كابتن جيم يصوِّر الفتيات خلال التدريب.. وإحداهن: الفيديو حقق مشاهدات عالية وحياتنا اتدمرت بسببه
انتشر مقطع مصوّر لمجموعة من الفتيات يلعبن رياضة الباركور وتمارين فتح الحوض، في صالة رياضية مشتركة للنساء والرجال، وعلى الرغم من معرفتهن بالتصوير الذي كان يُجريه المدرب الخاص بهن، والذي كان يتولى مهمة تدريبهن كاملًا، فإن المقطع كان سببًا في بدء انقلاب حياتهن رأسًا على عقب، بعدما انتشر الفيديو دون علمهن، وتم التشهير بهن جميعًا، وتلقوا سُباب مستخدمي السوشيال ميديا لهن، وأيضًا تهديد بعض الأهالي لهن.
ومن جانبها قالت د.أ، إحدى الفتيات الموجودات في مقطع الفيديو، وهي تتدرب مع مدربها، إنها في الأساس كابتن جيم، ولكنها لم تتعلم كيفية فتح الحوض، لذلك لجأت لمدرب والذي يعتبر صديقها أيضًا حتى تتعلم أداء هذه الرياضة.
فيديو تصوير فتيات في الجيم
وأضافت د.أ في تصريحات لـ القاهرة 24: قالي تعالي أعلمك تفتحي حوض، وهي لعبة ليونة ليس إلا، وكنت على علم إنه بيصور لكن أكدت عليه أنه مينشرش الفيديوهات في أي مكان وخدت منه وعد، والتصوير ده كان من شهور، لكن اتفاجئت بنشر الفيديوهات على تطبيق ك أو اي من أسبوع، لقيت الناس بتكلمني وبتقولي ايه اللي انتي عملاه ده، ازاي تتمرني مع رجالة؟!.
الفيديوهات عملت أكتر من 5 مليون مشاهدة
وتابعت د.أ: كابتن الجيم نشر الفيديوهات ليا أنا وباقي البنات من غير رجوع لينا، والفيديوهات عملت أكتر من 5 مليون مشاهدة، لدرجة أن حسابه اتوثق على التطبيق، وكمان رصيده في البنك زاد لأن المشاهدات بيكون ليها فلوس بتروح لصاحب الفيديو.
وذكرت د.أ: الفيديو وصل لأهلي ولغاية دلوقتي مش بيكلموني، وحاولنا نشيل الفيديوهات بكل الطرق لكن فشلنا حياتي اتدمرت واتحولت لجحيم..
واستكملت د.أ حديثها: الفيديو وصل لكل أهالي البنات، لأنه نزل يوتيوب وفيسبوك، وفيه شخص نشره على صفحة كبيرة محقق فيها حوالي 7 مليون مشاهدة، عشان يشتم فينا وفي تربيتنا، قدرنا نتواصل معاه أنا ووالدة بنت تانية من اللي معانا في الفيديو، وطلبنا منه يمسح الفيديو وياخد الفلوس اللي يطلبها، حتى أم البنت كانت بتتوسل وهي منهارة، ولكن رده كان الرفض وإنه لسة معاه فيديوهات تانية لينا وهيفضحنا لأنه شايف إن دينه يحتم عليه إنه يربينا، وقالنا إنتوا جبتوا لأهاليكم العار وده اللي تستحقوه.
وأردفت د.أ: كل يوم شخص يبعتلي كلام صعب، ويسألني ازاي تعملي في نفسك وفي أهلك كدة، وأنا كنت بلعب رياضة فقط مستاهلش أنا ولا البنات يحصل فينا كدة.
