جمال يوسف: السرطان جالي من الزعل.. وهذا أول شيء فكرت فيه خلال فترة المرض | حوار
شارك في رمضان الماضي بـ 4 أعمال فنية، وفور إعلان إصابته بسرطان البلعوم، شهدت مواقع التواصل الاجتماعي مسيرة كبيرة في حبه، وانهالت عليه الدعوات بالشفاء من جمهوره، الذي لم يعرفه على المستوى الشخصي عدد كبير منهم، لكن فنه الراقي وإتقانه للأعمال التي يشارك بها، جعلت منه فنانًا يتربع على قلوب جماهيره، هو الفنان جمال يوسف.
وأجرى القاهرة 24 هذا الحوار مع الفنان الخلوق جمال يوسف، الذي تحدث عن فترة مرضه، وسبب إصابته بهذا المرض اللعين، وكيف استقبل هذا المرض، والصعوبات التي واجهته في هذه الفترة، كما تحدث عن مشاركته في رمضان الماضي الذي شارك فيه بأكثر من عمل فني، وسر ابتعاده عن السينما، وأيضًا كشف أعماله في الفترة المقبلة.. وإلى نص الحوار:
في البداية.. حدثنا عن مشاركتك في رمضان 2021 بـ 4 أعمال فنية؟
جت كده من عند ربنا، هو مَن يسر لي هذا الأمر، أول شخص عملت معه كان الفنان الكبير ياسر جلال في ضل راجل، بعدها تعاونت مع السيناريست عمرو محمود ياسين في اللي مالوش كبير، ثم بعدها مع الفنانة غادة عبد الرازق في لحم غزال، ومصطفى قمر في فارس بلا جواز، وتعاونت بعدها مع أحمد خالد وجمال العدل في ضد الكسر.
كيف استطاعت أن تُفرق بين هذه الأدوار؟
كنت شغوف ومشتاق للتمثيل، لأن فترة المرض جعلتني ابتعد عنه، وكنت بحاول أعمل مجهود في كل حاجة، حتى أقدمها بشكل جيد ومختلف عن الأخرى.
ياسر جلال أول فنان تعاونت معه بعد المرض في مسلسل ضل راجل.. فكيف استعددت لهذا العمل؟
كنت واخده تحدي مع نفسي، لأن الدور كان شخصية بني آدم شرير، ومتعصب وحاقد وغلاوي.. وكمان كنت ببعت بيه رسالة لزوجتي وعيالي عشان يخافوا منيَ ويعرفوا أني مش سهل.
حدثنا عن مشاركتك في اللي مالوش كبير مع ياسمين عبد العزيز وأحمد العوضي؟
مِن أكتر الأدوار اللي بحبها، شخصية الدكتور فؤاد، لأني بحب البني آدم اللي بيطبطب على الناس، وهو كان بيعمل كده، إنسان طيب وكنت حابب الشخصية دي جدًا، والمؤلف عمرو محمود ياسين كان بيساعدني في التعرف على محاور الشخصية، وده سهل عليَ كتير.. وكنت سعيد بالعمل مع ياسمين والعوضي نجوم جميلة فعلًا.
قدمت أكثر من 190 عملًا فنيًا.. ما أكثر عمل مقربًا لقلب جمال يوسف؟
بحب مسلسل بنت بنوت مع مي عز الدين، ومسلسل زيزينيا، حضرة المتهم أبي، قانون عمر.
آخر ظهور سينمائي لك في 2014.. فما سبب ابتعادك عن السينما؟
أنا ممثل وبحب التمثيل، وبحب اشتغل كل حاجة، السينما لها إبداعها وبريقها، لكن ربنا لم يريد أني اشتغل سينما، لكن التلفزيون بحبه جدًا، أنا مش مطلوب كتير في السينما.
