قلب مفعول به.. شعر: ليلى حسن إبراهيم
ثقافة
ما بين فرحي وبين جرحي ما زال قلبي بيتمرجح وع الأرجح أنا عقلي اللي بيرجح يكون فاعل ويرفعلي بعينه القبعة عالي كفاية القلب مفعول بي ومنصوبلي ومكسوربي وعايشة الحسرة ف قلوبنا تغلبنا تبكينا وكل دا ليه؟! عشان القلب كان مفعول وضحكوا عليه وكان الفعل ف الماضي ما بين الظلم من قاضي وبين قلبي اللي عاش محروم وفعله كان كمان مجزوم كلام خايب مالوهش لزوم ولو ينجر بتتعبنا حروف الجر كمان إن وأخواتها وفرقتها ما بين اتنين وشبه الجملة يخوتها وفرحتنا تملي تقل ف الكفة وليه في كفة الأحزان تطب بحزننا الأوزان برغم إن الميزان حساس وإحساسه بجميع الناس ما عدا إحنا ماخيبيشي يطيب في خواطرهم وخاطرنا ماطيبشي كلام سيبويه بيتشوه ملامح نحونا ضاعت وعربنا بيتموه وهيبة صرفنا اتباعت
