خالد عليش يرد على تصريحات محامي طليقته لـ القاهرة 24: بنتي هتسافر معايا إزاي وأنا مش عارف أشوفها
علق الفنان خالد عليش، على تصريحات محامي طليقته ميما الشامي التي قالها في بث مباشر لـ القاهرة 24 أمس، التي اتهمه فيها بأنه استغل قضية ابنته، من أجل التريند وأصبح حديث مواقع التواصل الاجتماعي خلال الفترة الماضية، وابنته غضبت منه لأنه كان وعدها بالسفر للخارج معه ثم أخل بوعوده وسافر مع زوجته الجديدة.
وكتب خالد عليش، منشورًا عبر حسابه الرسمي بموقع فيسبوك: الحقيقة بقف كتير قدام ناس معرفش بيفكروا إزاي، المفروض ما نرددش كلام وخلاص عشان إحنا.. مش بغبغانات.. إحنا ربنا أدانا عقل نفكر به.. يعني بحارب إني أشوف بنتي بقالي سنة يبقي أسافر معاها ازاي.
خالد عليش: أسافر مع بنتي ازاي ومش عارف أشوفها
وتابع خالد عليش: على حسب تصريحاتكم وعدتها بالسفر يعني النية موجودة.. بس أسفرها ازاي وأنا مش عارف أشوفها ساعتين ثلاثة، ده يوم المُنى إن ماماتها توافق إني أسفرها ونسافر أنا وهي لوحدنا.. يتقال ده بخيل ومش عايز يدفع للبواب كام جنيه عشان يغسل عربيتها وأنا بعيد أصلا عشان أجي أحاسب البواب وهي بتاخد الآلاف فيتقال ده مقصر في المصاريف.
وأضاف خالد عليش: يتقال ده مدفعش فلوس التمارين اللي أنا مش عارف أشوفها ومعرفش بتروح ولا لا، وبتروح كل الحاجات اللي بيتقالي عليها ولا لا وأنا بدفع الآلاف ثانية وتردد ما بيدفعش.. يتقال دي جابت كب كيك أومال المبالغ اللي بتدفع في الشهر دي بتدفع ليه.. ويتردد ده ما بيدفعش.
واستكمل خالد عليش حديثه: أنا عايز أقفل الموضوع وما تكلمش فيه أكتر من كده بس بلاقي كلام مستفز اللي عايز يحل بيحل مش بيقعد يرغي انا عارض الصلح من خلال الأهل والأصدقاء، والمعارف والمحامين بالمناسبة، ومع ذلك بيكون الرد لا.. لدرجة إني عرضت الصلح امبارح في كومنت أتمسح واتعملي بلوك.
تصريحات خالد عليش
وواصل عليش حديثه قائلًا: أنا طلبي شرعي وبسيط أشوف بنتي بشكل إنساني وافسحها واخرجها وأسفرها وأعيش دوري كأب.. مكنتش عارف أشوفها بشكل منظم فاضطريت.. إني ألجأ للقضاء اللي أداني رؤية 6 ساعات في مركز شباب أتحايلت إنه ما يتنفذش وأشوف البنت بالود منفعش روحت مرتين ثلاثة ومقدرتش استحمل لا أنا ولا البنت.. طيب اعمل إيه ما أنا بقول الود اهو.. أنا مش عارف بتعاقب ليه وعلي إيه.
واستكمل عليش حديثه: أنا أسف إني رفعت قضية لازم أفضل مذلول عشان أشوف بنتي اللي هي حقي
الموضوع لا محتاج ناس تتشهر على قفايا ولا تصريحات.. الموضوع يخلص في قعدة
واللي خلاني لجأت إني أكتب ده واللي قبله إني مش لاقي حل ودي ولا حد يتدخل بالرغم أن بقالي سنتين بيتقال عني كلام مش حقيقي، مع إني بدفع اللي مطلوب مني وكله تمام بس مكنش هاممني أرد باللي بيتعمل دلوقتي شوية وهابطل أرد وأسيب اللي يقول يقول.
واختتم حديثة قائلًا: أخيرًا مستحيل أب يلجأ للرؤية عشان يكسر والدة طفله لأن ما فيش حد بيتكسر بعد الطفل إلا الأب.. أب أكيد فشل إنه يشوف طفله وقرر يروح مكان تحت رحمة الأم وكسرته تزيد وهو واقف خايف يقرب من بنته المشحونة ناحيته ومستني يشوف هتحن عليه بابتسامة ولا لا.
تصريحات محامي ميما الشامي
وكان محامي، ميما الشامي، وجه رسالة إلى الإعلامي خالد عليش، عما يصدر منه خلال الساعات الماضية، في تصريحات لـ القاهرة 24: قائلا: عندكم ألف طريقة لحل المشاكل بعيدًا عن ترندات السوشيال الميديا.
وأضاف محامي ميما الشامي، عن توقعاته للقضية خلال الفترة المقبلة، في حصول خالد عليش على الحكم بشكل نهائي، قائلا: مازال الحكم غير نهائي لأن لسه مجال الطعن والاستئناف عليه مفتوح، وبالتأكيد هستنفذ سبل الطعن والأحكام بشكل قانوني، عشان إظهار وجه الحقيقة في الدعوة.
