"البنت اللي معايا مش بنتي".. تفاصيل تبديل طفلتين في مستشفى الجلاء (مستند وفيديو)
في واقعة غريبة، وقعت عملية تبادل لطفلتين بمستشفى الجلاء، وفي مثل هذه الأخطاء الجسيمة تتحمل إدارة المستشفى وطاقم التمريض المسئولية الكاملة.
“البنت اللي معايا مش بنتي”.. بهذه الكلمات كانت بداية حديث محمد حنفي عبد العزيز، بائع متجول، في اتهامه أمام جهات التحقيق، مستشفى الجلاء، وذلك في واقعة تبديل طفلته، قائلًا: “اللي حصل أن مراتي إيمان سيد كانت حامل ويوم 4/1/2021، جالها الطلق بتاع الولادة باليل حوالي الساعة الثامنة مساء، فتوجهت مسرعًا لمستشفى الجلاء للولادة، لأنها مستشفى حكومي وسعرها مناسب ومتخصصة في الولادة، وهناك دخلت الطوارئ، وخدوا منها عينة دم وحجزوها للولادة، وتاني يوم بتاريخ 5/1/2021 الساعة 11 صباحًا تقريبًا دخلت العمليات للولادة، وقالوا ساعتها أنهم كانوا بيعملوا إجراءاتهم لذلك باتت في المستشفى، وبعد ذلك ولدت وطلبوا مني ملابس للمولود وقالولي إنها بنت، وبعد وذلك جئت بالطلبات وأخدوها والمولود كان مع مراتي وأنا ماشفتوش ومراتي باتت يوم كمان لغاية ما كتبلها على خروج”.
وأضاف حنفي أنه أثناء تخليص إجراءات الخروج: “اتصلت بيا مراتي وقالتلي البنت اللي معايا مش بنتي عشان الإسورة اللي أنا شفتها في أول الولادة غير اللي هي لابساها الأسامي تبدلت بحد تاني، والإسورة اللي كانت لابساها بعد الولادة على طول مكتوب عليها اسمي فرحت بلغت الأمن والإدارة، قالولي ممكن تكون الأسامي تبدلت بالغلط وقالولنا على اسم الأم اللي كانت في إيد البنت وشديت معاهم ومنعوني أني أدخلها، وقالولي اعمل اللي أنت عايزه، وأخذت البنت اللي تبدلت ومشينا على كده”.
س: متى تحديدًا توجهت لمستشفى الجلاء للولادة؟
ج: أنا رحت الطوارئ لمستشفى الجلاء للولادة لما مراتي جالها الطلق يوم 14/1/2021 حوالي الساعة التاسعة مساء.
س: ومن كان برفقتك آنذاك؟
ج: أنا كان معايا مراتي إيمان سيد حسانين بس.
س: ومع من قابلت تحديدًا حال دخولك لمستشفى الجلاء للولادة؟
ج: أنا روحت الطوارئ وقابلت الممرضة اللي كانت موجودة ماعرفهاش.
س: وما الذي أبلغتك به سالفة الذكر؟
ج: هي قالتلي مراتك لازم تولد دلوقتي وقعدتني لغاية ما نكشف عليها وقالولي ادفع المصاريف واستناها برة في الشارع لغاية ما تولد.
س: وما هي الإجراءات الطبية المتخذة من قِبل مستشفى الجلاء للولادة لحالة زوجتك؟
ج: هما قالولي أنهم عملولها تحاليل وأشعة وسونار على البطن وأخدوا عينة دم منها وبعد كدة طلعوها في غرفة وقالولي إنها تحت الملاحظة وممكن تولد في أي وقت.
س: وهل من ثمة تدخل جراحي لحالة زوجتك؟
ج: أيوة هما عملولها عملية قيصرية عشان هي ولدت قيصري مش طبيعي.
س: ومتى خضعت زوجتك لتلك الجراحة تحديدًا؟
ج: هي اتحجزت يوم 14/1/2021 عملت العملية تاني يوم الموافق 5/1/2021 حوالي الساعه 11 صباحًا، وقالولي إن هما استنوا لغاية ما تولد طبيعي لكن في الآخر ولدت قيصري.
س: وما هي الحالة الصحية لزوجتك عقب خروجها من تلك العملية الجراحية؟
ج: هي كانت حالتها كويسة.
س: وما الإجراءات الطبية التي اتخذتها حيال زوجتك عقب إجراء تلك العملية الجراحية؟
ج:هي بعد ما خرجت من العملية ادُّولها الأدوية لغاية ما فاقت وبعد كده ادُّولها المولود.
س: وما نوع المولود الذي وضعته زوجتك آنذاك؟
ج : جابت بنت.
س: وكيف وقعت على ذلك تحديدًا؟
ج: أنا ماشفتهاش، لكن مراتي هى اللي قالتلي بعد كده، وعشان ساعتها الممرضة قالتلي مبروك جالك بنت أخدت الملابس والغيار بتاعها.
س: ما هي الحالة الصحية للمولود عقب إجراء عملية الوضع؟
ج: هي كانت صحتها كويسة وقالولي، هنخرج بالسلامة.
س: وكيف علمت بتلك الواقعة؟
ج: أنا كنت عارف من قبل كده إن مراتي حامل في بنت، وقالتلي لما كنت بخلص الورق، وأدفع الفلوس أن السونار قال بنت.
س: وما هي مقدار المبالغ التي قمت بسدادها حال دلوفك لمستشفى الجلاء للولادة؟
ج: أنا دفعت كله حوالي 350 جينهًا قبل ما حجزوها في المستشفى.
س: وما الذي أبلغتك به زوجتك تحديدًا؟
ج : هي قالتلي أنهم بدلوا البنت عشان في الأول كانت البنت لابسة إسورة عليها اسمي إیمان سيد حسانين، وبعد ما فاقت بشوية لقيتها لابسة إسورة مكتوب عليها سمر ربيع محمد فقولتلها أنا هشوف القصة دي.
س: ما التصرف الذي بدر منك آنذلك؟
ج : أنا رحت للمرضين وطلبت أقابل المدير رفضوا وكانوا هسیلموني للأمن، واتخانقت معاهم ومارضوش يعملوا حاجة، قالولي إني ممكن الأساور تکون اتلغبطت وبعدها بتوع الأمين قالولي امشي دلوقتي وهنكلمك لو فيه جديد وفعلا مشيت.
س: هل قمت باتخاذ ثمة إجراءات طبيبة للتأكد من صحة ما أبلغتك به زوجتك؟
ج: أنا معملتش حاحة واستسلمت للأمر الواقع وبعد كده المستشفى كلمتني على تليفوني.
س: متى تحديد حدث ذلك؟
ج: اتصلوا بيا يوم 11 يناير 2021 الساعة العاشرة صباحًا.
س: وما الذي أبلغت به من إدارة المستشفى محل الواقعة آنذاك؟
ج: قالولي تعالى البنت ممكن تكون حصل لغبطة، وهنعمل تحاليل دي إن إيه على حساب المستشفى.
