عبدالله رشدي عن ضرب عريس لعروسه في الإسماعيلية: هو هابي وهي هابي متبقاش أنت غبي
علق الشيخ عبدالله رشدي، الداعية الإسلامي، على واقعة اعتداء عريس على عروسه وهي بفستان الزفاف، عقب خروجها من الكوافير، بشارع السلطان حسين بـ حي أول محافظة الإسماعيلية.
اتصالحوا والغلطان اعتذر وهي سامحت خلاص
وقال عبدالله رشدي خلال بث مباشر له على صفحته على موقع التواصل الاجتماعي فيس بوك: زوج وزوجته أو واحد ومراته حصل بينهم ما طرق الحداد اتخناقوا مع بعض وضربوا بعض وحصل بينهم مشكلة كبيرة بينهمـ سواء هو متجني عليها أو متجنية عليها لكن الاتنين دول بعد اللي حصل وقطعوا بعض بالسكاكين اتصالحوا والموضوع انتهى والطرف اللي غلطان اعتذر والمغلوط فيه رضي وسامح احنا المفروض تعمل ايه نهدي سرهم ولا نضايق ونقعد نسحن الست على زوجها وهو عليها.
التصرف الطبيعي اللي نعمله إننا نكون محضر خبر
وأضاف عبدالله رشدي: التصرف الطبيعي اللي نعمله إننا نكون محضر خير ولا نكون محروقين ومتضايقين إن ربنا كرمهم وهدى سرهم، مضيفا: لو حد متضايق بالله عليكم دا هيبقى تصرف سليم.
الراجل هابي وهي هابي متبقاش أنت غبي
وأردف عبدالله رشدي: عايز أقول صورة معاكسة ماذا لو حدث إن الزوجة هي اللي متضايقة من زوجها وجابت بلطجيىة وضربوه وراح المستشفى وبعد ما خرج اتصالح وقال مسامح أجي اقول له إزاي تعيش معاها وأنت معندكش كرامة، فيه ايه الراجل هابي وهي هابي متبقاش أنت غبي، وأدخل بينهم، ربنا يهدي سعيد وسعيدة.
وواصل عبدالله رشدي: دلوقتي لا نتكلم في الصح والغلط ولكن بقول إننا لا بد أن نكون محاضر خير، هما اتصالحوا وبقوا حلوين خلاص لا أتدخل، ومش من اللياقة أتدخل بين الرجل وزوجته خالص.
واستطرد عبدالله رشدي: كل واحد عرف غلطة واتصالحوا خلاص، ومحدش قال إن التصرف صح، لكن بعد الغلط تم الاعتذار واتصالحوا.
وقت الطلاق أنا شيخ كاثوليكي
واختتم عبدالله رشدي: لما حد يقصدني زوجين يعني وعايزين يطلقوا بسبب مشاكل بينهم، بسألهم الأول لو في أولاد بقولهم الطلاق ممنوع ولو ست طلبت استشارة مني بسبب مشكلة مع زوجها بقولها ممنوع الطلاق بقولها شيخ كاثوليكي معنديش طلاق.
عريس يعتدي على عروسه في الشارع بالإسماعيلية
وتداول مستخدمو مواقع التواصل الاجتماعي، مقطع فيديو من شوارع الإسماعيلية، لعريس يضرب عروسه في يوم زفافهما، التقطته سيدة تقطن في الشارع محل الواقعة، وظهر فيه العريس وهو يعتدي على العروس، وهي تصرخ، وقالت مُصورة الفيديو، خلاله: بُصِّي ماسكها من شعرها إزاي؟.
وتعجب البعض من عدم تدخل أهل العروس لحل الأزمة، أو رد كرامتها، كما ظهرت شقيقات العروس فقط في الفيديو، وهن في حالة انهيار، حتى سقطت العروس على الأرض من شدة الصدمة في شريكها، وهنا وجَّهت شقيقة العريس الحديث إلى أخيها بطريقة سيئة، وقالت له: شيلها يالَّا من على الأرض.
