التربي جهزلي قبري ولا أخاف الموت.. أبزر تصريحات ياسمين عبد العزيز مع منى الشاذلي
فن
ياسمين عبد العزبز
حلت الفنانة ياسمين عبد العزيز، ضيفة على الإعلامية منى الشاذلي، في برنامج معكم عبر شاشة قناة CBC، وتحدثت خلال الحلقة عن فترة مرضها ورحلة علاجها، كما كشفت عن تفاصيل إصابتها والخطأ الطبي الذي تعرضت له.
ويرصد لكم القاهرة 24 خلال السطور التالية أبرز تصريحات ياسمين عبد العزيز خلال الحلقة:
- عندي حاجة اسمها أكياس الشيكولاته على المبيض، ومش أول مرة أعمل العملية دي، وأنا عملتها 5 مرات من وأنا عندي 16 سنة.
- وتأقلمت عليها وألمها بقى صاحبي والدكتور كان بيستغرب.
- محدش كان يعرف عني حاجة كنت بعمل كل عملية والتانية ومحدش يعرف.
- من ساعة مسلسل اللي مالوش كبير ماشفتش يوم عدل ولا انبساط، وجالي مرتين كورونا.
- خلصت مسلسل اللي مالوش كبير من هنا وعملت العملية وحصلي الخطأ الطبي ودخلت في دوامة.
- عملت في شهرين بس 4 عمليات، الأولى الاستئصال والتانية تجميل لبطني.
- طلعت من العملية في ألم رهيب وفضلت أقولهم أنا بموت وهما شايفين إني لازم أقوم وأمشي.
- طلع إن كان القولون عندي مخروم وجالي تسمم في الدم.
- قالوا لو مدخلتش أعمل العملية كمان ساعة هموت.
- وأنا داخلة العملية أنا نفسي كنت حاسة إني مش هطلع، أنا فعلا مُت.
- طلعوني من العملية على العناية المركزة، وخراطيم من مناخيري ومن بقي و4 خراطيم من الجانب اليمين و4 من الجانب الشمال، و7 خراطيم كانيولا من رقبتي.
- قولت لهم سيبوني أروح لربنا.
- أول مرة أحس بشعور إني خلاص هموت، لغاية ما جيه يوم عرفة والناس كلها دعيتلي وكأن الدعاء كله كان من نصيبي.
- بعد يوم عرفة طلعت من العناية المركزة في أوضة عادية وردت فيا الروح.
- متخيلتش كمية الحب دي من الناس.
- التربي قالي ركبنا لك كشاف يا أستاذة ومستنيينك.. وكأني مثلا هقوم أشرب مياه من التربة بالليل وأرجع تاني.
- أصيبت بصدمة شهر بعدما رأيت أمعائي خارج بطني
- خسيت 15 كيلو كنت زي المومياء وتحت عيني أسود كأني واحدى تانية.
- أنا مش خايفة من الموت بالعكس عند ربنا أحسن.. كان كل مشكلتي ولادي مش عايزة أسيبهم لوحدهم.
- الناس قالولي لازم ترفعي قضية والدكتور يتجازى على اللي عمله.
- الدكتور ده عنده أكتر من 70 سنة معتقدش إني هرفع قضية على حد كبير في السن ده.
- أكيد الدكتور مش قاصد يئذيني.
- سافرت سويسرا عشان يدخلوا أمعائي جوه بطني.
- لو كنت قعدت في مصر كنت هموت، أهلي كانوا رافضين سفري تمامًا.
- محبش حد يشوفني وأنا تعبانة وشكلي تعبان ومشفتش نفسي وأنا تعبانة في المرايه.
- مرضيتش أنزل من سويسرا بعد ما خلصت إلا وأنا ياسمين وماشية ياسمين وقوية.
- فيه 3 حاجات متقدروش تشتروهم بالفلوس وهما الصحة وحب الناس والاحترام.
- ربنا سخر لي الناس تدعيلي.. واتكتب لي عمر جديد.
- محدش يقولي وحش الكون أنا اتعقدت.
- وعن مشهد حضن أحمد العوضي في مسلسل اللي مالوش كبير فقالت: لاقيت الناس بتتفرج علينا في الشارع ومبسوطين.
- في السوشيال ميديا موتوني وطلقوني وقالوا إني عملت عمليات تجميل.
