ياسمين عبد العزيز: ربنا سخر لي الناس تدعيلي في وقفة عرفات.. واتكتب لي عمر جديد
قالت الفنان ياسمين عبد العزيز إنها عادت للحياة مرة أخرى بفضل دعاء زملائها وجمهورها، وذلك بعد نشر زوجها الفنان أحمد العوضي، منشورا طالب فيه بالدعاء لها لصعوبة حالتها الصحية.
وأوضحت ياسمين عبد العزيز، خلال حوارها مع الإعلامية منى الشاذلي ببرنامج معكم على شاشة قناة CBC: كل اللي حواليا كانوا بيعيطوا، وكان في ناس كتير عايزة تيجي بس كان ممنوع عني الزيارة في العناية المركزة بسبب تسمم الدم، عائلتي وأصدقائي كانوا مدمرين أنا كنت بموت يا منى، بعد كده كل اللي حواليا قالولي الدنيا مقلوبة، ربنا سخرلي الناس تدعيلي واتكتبلي عمر جديد، مكنتش متخيلة إن هيبقى في حب بالطريقة دي، وبجد بشكر كل الناس، أنتي عارفة يا منى إني مبحبش أطلع في برامج، ولكني جيت عشان أشكر الجمهور وكل زمايلي الفنانين.
كما قالت ياسمين خلال الحلقة: لما نزل أحمد العوضي بوست مرضي مكنتش أعرف وكان يوم عرفة، وقالي الناس قعدت تدعيلي، ونيفين صاحبتي قالت لي وأنا في العناية المركزة هدعيلك.
وأضافت: كنت حاسة إن بكره مش هبقى موجودة وروحي بتتسحب، وأول مرة أحس بشعور إني خلاص هموت، وقاعدة مبتحركش ومبتكلمش، لغاية ما جيه يوم عرفة والناس كلها دعت لي وكأن الدعاء كله كان من نصيبي، وبعد يوم عرفة طلعت من العناية المركزة في أوضة عادية وردت فيا الروح، من واحدة كنت بموت لواحدة سخر ربنا الناس كلها تدعيلي.
