لأجل هؤلاء تُلعب كرة القدم.. مشجع أهلاوي من ذوي الهمم:"نفسي آخد عضوية النادي"
لم تمنعه الإعاقة الجسدية من حب النادي الأهلي، بل تحول الحب إلى عشق، فقد فرح عندما سمع أن النادي الأهلي سيقدم العضوية مجانًا لمتحدي الإعاقة، ولكن ما لبث أن تعرض للخذلان بسبب عدم مقدرته على تحقيق هذا، بلال غنيم، شاب من ذوي الهمم، يدرس بالفرقة الرابعة بكلية التجارة جامعة القاهرة.
يحلم بلال بالانضمام لعضوية النادي الأهلي، حيث قام بجلسة تصوير بقميص النادي ورفع الصور في جروب على الفيسبوك، ولاقت الصور إعجابًا كبيرًا من قبل رواد مواقع التواصل الاجتماعي، حيث يقول بلال: "بعد مباراة الأهلي والزمالك في نهائي دوري أبطال إفريقيا، كنت قاعد على القهوة مع صحابي وبعدها قمنا عملنا سيشن بسيط بالتيشيرت واتصورنا ونزلت الصور وجابت تفاعل كبير، ولما عرفت إن في مسابقة بهشتاج "صورتك بتيشيرت الأهلى" نزلتها على الجروب ولقيت الناس متفاعلة معاها جامد".
سقوط أمطار غزيرة على القاهرة والجيزة
وأضاف بلال لـ"القاهرة 24" :" الجروب عمل المسابقة بعنوان "صورتك بتيشيرت الأهلي" وفي شركة ملابس رياضية مولتها، واللي هيكسب بالمركز الأول هياخد 1000 جنيه، والتاني تيشيرت والتالت طقم كورة، فقلت انزلها، وأنا أصلا بنزل صورتي كتير على حسابي وفي صور بتجيب 19 ألف لايك".
نشأ بلال في أسرة أهلاوية جعلته يعشق القلعة الحمراء منذ الصغر وأوضح: "أنا بحب الأهلي من صغري وأسرتي كلها أهلاوية، وبحب أتفرج على كل مباريات النادي، وإخواتي كانوا بياخدوني معاهم وأنا صغير نتفرج على القهوة، حبيت النادي بسببهم وحاولت أشترك في النادي، سمعت إن محمود الخطيب رئيس النادي كان قايل لو مسك الأهلي هيعمل اشتراكات مجانًا لذوي الاحتياجات الخاصة، حاولت إني أشترك لكن فشلت".
وأكد رغبته الشديدة في مقابلة كابتن محمود الخطيب، رئيس النادي الأهلي، حيث قال: "كل ما أروح النادي أقولهم عاوز أقابل كابتن بيبو عشان يعملي الكارنيه، والمسئولين هناك ميعرفوش إن ممكن أعمل الكارنيه مجانًا، ومعرفتش أوصل لكابتن الخطيب، فبقيت أروح مركز شباب الجزيرة، وكنت بلعب بينج بونج، بس الدراسة منعتني دلوقتي".
وتابع: "كل التعليقات اللي جاتلي على جلسة التصوير حلوة والناس بتحب تعلق لي على الصور، وكنت متوقع إن جمهور الأهلي هيحبني بالسيشن ده لكن تفاجئت بجمهور نادي الزمالك برضو بيشجعني، وبيحبوني وده فرحني أكتر".
وعن دور أسرته في حياته، قال بلال لـ"القاهرة 24": "والدتي معايا في كل حاجة بتوديني الجامعة وتجيبني، وبقيت أحب التصوير والتفاعل مع صوري عجبني وشجعني أكتر إني أتصور تاني، خاصة بعد انتشار صورة ليا مع والدتي على السوشيال ميديا".
إعاقة "بلال" سببها إهمال طبي على حد قوله، حيث روى قصته قائلًا:"الإعاقة مولود بها بس كنت بمشي وأنا صغير فعملت عملية في كف رجلي، لأني كنت بمشي على جنب من كف رجلي، وفي حد وصلني لدكتور كان بيعمل عمليات مجانا بالتبرعات، روحت له قالي ديه بسيطة وعملت التحاليل والإشاعات في يوم واحد ودخلت عمليات تاني يوم، بس الدكتور شالي الأربطة من الركبة، وده خلاني مش قادر أقف على رجلي زي الأول، اشتكيت الدكتور وروحت نقابة الأطباء ومخدتش حقي، وعملت عملية تانية بس فشلت ولكن بقيت بمشي بسيط، ودلوقتي أنا محتاج عملية تاني".
ونصح كل متحدي الإعاقة فقال: "رسالتي لكل متحدي الإعاقة، متخبوش نفسكم، وخلوا عندكم طاقة إيجابية، شوفوا مصالحكم وحياتكم عادي، متبصوش للتنمر والطاقات السلبية في ناس كتير بتدي طاقات إيجابية، أنا الكلام الحلو اللي بيجي لي بيرفع من روحي المعنوية، فدوروا على الناس اللي بتدي طاقة إيجابية".
