5 فتيات جمعتهن الكلية ليكتشفن موهبتهن في الإبداع والتألق، فكانت نقطة البداية كلية الفنون الجميلة، قسم الديكور "سينما ومسرح"، حينما طُلب منهن تصميم مشروع مستوحى من حضارات قديمة، ومن هنا بدأت الحكاية.

تقول منار محمد، إحدى فتيات المشروع المعروف بـ "سيبيا": "إحنا 5 بنات، منار محمد رمضان، دارين علاء الدين، يارا محمد حاتم، يارا عيد نصر ودينا طارق فاروق، تخرجنا من كلية فنون جميلة عام 2019، وبدأنا في الفكرة لما طلب مننا نعمل مشروع مستوحى من حضارات قديمة، ساعتها اتبسطنا جدا بالمشروع، وديه كانت أول تجربة لينا، ومن وقتها بدأنا نستغل موهبتنا في التصميم مع شغفنا بالحضارة المصرية، لأننا اتعلقنا بيها من أيام دراستنا في الكلية، لذا قررنا تأسيس "سيبيا".

"سيبيا" هو مشروع خاص بالحلى المستوحاة من رموز حضارية قديمة، وكانت الهدف من وراء هذا المشروع هو الكشف عن أسرار وأساطير الحضارة المصرية، حيث كانت البداية عام 2018، ولكنه لم يخرج للنور إلا بعد تخرج المصممين في الجامعة.

شاهد مقتنيات كشف سقارة الجديد

"ولأن الحاجة اللي ليها حكاية ومعنى هى دايمًا الأقرب لقلبنا، حبينا يكون في قصة لكل قطعة حلى، قصة تعرفك أكتر عن تاريخ بلدك، و تقوي اعتزازك بيها".. هكذا أوضحت منار القصة الكاملة وراء إنشاء "سيبيا"، مضيفة :" هدفنا هو الحفاظ على الهوية المصرية، وإننا نعتز بكوننا مصريين".

وفي إحدى المرات تحقق الهدف، حيث اشترت إحدى الفتيات بعض الإكسسورات من "سيبيا" وسافرت، وأثناء تواجدها بالخارج، كانت ترتدي الحلى، فبمجرد أن شاهدها الناس عرفوا أنها مصرية، فتقول إحدى فتيات المشروع: "الموقف ده فرحنا جدا وأثر فينا".

وعن أصعب المواقف التي تمر بها الفتيات خلال هذا المشروع، قالوا: "إحنا بنات وتعاملنا بيبقى مع صنايعية وأحيانا بنأخر بره للساعة 2 بالليل عشان نخرج الشغل كويس، وفي البداية ملقناش اللي يعرفنا إزاي نبدأ، لأننا بندرس تصميم بس في الكلية، ومحدش حاول ياخد بإيدينا، عشان كدة علمنا نفسنا بنفسنا، وبدأنا ننزل ورش، واتقسمنا مجموعات، كل مجموعة مننا هتتعلم حاجة وهتاخد كورس فيها، وخدنا دورات تدريبية كتيرة".

 "نفسنا الفترة الجاية شغلنا يتعرض في المتحف الكبير، ونفسنا نصدر شغلنا لبره ونعرف في كل مكان".. طموحات تسعى الفتيات في تحقيقها، حيث ترغب في عرض الحلى في المتحف الكبير، مع القدرة على التصدير.

جربها قبل ماتشتريها.. "فاترينا" موقع إلكتروني لتجربة المنتجات قبل بيعها أون لاين (فيديو)

واختتمت منار حديثها بنصيحة للفتيات قائلة: "أي حد عاوز يحقق هدفه لازم يكون عنده الشجاعه أنه يبدأ، لأن لو مبدأتش الوقت هيفضل يعدي، ومش هتوصل لحاجة، وهتفضل تتفرج على ناس تانية بدأت وحققت اللي كان نفسي أعمله، عشان كدة  لازم أكون واثقة في نفسي وإني هقدر أحقق هدفي، مينفعش استسلم للناس والمشاكل اللي هواجهها، أكون متأكدة إنها مجرد وقت وهتعدي، كفاية إني هكون فخورة بنفسي في الآخر".