ابنة سعيد صالح: مكنش بيحب النكد.. وكنت في حياته أنا والمسرح والنادي الأهلي
تحدثت هند سعيد صالح ابنة الفنان الكبير الراحل سعيد صالح، عن علاقتها به كاشفة العديد من المواقف التي من الصعب عليها نسيانها، مما أدى إلى بكائها.
وقالت هند سعيد صالح، في لقائها مع الإعلامية لميس الحديدي، في برنامجها كلمة أخيرة، المذاع عبر شاشة قناة ON: والدي أحبني وكنت كل حاجة في حياته لدرجة علاقة مرضية، وكنت في حياته أنا والمسرح والنادي الأهلي، الضحك اللي في الشاشة ولا حاجة جنب اللي في البيت، وبابا عفريت.
وأضافت هند سعيد صالح: بابا كان بيصحى يدبدب بالشبشب لغاية ما يصحي البيت كله ويصحينا، ثم يدخل الأوضة ويقفل على نفسه ويتفرج على التلفزيون.
وكشفت ابنة الراحل سعيد صالح، عن موقف يدل على مدى إرتباط والدها بها قائلة: في مرة ساب المشهد وجالي وأطمن عليا عشان كنت عند الدكتور.
وانهارت هند سعيد صالح عند تذكرها تلك المواقف قائلة: مش عايزة أعيط بس بعيط غصب عني.. تعلمت كل شيء من والدي.. ومكنش بيحب النكد وبيسمعني وعرف يخليني أسمع كلامه هو بس، وأعمل اللي هو عايزه من غير ما يأمرني.
