بعد إطلاق حملة لمقاطعة السيرك.. دهب الحلو: الأسد اسمه ميسي وعملولنا دعاية ببلاش | فيديو
حالة من الغضب شهدتها مواقع التواصل الاجتماعي خلال اليومين الماضيين، بعد تداول صورة لأسد نائم خلال العرض، وسط شكوك بأنه تعب من الإرهاق بعد المشاركة في ثلاثة عروض متتالية.
حملة مقاطعة لسيرك فاتن الحلو
أطلق بعض مستخدمي مواقع التواصل الاجتماعي حملة مقاطعة لسيرك فاتن الحلو، الذي تسربت منه صورة الأسد، مطالبين بضرورة محاسبة أصحاب السيرك.
فاتن الحلو ترد على صورة الأسد النائم
القاهرة 24 تواصل بدوره مع فاتن الحلو صاحبة السيرك، ونشر بثا مباشرا لمعرفة كواليس الصورة المتداولة، وللرد على الاتهامات التي لحقت السير.
قالت دهب الحلو، ابنة فاتن الحلو: فترة ظهور كورونا كنا قافلين خالص، وكنا ممكن نيجي على نفسنا عشان الحيوانات تأكل أو تشرب، إحنا قطاع خاص، لأننا نصرف الميزانية من مالنا، والحيوانات ديه بتأكل حوالي 100 كيلو لحمة في اليوم أو أكثر.
وأضافت دهب: الـ 100 كيلو لحمة بيكون يوم ويوم، لـ 8 أسود، غير 10 كمان في المخزن، وبيبدلوا مع بعض في العروض، وإحنا كمان مش بنشتغل كل يوم، والعرض بيكون ربع ساعة بس، وكل أسد عرض واحد بس.
وتابعت الحلو: الأسد صاحب الصورة المنتشرة اسمه ميسي، وهو نام عشان الإضاءة خبطت في عينه، فعشان كدة الأسد بص لتحت وقت التقاط الصورة، والأسود بياكلوا ويناموا بعد شرب الأدوية وتأدية العرض.
وأكملت دهب الحلو: كل أسبوع بنجيب دكتور يكشف عليهم ويديهم التطعيمات، والسيرك في المعادي ده أول سنة، والهجوم اللي اتعرض له السيرك، إزاي الناس ديه هتمحى تاريخ 30 ولا 40 سنة، المهنة ورثناها عن جدودنا، والمفروض نقف جنب الناجح، ومحدش هيقدر يمحي تاريخنا.
دعاية ببلاش للسيرك
وأردفت دهب: السيرك مش هيتأثر بحملة المقاطعة، إنتوا عملتوا لنا دعاية ببلاش وبقينا تريند، مضيفة: إحنا عندنا 2 إناث و6 ذكور، والجمهور المصري بيحب يجي السيرك، وكل يوم عندنا حفلة الساعة 7.
واختتمت حديثها قائلة: تربية الأسود مسئولية، بتشيل هم الأسود، لأن ليهم مصاريف معينة كل يوم، عشان توفر لهم حياة مثالية، وإحنا بنحب الحيوانات جدا، مش مجرد شغل.
