لأول مرة في التاريخ.. الكنيسة الأرثوذكسية تحدد مدة خدمة الرهبان خارج الأديرة
وضع البابا تواضروس الثاني، بابا الإسكندرية بطريرك الكرازة المرقسية، مدة لخدمة الرهبان خارج الأديرة، لأول مرة في تاريخ الكنيسة القبطية الأرثوذكسية، على أن تكون 3 سنوات ويعود الراهب مرة أخرى للدير.
وقال البابا تواضروس، خلال رده على تساؤل حول حقيقة قرار المجمع برجوع الآباء الرهبان بعد خدمتهم الـ3 سنين، عبر الموقع الرسمي للكنيسة القبطية الأرثوذكسية: “ناقش المجمع هذا الأمر من خلال لجنة الرهبنة، وما توصلنا إليه أن ما يهمنا هو حياة الراهب أكثر من الخدمة، يعني حياة الراهب داخل ديره حياة مهمة جدًا، فحتى لو طلع الراهب للخدمة يطلع يخدم لمدة 3 سنين وبعد كده يرجع ديره عشان مينساش رهبنته، 3 سنين ما يعدل 1000 يوم أو أكثر وحتى لا ينسى الحياة الديرية لا بد من رجوعه.. مفيش مانع إنه يرجع بعد كده يخدم بعد فترة لكن المهم إنه يتواصل مع الرهبنة والدير وحياة الدير” .
وأضاف: “ممكن تقول أبونا الراهب بينزل إجازات وبيروح الدير خاصة لو خدمته خارج مصر، لكن الواقع يقول أن هذه الإجازة غالبًا تكون مشحونة بأمور تخص خدمته من مشاوير وتحضيرات وغيره لذا لا يستمتع بالدير.. لذا هذا القرار معناه أن أي راهب خارج من الدير يقال له بحد أقصى ثلاث سنين وسوف تعود للدير مرة أخرى، ويعمم هذا القرار على كل الآباء بحيث أننا يهمنا الحياة الرهبانية أكثر من حياة الخدمة”.
وتابع: "الخدمة الناجحة هي الخدمة التي يقوم بها الآباء الكهنة المتزوجين، هي دي الخدمة اللي احنا كلنا اتربينا عليها طلعت في الكنيسة لقيت أبونا فلان.. أبونا ده اللي بيخدمني أبونا ده بيجي يزورني في البيت وبياخد اعترافتنا وبيساعدني في الخدمة، وبيقف جنبي وده الوضع الطبيعي.. بنلجأ لخدمة الآباء الرهبان في حالتين: لما نكون هنبتدي خدمة جديدة في مكان لسة أول مرة بنكتشفه فنقوم نبعت أب راهب لأن الأب الراهب لسه مفيش زوجة مفيش أبناء مفيش معطلات حتى لو لم يجد مكان للنوم ينام على البلاط".
وواصل بابا الإسكندرية: “الحالة التانية لما تكون الراعية صغيرة مثلًا عشر أسر في مكان منقدرش نبعت كاهن متزوج بزوجته وبأولاده بالمدارس بالمسؤليات حتى من الناحية المالية، فنبعت أب راهب لحد ما الخدمة تكبر شوية تحتمل وجود أب كاهن متزوج ويبتدي يمارس العمل.. لكن بصفة عامة يهمنا الرهبنة أكتر من حياة الخدمة باعتبار إن الآباء هما اللي بيقوموا بالخدمة”.
