سالي عبد السلام: "كان هيتكتب كتابي الشهر ده بس محصلش نصيب..والرجالة مالهمش أمان"
كشفت الإعلامية سالي عبد السلام، أنها كانت تمر بحالة نفسية سيئة خلال الفترة الماضية، مشيرة إلى أن أصدقاءها وأهلها كانوا الداعم الأول على تخطيها تلك الأزمة.
وقالت عبد السلام خلال تقديمها برنامج "قصة حقيقية"، عبر شاشة القناة الأولى المصرية: "كتير كنت باجي التصوير الفترة اللي فاتت معيطة، وبالذات الشهر ده لأني كنت ممنية نفسي إن هيتكتب كتابي وأتجوز، بس الموضوع ممشيش لأن أغلبية اللي بنعرفهم مبقوش قد المسؤولية ومبقوش رجالة ولا ليهم أمان".
وتابعت: "يمكن ربنا خد مني حاجات كتيرة أوي وماكنتش متخيلة أنها تتاخد مني وفي الوقت ده، بس أنت عوضتني يا الله ومش عاوزة حاجة تانية.. شكرًا على ثقتكم وعلى جبر خاطركم وشكرًا أني رجعت أشتغل في بلدي تاني، شكرًا أني لو هيتقال في يوم من الأيام أني عديت جمب ماسبيرو.. ده كتير عليا أوي يا رب، شكرًا أن كل اللي حواليا رزق".
وأردفت: "عاوزة أشكر كل واحد في البرنامج وكل القائمين عليه، أنا حاسة إن النهارده ربنا جبر بخاطري جامد أوي.. أني أسمع الرقم ده، هي دي الحقيقة وهي دي القصص الحقيقية، هو ده اللي بنعمله في الحياة وبنستناه في الآخرة".
واستكملت: "كل أما تبقى حاسس أنك عاوز تعيط روح طبطب على حد بيعيط.. كل حاجة راحت مننا مكانتش بتاعتنا، هفرح وهضحك وهرجع زي الأول ومش همني نفسي بحاجة، وهخلي أهلي يشوفوني مرتاحة وسعيدة، لأن محدش يستاهل".
واختتمت باكيةً: "أنا بشكركم عشان النهارده أنا هنام مبسوطة وفرحانة، هنام وأنا مرتاحة وعلى الأقل هحس إني جبرت بخاطر شوية ناس حتى لو كان العدد قليل، بس على الأقل قدرت أعمل حاجة".
تعليق مثير من سالي عبد السلام على واقعة احتجاز نانسي عجرم وطفلتها بمطار بيروت
