أديب عن مباراة السنغال: أعصابي تعبت بجد ولحد دلوقتي تعبان ولما خلص الماتش نطقت الشهادتين
هنأ الإعلامي عمرو أديب، المنتخب الوطني لكرة القدم لفوزه على نظيره السنغالي بهدف نظيف في ذهاب الجولة الفاصلة من التصفيات المؤهلة لكأس العالم 2022 بقطر.
كيروش مدرب عنيد
وقال أديب، خلال برنامجه "الحكاية"، المُذاع عبر فضائية "MBC مصر"، مساء اليوم الجمعة، إن المدير الفني للمنتخب الوطني كارلوس كيروش مدرب عنيد، مضيفًا: كيروش كانت أمامه فرصة لتبديل إيقاع المباراة إذا ما اعتمد على زيزو ومرموش في وقت مبكر من الشوط الثاني.
وأكد أديب: مفيش فرقة تلعب 60 دقيقة في منطقة الجزاء عشان ترد الكورة.. والناس دي لديها بنيان إفريقي لما لاعب بيخبط فيهم بيتدشدش.. ومش صعب علينا نخلص المباراة هناك ولسة الأماني ممكنة، ونقدر نكسبهم، بس مينفعش نروح هناك بنفس فكر كيروش النهاردة واللعب بطريقة دفاعية.
كما أثنى الإعلامي عمرو أديب على اللايف محمود تريزيجيه، قائلًا: بيلعب بثبات شديد ومنتظر يخطف جول في أي لحظة.
وأردف أديب بـ: المعلقين بتوع المباراة كانوا بيمهدوا لهدف السنغال من بداية الشوط الثاني.. كان عندنا قلة حيلة في آخر نصف ساعة، احنا كنا بنلاعب أشباح.. ولازم نتدارك كل أخطائنا، الدوحة على مرمى البصر بالمنظار ونقدر نحقق الإنجاز، والروح القتالية مش كفاية أمام لاعبين بحجم لاعيبة السنغال.
أكمل أديب: لاعبو منتخب السنغال لعبوا بخيابة النهاردة خاصة الكرات الثابتة، ولكن أبى الله إلا أن يتم نوره.. وصلاح قال للكرة أدخلي في أمان وكانت بلياردو.. قد إيه كان الماتش هام بالنسبة لنا وفوزنا بالمباراة دي الخطوة الأولى للوصول للدوحة.. احنا رايحين داكار كسبانين ومنتخب السنغال هيكون تحت ضغط كبير في ملعبه، أعصابي تعبت بجد ولحد دلوقتي تعبان ولما خلص الماتش نطقت الشهادتين.
