشفنا إنها كورنا، فالدكتور كتبلي بروتوكول دواء، ولكن معمليش حاجة خالص، وابتديت أتعب أكتر، فولادي جابولي دكتور تاني ببروتوكول تاني، وبرضو معمليش حاجة، وابتدى وشي وشفايفي يزرقوا، ومش قادرة اتنفس أو أخذ نفسي، فنزلوا يلفوا على مستشفيات، وكلهم رفضوا وقالوا مش بناخد كورونا”.
وأضافت: “ابني جاب رقم شكاوي رياسة الوزراء، وكلمهم وقالهم والدتي حالتها صعبة وعندها كورونا، وفي نفس الوقت بنتي كلمت رقم 105، وقالتلهم أمي عندها كورونا، والأسئلة اللي اتسألوها هي عن الرقم القومي والسن، وسألونا نبعت إسعاف ولا هيجيبوني، فقولنالهم عربية إسعاف، في نفس اللحظة كان أشرف زكي بيحاول يتواصل معايا بعد ما كتبت الاستغاثة على الفيس بوك، وكلم ابني وقاله هقولك أول ما عربية الإسعاف تيجي، تزول ماما، وخلال ساعة جات عربية الإسعاف وخدوني على مستشفى العجوزة”.
ووجهت الشكر للعاملين في مستشفى العجوزة، حيث أنها تحتجز هناك، وقالت: “أنا مع ناس هنا من أهل الجنة، والعاملين في مستشفى العجوزة من أهل الجنة، لأنهم بينجوني من الموت، وبيطمنوني إني هخف، واكتشفت إنهم بيقعدوا 14 يوم ميشوفوش بيوتهم، فهما ناس بتأذي نفسها علشان إحنا نخف”.
وأردفت: “امبارح حالتي اتحسنت شوية، والساعة 4 الصبح، درجة حرارتي وصلت لـ39، فالدنيا اتقلبت، وكلهم عملولي كمادات ويعلقولي محاليل ورفعولي الأوكسجين، لإني كنت جاية المستشفى الأوكسجين كان 84، وده رقم خطر، لكن دلوقتي بيوصل لحد 92، أنا بس المشاكل اللي عندي دلوقتي هو إني عندي مشاكل في صدري، وعندي سكر، فهما دول المشكلة دلوقتي”.
واختتمت حديثها وقالت: “أنا أهملت، وأول ما كورونا ظهرت أنا كنت ملتزمة جدا، ومكنتش بعلق الكمامة ولا بتحرك من البيت إلا في الضرورة، ولكن أهملت بقالي 3 أشهر، وكان جوزي يسألني عن الكمامة والكحول، كنت أقوله معايا آه، بس كنت مش باخد، وبدأت أخرج اشتري طلبات بيتي بنفسي في أماكن زحمة، من غير ما يهمني، ومكونتش متخيلة إن ألم كورونا بالدرجة دي، أمال سكرات الموت هتبقى عاملة إزاي”.
نشوى مصطفى بعد إصابتها بكورونا: “شكرًا الرئيس السيسي.. والله ما كانوا يعرفوا إني ممثلة”
نهال عنبر عن الحالة الصحية لنشوى مصطفى: “لسة على جهاز الأكسجين”
