بينهم يسرا وإلهام شاهين.. مشاهير الفن يهنئون الزعيم عادل إمام بعيد ميلاده الـ 82 عبر القاهرة 24
حرص نجوم الفن على تهنئة الفنان عادل إمام بمناسبة عيد ميلاده الـ82 والذي يحل اليوم 17 مايو، ومن أبرز النجوم الفنانة يسرا، إلهام شاهين.
نعرض لكم في القاهرة 24 أبرز تهاني النجوم للفنان عادل إمام في يوم ميلاده
حرصت الفنانة يسرا على تهنئة الفنان عادل إمام بمناسبة عيد ميلاده، وقالت: أنا بشكر عادل إمام وممتنة له، لأننا عملنا أحلى دويتو مع بعض وعملنا 17 فيلم من أهم وأحلى أفلامي، ومن خلال عادل أنا حضنت الدنيا والجمهور وعادل إمام أسطورة عظيمة وكبيرة ولن يتكرر في تاريخ الفن.
وهنأت الفنانة إلهام شاهين الفنان عادل إمام بمناسبة عيد ميلاده: كنت سعيدة جدًا أني واقفة قدام عادل إمام، وأول جايزة آخدها أحسن ممثلة كان عن فيلم الهلفوت، والفيلم عمل لي نقلة كبيرة في حياتي وعادل إمام له فضل عليا.
وأضافت إلهام شاهين: وفي مشهد فرحي معاه عملت مكياج حلو عروسة ويوم الفرح، لما شافه قالي ده مكياج حد محترف مينفعش واحدة أول مرة تمسك في إيدها قلم روج تعمل كدة، لما تعمل هتعمل حاجة ملخبطة قالي امسحي المكياج وقال للماكير يعمل ايه بالظبط.
هنأت الفنانة أنوشكا عادل إمام بمناسبة عيد ميلاده وقالت: كبيرنا وزعيمنا الغالي جدًا على قلبي.. أستاذ عادل إمام مهما قلت مش هقدر أوفيه حقه.. لكن من قلبي بحبه جدًا وبقوله كل سنة وأنت بألف خير.
حرصت الفنانة عايدة رياض على تهنئة الفنان عادل إمام بمناسبة عيد ميلاده، وقالت: عادل إمام ده رمز عالمي، قد ايه لما تشتغلي معاه وتكوني جديدة تلاقيه فنان بسيط جدًا وبيساعد أي ممثل سواء ممثل نجم أو ممثل كومبارس، كان بيقف في تقريب الكاميرا عليّ ممكن أي فنان يمشي وأنتي بتتكلمي في الكاميرا، لكن هو لا يمكن يوافق على الحكاية دي لازم يوقف للممثل عشان يعطي له الإيحاء، وكان بيقولي لازم أنا اللي أوقفلك عشان يكون فيه إحساس.
هنأت الفنانة لبلبة عادل إمام بمناسبة عيد ميلاده وقالت: كل سنة وأنت طيب يا أجمل قلب مش ممكن أنسى الأيام الحلوة اللي اشتغلنا فيها مع بعض وعملنا أنجح أفلامنا، وبرضه في التليفزيون عملنا أحلى مسلسلين عندي صاحب السعادة ومأمون شركاه.
وأضافت لبلبة: مش بنسى أبدا الأيام الحلوة، ووقفتك جنبي لما فقدت والدتي، في حاجات جميلة جدًا بحبها فيك حبك لأصدقائك ومش بتنسى أصحابك، ودايما بتحس بنبض الشارع ودايما بتقدم فن راقي وحلو.
وحرصت الإعلامية بوسي شلبي على تهنئة عادل إمام بمناسبة عيد ميلاده وقالت: كان دائما يحتوينا ويجمعنا وكان لا يفضل الخروج في العموم، ولا يفضل السير على السجادة الحمراء في المهرجانات دون أسباب.