مَن مِن نجوم الفن تحب العمل معه؟ ولماذا؟
أحمد حلمي.. بحبه جدًا وبحب أعماله، هو فنان راقٍ جدًا، حتى في ضحكه والكوميدية التي يقدمها راقية، وأنا إنسان طماع بطبعي بحب اشتغل مع كل النجوم، منهم كريم عبد العزيز، ومنى زكي، ومنة شلبي وهند صبري، فكلًا منهما يسعدني العمل معه.
ما الشخصية التي تتمنى تقديمها؟
شخصية بلطجي، نفسي أجسد هذه الشخصية، عملتها في مسلسل قديم اسمه المنتقم، ولما براجع المسلسل حاسس أني لو عملتها تاني هعملها أفضل من كده.
لم تَخف من أن يكرهك الجمهور في شخصية الشرير؟
الناس بتحبني مش هتكرهني، لأن مفيش حد فينا بيكره زكي رستم، استيفان روستي، أو عمرو عبد الجليل اللي بيقدم دلوقتي أدوار الشر، حد بيكرهها؟، أنا حبيت الشر منه.
أصيب بسرطان البلعوم وخضعت لـ35 جلسة إشعاع في شهرين فقط.. حدثنا عن فترة المرض؟
المرض غير نظرتي في الحياة، خلاني مركز مع ربنا أكتر، وأيقنت أن اللي ربنا عايزه بيكون، يمكن ربنا أراد كده لأنه عايز يغيرني، كنت شايف الدنيا بشكل تاني، اكتشفت حاجات كتيرة أوي، مراتي طول عمري بحبها، بس بعد المرض بقيت بحبها أوي، أبني حسيت أنه كبر وبقى راجل.
وعنيت كتير مع المرض فضلت سنة كاملة مش عارف اشرب مية، المفروض الواحد يصحى الصبح يلاقي عنده عين، يقول الحمد لله، يشرب المية يقول الحمد لله، وده مكنش في دماغي.
تحدثت في تصريح مسبق لك "ربنا كبير ووراني حقيقة حاجات كتير".. ما الأشياء التي كشفها الله لك؟ وهل هناك أشخاص خذلتك؟
اللي بيخذلني مبشوفوش وتعبي جه من الزعل، أهم شخص في حياتي كان والدي وتوفى من شهرين، وأولادي دول اللي أنا موجود في الدنيا علشان أكون سند ليهم، زي ما هما سند ليا، وسبب إصابتي بالسرطان هو الزعل وربنا أراد كده.. الحمد لله.
مسيرة حب ودعوات كبيرة رأيناها على مواقع التواصل الاجتماعي من جمهور جمال يوسف.. فهل كنت متوقع كمية هذا الحب؟
مكنتش متوقع ولا مصدق اللي حصل.. حب الناس ساعد في شفائي بسبب الدعم النفسي، وبنتي جت قالتلي يا بابا أنت تريند، وأنا معرفش يعني ايه، وتفاجأت أن في ناس كتير معرفهاش بتدعيلي.
ما أول شيء فكرت فيه أثناء مرضك؟
كنت فرحان جدًا من جوايا أني هسيب ذكرى كويسة لأولادي، أي أب وأم بيحب يسيب ذكرى حلوة لولاده، وأنا كنت عارف أني ميت، عشان حمايا أصيب قَبلي بنفس المرض وتوفى، فكنت سعيد أني هسيب لهم ذكرى كويسة.
جميعنا لدينا أخطاء.. فما هو الخطأ الذي عزمت على عدم تكراره بعد المرض؟
قولت أي حاجة غلط مش هعملها، ومنها مثلًا أني مش هزعل مراتي تاني.
لمَن تُدين بالفضل بعد الله سبحانة وتعالى؟
أُدين بالفضل لزوجتي وأولادي، هما أكثر ناس وقفوا جمبي في فترة مرضي.
