الروائي إبراهيم عبد المجيد عن حالته الصحية: مرعوب ونفسي الحياة تخلص بسرعة
كشف الروائي الكبير إبراهيم عبد المجيد آخر تطورات حالته الصحية حيث يخضع لسلسلة من العمليات الجراحية خارج البلاد، كاشفا أن حالته الصحية تتدهور بشكل كبير.
وكتب إبراهيم عبد المجيد على صفحته الشخصية على موقع التواصل الاجتماعي فيسبوك: بعد كل عملية يكتشفوا كسر في فقرة تانية في العمود الفقري. أول عملية 13 ساعة وكانوا فرحانين بالنتيجة وبعد يومين اكتشفوا كسر في فقرة تحت الفقرات التلاتة اللي عملوا ليهم دعامات.
عميات بالجملة
وأضاف عبد المجيد: عملت عملية تانية ست ساعات وقالوا خلاص وبعد خمس أيام اكتشفوا كسر في فقرة تحتيهم عملوا عملية تلات ساعات يوم اتنين ديسمبر وبكرة حيعملوا أشعة علشان يطمئنوا إن مفيش كسر حصل تاني وأنا مش مستوعب اللي بيحصل ومش قادر أفهمه ومرعوب ولما بسأل ليه ما أدركتوش ضعف الفقرات من بدري يقولوا كل الأشعة كانت بتقول الفقرات تستحمل وماكنش باين أي ضعف على الفقرة الأول،. وأنا بقول ياريتني ما سافرت ولا فكرت في علاج وكنت عشت من غير حركة سنة ولا اتنين كمان وجالي زي ما كان متوقع شلل عشت فيه سنة ولا اتنين ومت من غير التعب دا كله، أنا دلوقت مش بفكر غير في العودة أعيش ما بقي لي نايم على ظهري في البيت لحد ما ربنا يختارني.
واختتم الروائي إبراهيم عبد المجيد: مستني بس أقدر أتحرك ولو عشرة متر على السنادة، مش حوافق أبدا على أي عمليات تاني.. خلاص مش عايز حاجة من الدنيا بس نفسي ربنا يرضي عني والحياة تخلص بسرعة من غير الألم دا كله.. لا عدت فاكر أنا باشتغل إيه ولا كتبت إيه ولا لازمة أي حاجة عملتها إيه.
