بعد قتل أم لابنتها بسبب امتحان.. مبروك عطية: إيه المشكلة إن البنت تجيب إعدادية وتتجوز؟!
علّق الدكتور مبروك عطية، العميد السابق لكلية الدراسات الإسلامية، جامعة الأزهر فرع سوهاج، على واقعة قتل أم لابنتها، بسبب عدم قدرة الفتاة على الإجابة عن الامتحان، ما دفع الأم إلى قتل الفتاة.
وقال عطية من خلال بث مباشر عبر حسابه الرسمي على فيسبوك: أنا عايز أقول كلمتين على الفيديو المنشور بتاع واحدة محسوبة أم على الأمهات قتلت بنتها علشان معرفتش تحل في الامتحان.. قتلت بنتها لما رجعت وقالتلها معرفتش أحل امتحان اللغة العربية.
وأضاف مبروك عطية: أنا عايز أقول كلمتين، الكلمة الأولى أبناؤنا هم أبناؤنا.. أنا مبروك عطية كان ليا رغبة زمان إني ابني طه مبروك عطية يدخل كلية اللغة العربية، مع إنه كان علمي وكان فوق 97%.
وتابع عطية من خلال البث: أنا وقتها سافرت السعودية للعمل في الجامعة هناك على أساس إن ابني دخل كلية اللغة العربية.. قلتله كل دولة مفيهاش 5 بيتكلموا لغة عربية صحيحة، لكن كل حارة فيها 5 أطباء.. وقلتله مش عايزهم يبقوا 6 بيك.
مبروك عطية: معظم أبنائنا ملوش في التعليم
وواصل مبروك عطية: بعتلي ابني رسالة وأنا في السعودية.. ذهبت إلى كلية اللغة العربية ولم أجد نفسي.. وزمايلي اللى جايبين أقل مني دخلوا طب وروحي تشتهيها ولم يبق إلا رضاك.. مستنتش أكتبله جواب.. نزلت بعربيتي واتصلت بالتليفون وقلتله روح الطب، أنت دكتور ابني.. لو لغوي ابني، ولو صايع ابني برضو.. شيء من الذكريات؟
واستكمل: أبناؤنا هم أبناؤنا حلوا أبناءنا.. محلوش برضو أبناؤنا..أنا بقول الكلام ده للي لسه بتفكر تقتل بنتها.. لأن اللي قتلت خلاص.. والخيبة حصلت.. بنقول الكلام ده توعية، اتقوا الله في أبنائكم.
واختتم مبروك عطية، قائلا: الكلمة الثانية اللي عايز أقولها إن معظم أبنائنا ملوش في التعليم، ملوش في التعليم، إن شالله ما اتنيل.. هي بالعافية؟! ربنا عدد المواهب.. إيه المشكلة إن البنت تجيب إعدادية وتتجوز؟! وتجيب عائشة وزينب.. إحنا مش هنصنع مستقبل أولادنا بإيدينا.. دي سكة بنودي ولادنا فيها راجين الأمل.. لو حصل واتعلموا فل، محصلش الدنيا مش هتخرب! وكلٌّ ميسر لما خلق له.. افهموا.. الابن بعض.. إزاي الكل يقتل البعض؟!
