لميس الحديدي في رسالة لمالكة أسد الجونة الهارب: "إنتي حرة لو عاوزاه ياكل عيالك أو دراع جوزك"
علقت الإعلامية لميس الحديدي، على واقعة هروب شبل الأسد من فيلا سكنية بمنتجع الجونة، شمال الغردقة، من صاحبته، التى كتبت على جروبات المنتجع المختلفة للبحث عنه، وبمشاركة أمن المنتجع والسكان أعادوا الأسد إلى صاحبته، قائلة: "الأسد المرة دي مش في الغابة ولا جنينة الحيوانات المرة دي في الجونة". وأضافت "الحديدي"، خلال برنامج "كلمة أخيرة"، المذاع على قناة "أون آي"، "أن رحلة البحث عن الأسد كانت طويلة والأمن خرج وكل الناس كانت بتدور عليه لحد مالاقوه والصراحة الموضوع يبدو مضحكا بس هو مش مضحك أوي لأنه طبقا للقانون لا يمكن اقتناء أسد".
وتابعت قائلة: "أنا مش بتكلم هنا عن مراعاة حريات الناس أو حرية صاحبة الأسد التي قررت اقتنائه ده يخصها لوحدها سواء كانت عايزة الأسد ياكل دراعها أو عيالها أو دراع جوزها أو يلتهم دماغ أي حد لكن الفكرة إنها عايشة داخل مجتمع وداخل الجونة".
ووجهت رسالة لها: "الجونة تخضع للقوانين المصرية واوعي تفتكري أنها خارج سياق القانون أو القوانين المصرية هذا جزء من الدولة المصرية التي يطبق عليها القانون المصري والذي ينص عبر قانون البيئة رقم 4 لسنة 1994 وتعديلاته لسنة 2009، حيث تحظر المادة نفسها حيازة الطيور والحيوانات البرية أو نقلها أو التجول بها حية أو ميتة وده مكانه الغابة أو حديقة الحيوانات لأن حريتك تبدأ عندما تنتهي حرية الآخرين".
