أحمد برادة: أخشى تكرار سيناريو الشوربجي.. وبحاول أتواصل معاه يرجع مصر
حذر أحمد برادة نجم منتخب مصر الأسبق للاسكواش، من تكرار سيناريو التجنيس مع لاعبين أخرين مثل محمد الشوربجي الذي اختار تمثيل إنجلترا بدلا من مصر.
وقال أحمد برادة في تصريحات تلفزيونية: أخشى تكرار سيناريو التجنيس مع لاعبين أخرين في المنتخب الوطني للاسكواش، مضيفًا: زعلان من اللي حصل زعلان على نجم بيحب مصر وجاب بطولات كتير.
تصريحات أحمد برادة
وواصل أحمد برادة: من وجهة نظري محمد الشوربجي خد قرار غلط، وبعد مكالمتي له اتأكدت من إنه بيحب مصر، متابعًا: أنا خوفي إن الولاد الصغيرين يعملوا زي محمد الشوربجي وياخدوا نفس القرار الغلط.
وكشف أحمد برادة، كواليس مكالمته مع محمد الشوربجي الذي اتخذ قرارا بتمثيل إنجلترا في لعبة الاسكواش بدلا من مصر.
وقال أحمد برادة: أول مرة أتكلم مع محمد الشوربجي انهاردة، جاب 47 بطولة لمصر، والناس هتنسى اللي عمله من أول بكرة لأن دي مش كرة قدم ده اسكواش، متابعًا: بحاول أتواصل مع محمد الشوربجي إنه يرجع مصر، ومعرفش ده قانونا ينفع ولا لا.
وأردف برادة: محمد الشوربجي منح مصر العديد من الألقاب وواخد الجنسية الإنجليزية من زمان واتكلمت مع والدته والناس دي طيبة بتحب مصر.
في السياق ذاته، هاجم أحمد برادة، الاتحاد المصري للاسكواش برئاسة عاصم خليفة، قائلًا: رئيس الاتحاد المصري للاسكواش عنده خلل كبير وفي دول تانية بتتفاوض مع لاعبين مصريين.
وقال برادة: أنا مش عايز اتكلم عن الاتحاد المصري للاسكواش عشان في ناس محترمة لكن في أمور بتُدار بشكل غلط، مختتمًا: أول مرة أنفعل وانتقد الأخطاء ولازم يحصل تغيير، ووالدة محمد الشوربجي تبكي بسبب قراره.