ما معايير اختيارك للأدوار وهل هناك خطوط حمراء في اختيارك للدور؟
مبختارش الأدوار.. زمان كنت بَخرِج المسرح فكنت بختار، لكن حاليًا الوضع اختلف، بقى عندي أسرة وأولاد محتاجين مصاريف، فبقبل الشغل.. لكن في سياق معين، مش عايز أقبل حاجة ولادي يتعايروا بيها في يوم من الأيام، لازم أقبل حاجة محترمة، وأحترم عقل المشاهد، وأحترم أن ابني بيتفرج، وفي الأخلاقيات لازم كده مفيش حل تاني.
ما أمنية الفنان جمال يوسف على الجانب الشخصي أو الفني؟
أمنيتي الوحيدة أني أشوف ولادي بصحة وسعادة، وموفقين دايمًا في حياتهم.. وعلى الجانب الفني نفسي أقدم عمل زي مسلسل عمر بن عبد العزيز، كان حاجة مبهرة بالنسبة لي، لما بشوف أداء نور الشريف في المسلسل بنبهر بيه، كمان كمان بتمنى أني اشتغل في عمل زي فيلم الممر، لما خدتي أولادي علشان نشوف الفيلم، كنت سعيد جدًا برد فعلهم كانوا خارجين فرحانين بالفيلم، وفخورين ببلادهم، ونفسي أعمل كده، وبتمنى تقديم الأعمال التاريخية.
بماذا توصي أولادك؟
أوصي أولادي بتقوى الله، وأن يكونوا مترابطين في حياتهم، ومع بعض دايمًا، وربنا يسعدهم ده اللي هيفرحني.
زوجتك أكثر شخص ساندك في فترة المرض.. فما هي الرسالة التي توجهها لها؟
حببتني في الجواز، كل شوية أقولها هتجوز عليكي علشان أنتِ حببتيني في الجواز..إحنا عِشرة وبقالنا 23 سنة مع بعض، وفي ما بينا مودة ورحمة.. مقدرش أعيش من غيرها.
مَن من نجوم الفن ساند جمال يوسف في محنته؟
كلهم كانوا ناس طيبين وعرضوا عليّ مساعدات مادية، دول زمايلي وعِشرة عمر، منهم مثلًا: محمد صبحي، عمرو عبد الجليل، ونشوى مصطفى، وناصر سيف، وأشرف زكي، جمال العدل، أحمد مدحت، غادة عبد الرازق، كلهم عرضوا عليا مساعدات مادية بشكرهم عليها.
والناس واخدة فكرة غلط عن الفنانين والوسط الفني، فاكرين أنهم مش كويس وده مش حقيقي، الناس فيه طيبة جدا ومحترمين، كل واحد له أسلوبه وله حياته، لكن إحنا كويسين مع بعض، وفي فنانين محترمين جدًا ونفتخر بيهم في الوطن العربي.
مِن أقرب زملائك في الوسط الفني الفنان محمد صبحي.. فماذا تقول عنه؟
محمد صبحي ده مدرسة، أتمنى أن أقدم أي عمل فني معه، حبيبي وبترعب منه رغم سني، ولما يجيلي تلفون منه ببقى مرعوب، أنا اتربيت عنده في المسرح، أطيب بني آدم ممكن نقابله في الدنيا، بالنسبة لي هو حاجة كبيرة جدًا، اتعلمت منه كتير، علمني الاحترام والأخلاق والالتزام، وخلاني احترم المسرح.. خلى الواحد محترم في حياته.
ما رسالتك لنقيب الممثلين أشرف زكي؟
أستاذ أشرف ده حاجة كبيرة جدًا بالنسبة لنا، ده وزير الإنسانية، لما كان ماسك رئيس هيئة المسرح وأصغر عامل في المسرح بيحتاج حاجة كان ينفذها له، وبيعالج النقابي والغير نقابي.
وأخيرًا.. ما أعمالك في الفترة المقبلة؟
بعمل مسلسل إجازة مفتوحة مع شريف منير، لقاء الخميس، ومسلسل الحرير المخملي، مع مصطفى فهمي وداليا مصطفى، وهيتعرضوا قريب، على التلفزيون.
