إزاي قلبه ماوجعهوش؟.. رسالة مؤثرة من أرملة المهندس أحمد عاطف بالدقهلية بعد مرورها على مكان مقتله
رسالة مؤثرة دونتها السيدة دعاء عبد العزيز، أرملة المهندس أحمد عاطف ابن قرية ميت عنتر في مركز طلخا بمحافظة الدقهلية، الذي لقي مصرعه على يد صاحبه، بعد أن ألقاه الأخير بنهر النيل، لكي يتخلص من ديونه المستحقة لدى المجني عليه نتيجة شراكتهما.
ونشرت دعاء رسالة عبر صفحتها الشخصية على موقع التواصل الاجتماعي، بعد مرورها على كوبري الجامعة، ذلك الموقع الذي قتل فيه زوجها: أنا من يوم اختفاء أحمد لحد وفاته مدخلتش الشقة، ولا حتى رحت جبت منها حاجة لحد ما اخواتي نقلوا كل العفش وكنت متشائمة بل معقدة من المنطقة اللي كنت عايشة، فيها لدرجة إني واخدة قرار ماروحش هناك أبدًا لأي سبب، مش هدخل القاعة اللي كان فيها فرحي أبدا، مش هتعامل مع أي بنك أو أي محل هناك، كنت بجيب طلباتي من وكالة المنصورة، عمري ما هدخلها تاني أبدًا، الحاجات دي كلها مامشيتش فيها خطوة إلا وأحمد معايا.
أضافت أرملة الضحية: النهارده بقا من سخرية القدر كنا في مشوار بخصوص وفاة أحمد ومن الزحمة اضطرينا نرجع من على كوبري الجامعة، المكان اللي جوزي مات من عليه، شفت السقالة والإنشاءات اللي أحمد وقع مكانها، شفت ورد النيل اللي حفظ أحمد ووقفه، شفت الارتفاع اللي جوزي حبيبي اترمى من عليه، معرفش إيه الشعور اللي سيطر عليا مش عارفة أوصله حسيت إني عايزة أجرب شعور أحمد كان حاسس بإيه، حسيت ب قلبي مقبوض وبطني وجعاني ونفسي مكتوم كأني خلاص روحي بتطلع.
واصلت أرملة المهندس أحمد عاطف: كان على إيدي كنان، مكنش في إيدي حاجة غير إني بصيت لكنان وعيطت، عايزة أقوله اوعى تيجي هنا تاني، غصب عننا جبناك هنا بس أنا مش عايزاه يعرف مكان اسمه كوبري الجامعة، عايزة أقوله مش بإيدي إن بابا راح هنا ومرجعش، قعدت أدعي لأحمد كتير وإن ربنا يجعل فزعته دي مأمن وأمان ليه من فزع يوم القيامة، وربنا يرحمه ويسكنه الفردوس الأعلى يا رب العالمين ربنا يوسع قبرك مد بصرك يا حبيبي.
استكملت أم كنان: بس النصيب الأكبر من الدعاء كان على الكلب القاتل ربنا يتقبل مني ويجعل الباقي من عمره قليل ويعيشه في فزع ورعب من أول ما يتحكم عليه بالإعدام لحد التنفيذ، ربنا يجعل الباقي من عمرك كله خوف ورهبة يا محمد يا ابن عايدة ربنا يقهر قلب أهلك وذويك عليك زي ما أنا مبنمش وحياتي اتحطمت بسببك.
اختتمت دعاء: بس جه في بالي سؤال: إزاي قلبه ماوجعهوش؟ إزاي ضميره مارجعهوش عن اللي ف دماغه؟ إزاي قدرت تعمل كده؟ إزاي عرفت تزقه وترميه من الارتفاع ده؟ أنا كنت في العربية وروحي بتطلع وأنا شايفة المية من فوق، إزاي فكرت أصلا تتخلص من روح وتنهي حياة شخص عمره ما أذاك في حاجة؟ ربنا يوجع قلبك ويجربها عليك وعلى أهلك تعبي وحرقه قلبي، أنا فوضت أمري لله ولو القاضي شاف المكان وحط نفسه مكان جوزي وحاول يحس باللي حسه وخصوصًا إنه مش بيعرف يعوم القاضي هيحكم لنا من أول جلسة ربنا يورينا فيك عجائب قدرته.
