بسمة وهبة لـ هاني شاكر: بلاش تعلن حبك لأغاني الراب.. ولازم نفصل بين أهوائنا ومسؤوليتنا
وجهت الإعلامية بسمة وهبة، رسالة للفنان هاني شاكر، نقيب المهن الموسيقية، خلال فقرات برنامجها 90 دقيقة، الذي تقدمه عبر شاشة قناة المحور.
وقالت بسمة وهبة لأمير الغناء العربي: حضرتك أستاذ في الفن والغناء والأخلاق والاحترام، أنا من الجيل اللي أتربى على سماع أغانيك، وحقيقي أنا بحبك من كل قلبي، وبحترمك ومفيش حاجة بيني وبينك، مش معنى إني مختلفة معاك في وجهة نظر يبقى إحنا أعداء مع بعض أو أنا بتخانق لأ، بس أنا حابة أوضح بأعلى صوت عندي، إن عندي تحفظ كبير على أغاني الراب، وهفضل بكل قوة أحذر طول ما أنا عايشة من أغاني الراب.
وتابعت موجهة رسالة للجمهور قائلة: السادة المشاهدين المحترمين، هل تقبلوا أن ولادكم وبناتكم وزوجاتكم يتفرجوا ويسمعوا هذه المهزلة؟
على فكرة أنا واحدة من الناس بنتي بتحب هذا النوع، وأنا مانعة تماما إنها تسمعه، وعندي مشاكل وبكسر رقبتها إنها بتفكر تسمع هذا النوع من الغناء، ليه لأنه مش غناء، هو نوع من الغناء بيتطاول وبيدعوا للفحش والفسق.
وأضافت: للأسف كل الجيل اللي بيسمعه جيل الولاد الصغيرين، طب دول هيطلعوا بنربيهم على إيه؟
كل الكلمات اللي في أغاني الراب عن الجنس والمخدرات، وكل الأغاني مليانة إحاءات جنسية، والمطرب ماسك طبق بيلف مخدرات، أنا مقدرتش أنزل ده.
وأعربت عن سعادتها باتخاذ قرار بشأن مطربين المهرجانات قائلة: أنا مبسوطة إنك شوفت حل في موضوع المهرجانات، لأن مش هيبقى فيه ألفاظ، ولا إيحاءات ولا الناس اللي بتقلع وتلبس على المسرح، لأن الجيل الجديد عامل زي السفنجة بيشربها، نعمل إيه في ولادنا يعني نغمي عنيهم ولا نسد ودانهم، طب على الأقل نقولهم إن ده عيب، لازم نفصل بين أهوائنا الشخصية ومسؤولية المنصب اللي إحنا فيه، لأن المنصب اللي إحنا فيه بيمس جيل بحاله، والله أنا قلبي واجعني وأنا بتكلم حقيقي تعبانة، حاسة إن ولادنا في خطر، إيه غسيل المخ اللي حصل لأولادنا ده.
