هاني شاكر لـ نجيب ساويرس: يكفيني رد الناس عليك.. والدنيا مش فلوس خالص
علق الفنان هاني شاكر، نقيب المهن الموسيقية، على حديث رجل الأعمال نجيب ساويرس بعد مداخلتهما مع الإعلامي عمرو أديب في برنامج الحكاية، حيث هاجم ساويرس، هاني شاكر، وأبدى دعمه لمؤدي المهرجانات.
وقال هاني شاكر، في مداخلة هاتفية مع الإعلامي نشأت الديهي في برنامج الورقة والقلم المذاع عبر قناة TeN TV، إنه يرفض الحديث عن نجيب ساويرس وعمّا حدث بينهما، مضيفًا: كل المداخلة لم تكن بالمستوى اللي أنا متوقعة، ويكفي رد الناس عليه، وفعلًا كان استفتاء شعبي بينه وبين الصحفي اللي عمل مداخلة وراه.
وتابع حديثه بشأن إيقاف مطربي المهرجانات قائلًا: هذا الكشف موجود منذ أكثر من شهرين فيهم اللي دخل اختبارات ورسب وفيهم اللي موقوف من النقابة بسبب أفعال فاضحة يعاقب عليها القانون الموضوع مش جديد، قد يكون العدد الكبير تسبب في لفت الأنظار، لكنهم ليسوا لهم علاقة بالنقابة وبالتالي ليس من حقهم ممارسة الغناء.
وأكد نقيب المهن الموسيقية: اللي عاوز يغني أهلا وسهلا والأساتذة الممتهنين يشوف اللي عنده الموهبة، إحنا مش ضد لون ولا أسماء ولا طبقة معينة فنية خالص إحنا عاوزين المسألة تاخد شكل قانوني ده من حق النقابة إننا نخاف على أعضائنا ونخاف على قوانينا وده قانون مجلس الشعب أعطاه للنقابات الفنية، من حقنا نشوف مين بيخرج عن العادات من حقك تعاقبه وتوقفه وتنبهه ولا يجوز لأحد فرض سيطرته.
وأكمل هاني شاكر حديثه قائلًا: النقابة ومجلس إدارتها نعتبر نفسنا في مفترق طرق، والموضوع زاد عن حده، وكان لازم وضع ضوابط وأسس عشان نقدر نكمل في المستقبل، وللأسف في ناس لم تفهم القرار، وافتكرت إن المنع تعسفي ودون سند قانوني ومنع مطلق، والبعض اعتقد إنها حالة تعمد لأنهم أحسن وأشهر وأغنى مننا، الموضوع خد منحى آخر والقانون يعطي النقابة الحق في إنها تتعامل مع من هم أعضاؤها، ومن لم يحمل ترخيص أو تصريح بالعمل مش من حقه إنه يشتغل، ومن حقنا نبلغ كل الجهات المعنية إن هؤلاء ليسوا أعضاء في النقابة.
وأردف حديثه متسائلًا: هل ينفع دكتور لا يحمل شهادة وتصريح من نقابة الأطباء يعمل عمليات؟ أكيد لأ، وأي مهنة في الدنيا، وإلا نبقى عايشين في غابة، وبعدين أقول لأ أنا بحب الدكتور ده وعاجبني، هبقى أجيبه يعمل عملية، لأ الدنيا مش كده، مش فرض سيطرة وفرض فلوس، الدنيا مش فلوس خالص.
