فرح الزاهد: مصابة بأنواع الوسواس القهري وكنت بتكسف يظهر من تصرفاتي
تحدثت الفنانة فرح الزاهد عن معانتها مع مرض الـocd أو الوسواس القهري، مشيرة إلى أنها كانت تعاني من ثلاثة أنواع منه، ولكن حالتها الصحية أصبحت أفضل من السابق، حيث إنها كانت تخجل من التصرفات التي توضح أنها مصابة.
وقالت فرح الزاهد، خلال لقائها مع الإعلامية منى الشاذلي ببرنامج “معكم”: "المريض بالوسواس القهري بيحاول ميبينش، أنا كنت بتكسف أقول أو أعمل أي تصرفات من دي أمام أي شخص، وهي ملهاش علاقة بالنظافة هو مرض في الآخر".
وأضافت فرح الزاهد عن مرض الوسواس القهري: "أنا عندي منه 3 أنواع منه، وهم الشخص اللي بينظم حاجته كتير جدًا، ويتأكد من أغراضه أكثر من مرة، ويرتب أفكاره جدًا، يعني مفيش حاجة بنساها خالص، مثلا الأرقام عندي لها مدلول وكل يوم لازم أفتكر كل رقم عندي ايه هو، وبنبقى عايشين في كابوس".
واستكملت: "أنا مر عليا فترة كنت لا أنام بغرفتي، خوفًا من أن تتسخ، ونفسي الأهالي تكون عندها وعي، أنا ماما مرة قالت لي أنتي محسودة، لكن لازم يكون في وعي عن المرض عند الأهالي ويراقبوا تصرفات أبنائهم".
وقالت فرح الزاهد عن علاج مرض الوسواس القهري: "أهم شيء الشخص يكون الشخص عايز يتعالج، ولازم تطلع خارج دائرتك وتفكر في أشياء مختلفة، والمفروض في أدوية بتتاخد بس أنا مخدتهاش، لأن المهم تكون أنت عاوز تتعالج، مهما أخذت أدوية، وأنا كنت عاوزة أتعالج".
وقالت فرح الزاهد عن أسباب الاكتئاب: "السوشيال ميديا سبب شوية في الانعزال، لأن كتر السوشيال ميديا بيجيب اكتئاب، وبتفقد اهتماماتك في الحياة، بتشوف كل حاجة في الحياة وبتفتكر أن أنت عايشها، لكنك تشاهدها فقط".
