ابني ممكن يروح مني ومحتاج زرع نخاع.. أم تستغيث بالمسئولين لعلاج نجلها خارج مصر
“لا قدر الله ممكن يروح مني”.. بهذه الكلمات الممزوجة بدموع الأمومة، عبرت بريهان مايكل عن معاناة طفلها مع المرض حيث يعاني من إصابته بسرطان الدم، وبعد محاولات كثيرة من العلاج عاد له المرض مرة أخرى، ولكنه يحتاج إلى زرع نخاع.
عودة المرض للطفل مرة أخرى
وقالت بريهان، إن مستشفى 57357 لسرطان الأطفال أعطت لهم أمل في شفاء طفلها رافايل رامى، البالغ من العمر 8 سنوات، والذي ظل أكثر من 3 سنوات يتعالج من لوكيميا الدم، وبعد ما اخد بروتوكول علاجه كاملا في مستشفى 57 عاد إليه المرض مرة أخرى.
وأضافت الأم في تصريحات خاصة لـ القاهرة 24: “ ابني لازم يسافر في أقرب وقت بره مصر عشان يعمل العملية، لأن مفيش في مصر بنوك خلايا جذعية، فهو بعد ما خف في 5 يناير 2022 وفرحنا، فجأة المرض ظهر تاني بعدها ب3 شهور، والدكاترة بلغونا أنه محتاج ضروري لعملية زرع نخاع خارج مصر، ودى تكلفتها بتعدي١٠٠ ألف دولار يعني ما يقارب 2 مليون جنيه، وده آخر أمل والوقت مش في صالحه”.
وتابعت، أن هناك الكثير من الأطفال ممكن يتوفوا بسبب المرض، واصفة إياه بـ اللي مش بيرحم، ويأخذ منهم أحلامهم وضحكتهم، موضحة، أنهم عانوا في السنوات الماضية بتوقف كل شيء من علاج وخدمات بسبب فيروس كورونا ف.
وأكملت: “مش هتكلم عن كم المعاناة عن طفل ٦ سنين ساب تدريباته في النادي وساب مدرسته اللي كان لسه داخلها وساب زمايله وبطل يذاكر وساب كل حاجة بيحبها، وكل يوم بقى بيروح المستشفى عشان يتشك ويسحب تحليل وكانيولات كل يوم 3 أو 4 مرات عشان جرعاته”.
معاناة الطفل مع المرض
وتابعت: “ جرعاته كانت كفيلة أن تميت كل شئ جميل، مضيفة أن شعره وقع، ولونه بقى باهت وأصفر وعيونه دبلت، كنا طول الطريق بنتكلم عن أن كله هيعدي ويفوت وهيبقى كويس، أحمد ربنا ومش معترضة بس ابني أضعف من أنه يواجه وحش المرض دا تاني، فيشاء ربنا إن رافايل المرض يرجعله تانى، ولازم زرع نخاع قبل ما يروح مني”.
وأضافت: “ ابني بقي دبلان ومطفي ونفسيته وحشة وعلى طول زعلان، هكذا عبرت بريهان عن شكل طفلها بعد رحلة العلاج ورجوع المرض له مرة أخرى، موضحة: لما روحت النهارده المستشفى قالولي مش قبل 6 أو 7 شهور على ما دوره يجي”.
وأردفت: “ يعني ايه طفل لازم يزرع نخاع، أول ما نتيجة البذل تبقي سلبية يستنى شهور عشان تكلفة العملية فوق مقدرة أهله، احنا عمرنا ما هنقدر على المبلغ دا ولا حد بيقدر بسهولة، أنا نفسي أوصل صوتي لحد مسؤول عشان ابني رافايل وعشان كل الأطفال اللي زيه المريضة بالسرطان وبتحتاج زرع”.
