الحرام مبيدومش.. سائق أوبر يعيد حقيبة بها 200 ألف جنيه لصاحبها
أهلي أول ما روحت البيت قالولي لازم الشنطة ترجع لصاحبها النهاردة قبل بكرة.. هكذا جاء رد فعل أسرة محمد أحمد عبد المجيد، سائق أوبر الذي عثر على حقيبة بها حوالي 200 ألف جنيه في سيارته وأعادها إلى صاحبها.
سائق يعيد 200 ألف جنيه لصاحبها
بدأت القصة عندما استقل عميل من المطرية السيارة مع محمد، صاحب الـ 29 عاما، والحاصل على بكالوريوس نظم ومعلومات إدارية، لتوصيله إلى منطقة التجمع الخامس، حيث وضع العميل الحقيبة في الخلف ثم ركب بجانب السائق.
ويروي محمد لـ القاهرة 24 تفاصيل الموقف قائلا: كوتش العربية باظ واحنا في التجمع الأول، فطلبت من العميل أنه ييجي معايا نعمله، ولكنه كان مستعجل، فنزل وركب عربية تانية ونسى الشنطة، وأنا روحت صلحت الكوتشي وشغلت التطبيق وركب معايا شخص تاني.
وأضاف محمد: قبل ما الزبون التاني ما يركب، خدت بالي من الشنطة، ومكنتش عارف إيه فيها، بس خدتها معايا قدام وخلصت مشواري وفتحت الشنطة.
سائق الأوبر يروي تفاصيل الموقف
وأوضح سائق الأوبر القاطن بمنطقة عين شمس: لقيت مبلغ حوالي 30 ألف، أول ما شفتهم اتخضيت، بس خلصت شغلي ورجعت بيتي، فتحت الشنطة ولقيت حوالي 200 ألف جنيه تقريبا، فضلت أقلب فيها لحد ما لقيت بيانات، ومنهم وصل إيداع فيه اسم العميل ورقم تليفونه.
وأكمل: اتصلت على العميل، وجالي البيت ودور في ورقه، وكان قلقان لأن الحاجات خاصة بالشركة وكان ممكن يتئذي، وبعدين لقى كل حاجة تمام وخد حاجته ومشي.
مجاش فى بالى غير إنى لازم أرجع الشنطة لصاحبها.. هذا كل ما كان يطمح محمد وأسرته في الوصول إليه منذ العثور على الحقيبة، مضيفا: أهلي قالولى لازم الشنطة ترجع النهاردة قبل بكرة.
وتابع: العميل أول ما شافني قالي أنا كنت حاسس أنك هتتصل بيا، عشان أنا ارتحتلك.. وكان بيحصل معايا مواقف كتيرة أني ألاقي موبيلات مثلا في العربية، بس أول مرة يحصل معايا موقف في مبلغ زى ده.
واختتم محمد حديثه قائلا: محدش ياخد حاجة مش من حقه، عشان مفيش حاجة حرام بتدوم، وممكن أي حد يقع في موقف زي ده.
