أتلعنت ومحدش هيتجوزني.. أبرز تصريحات حورية فرغلي في كلمة أخيرة
حلت الفنانة حورية فرغلي ضيفة على الإعلامية لميس الحديدي في برنامجها كلمة أخيرة على شاشة ON، وحكت حرية فرغلي عن تفاصيل رحلة علاجها في أمريكا، وكشفت عن حالة الاكتئاب التي تعرضت لها وعن تبنيها لطفل وتكفلها بـ آخر.
وفيما يلي أبرز تصريحات حورية فرغلي مع لميس الحديدي: -
-تبنيت طفل وهرب، وتكفلت بـ طفل تاني أعمى وأصم ومات.
-اتعلمت منتظرش الحب من حد.
-مليش أصدقاء في الوسط الفني غير رانيا محمود ياسين، وإلهام شاهين الوحيدة اللي بتعزمني على عيد ميلادها.
-تعرضت للسحر بالمرض وتأخر الزواج والإنجاب، ولقيت العمل بنفسي.
-أول حاجة بشوفها في أعمالي هي مناخيري، وعمري ما ندمت على عمل فني.
-عمري ما طلبت فلوس من والدتي ووالدي، وربنا يرزقني وأجيب فيلا تانية.
مكنتش عارفة أعيش زي الناس، ولو قامت حريقة في البيت مش هعرف.
-لما فكيت اللزق من أنفي صليت ركعتين شكر لـ ربنا.
-أصعب لحظة لما شوفت نفسي في المراية، ومش شايفة سبب لوجودي في الحياة، ولا بخلف ولا بشتغل ومشوهه، أعيش ليه؟
-ناس كتير سألت عليا ومنهم رانيا محمود ياسين، محمد رمضان، نبيلة عبيد، سهير رمزي، صفية العمري، ياسر جلال.
حسيت الناس كانت حواليا لأني مشهورة وبشتغل كتير مش أكتر، وتلفوني مكنش بيرن خالص.
كنت بزعل من كلام الناس على شكلي وكانوا بيقلولي أنتي عايشة ليه؟
كنت بتمنى الموت، وحصلي تلوث من كتر العمليات والمسامير اللي في أنفي.
لما رجعت فرحت جدا أن الناس مستنياني ودا أداني أمل أعيش وارجع لشغلي.
-مكنتش بشم ولا أعرف أنا باكل إيه ولما رجعت أشم بعد 5 سنين شميت ماريجوانا
-فكرت أني ممكن أكون السبب في كورونا عشان ربنا يساعدني وألبس ماسك
-كنت بقول لربنا ماترجعنيش ملكة جمال أنا عاوزة أشم واستطعم بس.
-قلت يمكن ربنا عمل كده عشان مش عاوزني في التمثيل.
-مش متجوزة ومش هتجوز لأن مفيش حد عاوز واحدة ما بتخلفش.
-عملت 17 عملية ودفعت 5 مليون جنيه على العمليات وبعت فيلتي.
-كنت بتجنب أشوف شكلي ومش بطلع بره أوضتي.
-حلم حياتي أعمل شخصية حتشبسوت والأميرة ذات الهمة.
-كنت بسأل نفسي أنا عايشة ليه وكنت بتمنى الموت كل يوم.
-آخر حاجة كنت بفكر فيها أن شكلي يرجع كويس، ودلوقتي مبقاش يفرق معايا تعليقات الناس.
-كل أصحابي تخلوا عني وبقيت وحيدة واشتريت كلاب عشان أحس أني محبوبة.
-فقدت الثقة في نفسي وكانوا بيقولوا لي إنتي شبه مايكل جاكسون وشكلك بشع.
-الدكتور خد جلد من خدودي ووضعه في أنفي عشان تطول، والجلد فضل بالدم فترة.
-لسه في عملية كمان لأني شكلي لسه ما رجعش زي الأول.
-أصعب لحظة أني قررت أني مش هبص لنفسي تاني.
-بصدق في الأعمال والسحر وباقرأ سورة البقرة وبحصن نفسي بالأذكار
-بعد ساحرة الجنوب اتلعنت ووصلت لـ 49 كيلو
-لما شلت العمل لقيت في الورقة أني أمرض وأتأخر في الإنجاب
-تبنيت ابن خادمتي وبعد فترة شعرت بالغيرة مني وخذته وهربت
