رسمت عمرو دياب بالبيبسي.. "داليا": "كان تحديًا كبيرًا بالنسبة لي" (صور)
لم تحصل على لقب فنانة من فراغ، فهي شابة مبدعة بلمساتها المدهشة، داليا حسني، فتاة تدرس بكلية التجارة، جامعة المنصورة، ترسم داليا بالأكل بدلا من الألوان، حتى أنها استخدمت السوائل في الرسم، موهبة غريبة تستحق الوقوف أمام إبداعها، فمن كان يعتقد أن السوائل ستكون بدلًا للألوان في يوم من الأيام!
تقول "داليا" للقاهرة 24:" في البداية كنت برسم رسم عادي، واستخدمت الألوان العادية، ولكن من 4 سنين ومع دخول الجامعة، فكرت في حاجة تخلي كل الناس تحب الرسم، وكان هدفي أن كل الناس تشوف الفن، مش بس في المعارض، لا في كل مكان، عشان كدة فكرت في حاجة يكون كل الناس شايفاه، وهي الأكل".
"نوبي" يرسم عادات مجتمعه بمهارة عالية: تعلمت الرسم صدفة.. وأجسد الحياة النوبية بالريشة (فيديو)
وأضافت:" لم أنفذ الفكرة إلا بعد رسمة محمد صلاح، ففي أثناء تناولي الإندومي والمكرونة، رسمت محمد صلاح، والرسمة طلعت حلوة وعجبت أسرتي، ولما الصورة انتشرت في كذا حد كلمني ارسمه".
الرسم بالأكل بشكل عام، ليس مهمة سهلة أبدا، حيث يصعب التحكم فيه مقارنة بالرسم بالألوان، حيث تابعت "داليا": هنا مفيش مجال للغلط، التصليح شبه مستحيل في حالة استخدام الأكل في الرسم، والملامح اللي هترسمها هتكمل عليها".
تحلم "داليا" ببراند خاص بها، حيث ترغب في صناعة ألوان صحية وآمنة على الأطفال، فلا تسبب التسمم، حيث تعمل على هذه الفكرة في هذه الفترة، وأعلنت أنها عن قريب ستعرضها:" مازلت استخدم الرسم العادي، وعشان كدة عايزة أطور منه، وأنا بحتفظ بكل رسوماتي اللي رسمتها لحد الآن، لإني بحب الفن وليا قصة مع كل رسمة، عشان كدة بجدد في رسوماتي ومش بكررها".
"رسمت عمرو دياب كانت تحدي بالنسبة لي".. تضيف "داليا":" الرسم بالمواد السائلة مستحيل، مش هتلاقي فنان استخدم الماء أو السوائل في الرسم، لأن السوائل بتعوم في مسار معين عشان ميدخلش على بعضه، عشان كدة الرسمة ديه من أهم وأدق الرسومات".
واستكملت حديثها قائلة:" الفكرة جتلي من الإعلان، وكانت صعبة في البداية، ومكنتش عارفة اعملها، بس أصريت عليها، وكل مرة كنت بقول هعد هشوف هقدر اعملها في المحاولة الكام".
وعبرت الفنانة عن حبها للفن، فقالت:" أتمنى أقدر أوصله لكل الناس، نفسي يكون في كل بيت مرسم، لأننا الفراعنة بلد الفن والمواهب"، ونصحت المواهب المدفونة بضرورة البدء طالما أن هناك فكرة جديدة.
